Lukas 2:10-27

¹⁰Ne̱ Wuribware̱ kabɔɔ‑ɔ yɛ, “Mo̱ne̱ ma sa a kufu nya mo̱ne̱, a le̱e̱ fe̱yɛ ase̱ŋ kɔne̱kɔne̱sɛ ko̱ ne̱ a baa ɔke̱maa mɔ kakatɔgyi‑o ne̱ mo̱ a baa mo̱ne̱.

¹¹Amo̱ e̱ gye̱ fe̱yɛ ndɔɔ a kake mɔ baa ko̱we̱ ɔko̱ ne̱ ɔ mo̱rɔwe̱ mo̱ne̱‑ɔ. Mò̱ e̱ gye̱ Kristoo, mo̱ne̱ nyaŋpe̱ ne̱ Wuribware̱ a tɔwe̱ fe̱yɛ o suŋ a ɔ bo̱ kyo̱ŋwe̱ mo̱ne̱‑ɔ. Baa ko̱we̱ mò̱ mo̱ne̱ ɔde̱daapo̱ Deefid a maŋ‑ɔ‑rɔ.

¹²Na ke̱tɔ ne̱ ke̱ e̱ kaapo̱ mo̱ne̱‑ɔ e̱ gye̱ fe̱yɛ, mo̱ne̱ ya yɔ, mo̱ne̱ i ŋu fe̱yɛ baa ba waagya bo̱ miri mò̱ bo̱ be̱ya ke̱dakaa ne̱ bo̱ de mbo̱ ateese ba waa‑rɔ‑ɔ‑rɔ.”

¹³Puri amo̱‑rɔ, ne̱ Wuribware̱ mbɔɔ bwe̱e̱tɔ a le̱e̱ so̱so̱ bo̱ tii ɔgye̱ŋkpɛɛsɛ‑ɔ se̱ e̱sanne̱ ade̱e̱re̱se̱po̱ amo̱ ase̱ mfe̱ŋ, na ba waa iliŋ ba kyo̱rɔ Wuribware̱ fe̱yɛ,

¹⁴“Wuribware̱ ne̱ ɔ bo̱ so̱so̱‑ɔ a nya ke̱dabe̱ na wuraa ooo, ne̱ bamo̱ ne̱ bo̱ bo̱ swe̱e̱re̱ se̱ ne̱ ɔ kpa bamo̱ ase̱ŋ‑ɔ a nya kaye̱e̱yuri ooo.”

¹⁵Amɔ Wuribware̱ mbɔɔ amo̱ a kiŋŋi bo̱ yii so̱so̱‑ɔ, ne̱ ŋkee e̱sanne̱ ade̱e̱re̱se̱po̱ amo̱ yɛ, “Mo̱nꞌ sa a ane̱ yɔ maŋ amo̱‑rɔ ya ke̱e̱ ke̱tɔ ne̱ kaa waa mfe̱ŋ ne̱ Wuribware̱ a suŋ bo̱ tɔwe̱ gywii ane̱‑ɔ.”

¹⁶Amo̱se̱‑ɔ ne̱ baa waa me̱naŋ yɔ Bɛte̱lahɛm ya ŋu Mariya na Yo̱sɛf na kayaagyi‑o, na ɔ da ke̱dakaa ne̱ bo̱ de mbo̱ ateese ba waa‑rɔ‑ɔ‑rɔ.

¹⁷Ne̱ baa tɔwe̱ ane̱ŋ ne̱ Wuribware̱ kabɔɔ‑ɔ a tɔwe̱ kayaagyi amo̱ ase̱ŋ‑ɔ gywii bamo̱.

¹⁸Ne̱ e̱ye̱e̱ a kpe̱ŋ ɔke̱maa ne̱ oo nu ane̱ŋ ne̱ e̱sanne̱ ade̱e̱re̱se̱po̱ amo̱ a tɔwe̱‑ɔ.

¹⁹Mariya mɔ a taa ase̱ŋ mɔ pɛɛɛ bo̱ be̱ya mò̱ kuŋu‑ro, ne̱ ɔɔ fa amo̱ mfɛɛre̱ bwe̱e̱tɔ.

²⁰Ne̱ e̱sanne̱ ade̱e̱re̱se̱po̱‑ɔ a kiŋŋi ba yɔ, na ba waa iliŋ ba kyo̱rɔ Wuribware̱ bo̱ le̱e̱ ke̱tɔ ne̱ baa nu ne̱ baa ŋu‑o si. Ane̱ŋ ne̱ Wuribware̱ kabɔɔ‑ɔ a de̱ŋ tɔwe̱ gywii bamo̱‑ɔ dɛɛ ya waa.

²¹Kayaagyi‑o a gyi ŋke mburuwa‑o, ne̱ saŋ a fo̱ fe̱yɛ bo̱ te̱ŋ mò̱ ko̱twe̱e̱tu‑o. Ne̱ baa te̱ŋ mò̱ ko̱twe̱e̱tu. Ne̱ baa sa mò̱ ke̱nyare̱ ɛ Yeesuu, ne̱ ke̱ gye̱ ke̱nyare̱ ne̱ Wuribware̱ kabɔɔ‑ɔ a sa mò̱ pwɛɛ ne̱ Mariya a dɛɛ nya mò̱ kame‑o.

²²Amɔ Yudaa awuye de bamo̱ mbraa ko̱ ne̱ Wuribware̱ a sa bamo̱ ɔde̱daapo̱ Mosis fe̱yɛ ɔkye̱e̱ ya ko̱we̱ kayaagyi po̱pwɛɛ o de iyisi bo̱ fo̱ ŋke aduna. Ŋke amo̱ ya kyo̱ŋ, na bo̱ taa ɔkye̱e̱‑ɔ na mò̱ kayaagyi‑o yaa Wuribware̱ suŋkpa‑ɔ Yɛro̱salɛm maŋ‑nɔ, na bo̱ kperi kayaagyi‑o si mɔɔ kabo̱ bo̱ lɔŋŋɔ Wuribware̱, a le̱e̱ fe̱yɛ Wuribware̱ a tɔwe̱ mò̱ mbraa wo̱re̱‑ɔ‑rɔ fe̱yɛ, “Ɔke̱maa bregyi nyaŋsɛ ne̱ ɔ ko̱we̱ mò̱‑ɔ gye̱ Wuribware̱ lee.” Na bo̱ be̱e̱ kpɛɛ ɔkye̱e̱‑ɔ se̱. Ne̱ ɔkye̱e̱‑ɔ e̱ gye̱ otiripo̱ fe̱raa, ke̱tɔ ne̱ ɔ mɔɔ bo̱ sa Wuribware̱‑ɔ e̱ gye̱ awurele̱pɔ anyɔ. Ne̱ Yo̱sɛf a taa Mariya na mò̱ kayaagyi yaa Wuribware̱ suŋkpa‑ɔ Yɛro̱salɛm mfe̱ŋ na bo̱ lɔŋŋɔ Wuribware̱, fe̱yɛ ane̱ŋ ne̱ bamo̱ mbraa‑ɔ a tɔwe̱‑ɔ.

²⁵Saŋ amo̱ mɔ ɔnyare̱ ko̱ bo̱ Yɛro̱salɛm mfe̱ŋ ne̱ ba te̱e̱ mò̱ ɛ Simeyɔŋ. Ɔnyare̱ amo̱ gye̱ se̱sɛ timaa, ne̱ o suŋ Wuribware̱ nɛɛnɛɛ. Ne̱ ŋkee o te o gywii saŋ ne̱ Wuribware̱ i suŋ ɔmo̱rɔwe̱po̱ a ɔ bo̱ kyo̱ŋwe̱ Isireelii awuye‑o. Ne̱ Wuribware̱ a kufwiiŋe timaa‑o te mò̱ se̱.

²⁶Ne̱ Wuribware̱ a kufwiiŋe timaa‑o a kyɔ tɔwe̱ gywii mò̱ fe̱yɛ o ŋu Kristoo ne̱ Wuribware̱ a tɔwe̱ bo̱ be̱ya fe̱yɛ o suŋ a ɔ bo̱ kyo̱ŋwe̱‑ɔ pwɛɛ na ɔ dɛɛ wu.

²⁷Ne̱ Wuribware̱ a kufwiiŋe timaa‑o a sa ne̱ ɔɔ yɔ Wuribware̱ suŋkpa‑ɔ kabuno kake nsi ne̱ Yo̱sɛf na Mariya a baa Yeesuu mfe̱ŋ na bo̱ bo̱ waa ke̱tɔ ne̱ Wuribware̱ a mbraa‑ɔ e̱ kaapo̱‑ɔ.