Luk 18:21-42

²¹Na man i lagi ayé, “Ta nimen-gu i kdee manam mdà di ktukaygu.”

²²Na kanto linge Dyisas ayé, manan di kenen, “Lo satu gukulangam. Mdà ge, na fablim i kdee dad knunam, na blém i wèan di dad to landè knun. Na mdà ayé, nun bong knunam ditù di langit. Na kafnge ayé, magin ge di do.”

²³Bay i to ayé, kanton linge i man Dyisas, ta too mlidù kenen du too bong knunan.

²⁴Neye Dyisas kenen, na manan, “Tay klimah i dad to nun bong knun gfusuk di Kagot Dwata.

²⁵Ku mlimah di satu bong lmanaf dnagit kamél fusuk di sol i dalum, too mlimah fa i satu to nun bong knun gfusuk di Kagot Dwata.”

²⁶Na i dad to lminge ayé, smalek ale, manla, “Ku gambet ayé, simto i fakay galwà?”

²⁷Na tmimel Dyisas, manan, “Nè i là gagan nimò i dad to, gagan Dwata.”

²⁸Na talù Piter, manan, “Neyem, ta tnagakmi kdee du magin gami di ge.”

²⁹Na man Dyisas, “Too glut i man-gu di gamu ani. Nè i to tmagak i gumnèan, ku demen i yaanan, ku demen i dad flanekan, ku demen i dad tuan, ku demen i dad ngàan du mdà di kaginan di Kagot Dwata,

³⁰matnù fa i gdawatan di du ani, na kadang di fulé du, gamdawat kenen nawa landè sen.”

³¹Na santifun Dyisas i sfalò lwe dad to galan dek, na manan dale, “Too gamu flinge du ta fan ato gatù di Dyérusalém du ditù gugdohò i kdee ta gsulat i dad tugad Dwata gablà di do, dunan i dnagit Ngà To.

³²Gablé agu di kagot i dad to ise Dyu. Nadoyla agu, fyàla agu, dnulàla agu, nfasla agu, na fnatila agu.

³³Bay di gatlun du, lê agu mték mdà di fati.”

³⁴Na i dad to galan tdò ayé, là glabatla i manan. Gbuni di dale i gumtatekan na là gadèla i kayèan man.

³⁵Ta mdadong ale Dyisas di banwe Dyériko, na nun lagi butè sudeng di kilil dalan du mni.

³⁶Kanton linge lduk i kdee dad to magu déé, ta smalek, manan, “Dét ani?”

³⁷Na tmimel ale, manla, “Dyisas mdà di Nasarét i magu dini.”

³⁸Na falbongan i talùan, manan, “E Dyisas, Bel Harì Dabid, begam agu kando.”

³⁹I dad to muna di ku Dyisas, nngakla i butè, du kayèla ku fanak. Bay baling mkit, manan, “Bel Harì Dabid, begam agu kando.”

⁴⁰Na yé duenam man, tadè fanak Dyisas, na fngén i butè. Na kanto kel i butè di safédan, snalek Dyisas kenen, manan,

⁴¹“Dét i kayèam nimògu di ge?” Na tmimel i butè, manan, “Amu, yé kayègu moon ku lê agu beg mite.”

⁴²Na man Dyisas di kenen, “Mite ge nan. Ta mgulê ge mdà di kaftoom.”