LLUKU 2:10-27

¹⁰Aku-na-kolo angellomone nimbale: “Nane ono semane peanga se topo simbú okoro kene pipili naa kolayo. I semanemo yomboma pali konopu singí semanemo.

¹¹Kiniá ⸤u molorumu ye nokoli kingi⸥ Depitinga taonona ambo sene kango se memu. Yu Yomboma Lipa Tapondopa Mindili Nongo Molko Kinjilimili Aulkana Wendo Lipa, Manda Molko Kondonge Aulkana Lipa Mondomba Kangomo; yu Pulu Yemone “Ono nokopa kondomba ye se lipu mundumbu.” u nimba taltorumu ye nokoli Karasimu; yu Ye-Awilimu.

¹²Sika nikiru molo kolo tokoronje ono pungu kanangi mele nimbu siembo. Bolango kiki se mulu-maminiane okoko, kongimanga langi noringi okolo senga taltongemo pungu kanoko lendenge. Aku siku kanoko lendekole nane ‘Sika nimu lémo.’ ningu pilingí.” nirimu.

¹³Aku nirimu kinia popenge seko mulu-koleana angello paa awisili u orumu angellomo gilierimuna ongo mona gilkuli niringimuni, Pulu Yemonga imbi ambolko paka tondoko yu kape ningu ninguli:

¹⁴“Mulu-Koleana Paa Olandopa Pulu Yemonga imbi paa ola molopili. Mana-yombo yuni kanopa peanga pilielemo yomboma, konopu peanga pepili molangi.” niringi.

¹⁵Aku ninguli ono kongi sipisipi tapu-yema munduku kelko mulu-koleana kelko olando puringi. Angelloma kelko mulu-koleana olando puringi kinia sipisipi tapu-yemane anju yando ninguli: “Olio Betellieme pumbu i ungu kiniá wendo okomo mele Ye-Awilimuni nimba simu ungu kanumu kano-pamolo.” niringi.

¹⁶Aku ninguli popenge seko punguli niringimuni, Maria Josepotolo moloringili kanoko, bolango kikimu kongimanga langi noringi okolona suku lierimu kanoko lenderingi.

¹⁷Yu kanokole, u angellomone ono aku bolangomondo nimba sirimu mele yomboma ningu siringi.

¹⁸Kanu-kinia sipisipi tapu-yemane ningu siringi mele pilkuli yombomane konopu awisili kimbu siringi.

¹⁹Aku-sipa na-kolo Maria i unguma kinia ulu wendo orumuma pali konopuna panjipale, pe kepe konopu kimbu sipa molorumu.

²⁰Sipisipi tapu-yema kelko yando ongole niringimuni, angellomone nimba sirimu mele pali pilku kanoringimunga Pulu Yemo kape niliku yunga imbi ambolko paka tondoleko yando oringi.

²¹Kangomo kanoko liku taltoko molangi wale yopoko-pakara omba purumu kinia wale engaki-sipamonga yunga kangi se kopisiku makaye seko wendo likuli, anumuni yu olona naa mondopili angellomone nirimu mele pilkuli yunga imbi “Yesusi” ningu siringi.

²²Maria ⸤bolango merimumunga⸥ “Yu kalaro molemo.” niringimunga walema pora nimba, yu kamu kake sepili molomba walemo wendo orumu kinia, Mosisini ungu-mane sirimu se pilku liku sengelendo Josepo kinia olo kolea-awili Jerusalleme punguli niringilimuni, kake sepili molongelendo Pulu Yemo popo toko kalo-puringili. Ye-Awilimunga ungu-mane se u sirimu perimu akumu i-sipa: ⸤ ‘Ambo sene bolango kanopa lipale ambomo yu pena pemba mele molomba. Pena pemba walema pora nimbá kinia kake sepili molombando⸥ kera waembono mele talo molo kera imili mele talo Pulu Yemo popo topa kalopa sipili.’ nimba ungu-mane aku sipa nimba perimu kanumu pilkuli sengelendo puringili. Ye-Awilimunga ungu-mane nimba perimu se pea pilku liku sengelendo puringilila. Aku ungu-manemo i-sipa: ‘Kango komo kanoko lingíma pali “Ye-Awilimunga” ningu yu siengi.’ nimba perimu kanumu. Aku ungu-manemo nimba perimu-kulu pilkuli ‘Oltonga kango komomo Pulu Ye Awilimu siembili.’ ninguli Jerusalleme pungilíndu Yesusi mengo puringilila.

²⁵Ye-anda se Jerusalleme molopili olo puringili, yunga imbi Simiono. Yu sumbi nirimu yemo; yu Pulu Yemonga ungumu pilipa alieli Pulu Yemo kinia ungu nirimu yemo; yu Isirele yomboma konopu seluna pupili molangi omba sendemba yemo kanombando nokopa molorumu; Mini Kake Sélimu yunga konopuna sukundu molorumu.

²⁶Mini Kake Sélimuni yundu ungu se u nimbale: “Nu u we naa koloni. Nu u Ye-Awilimuni “Ono nokopa kondomba ye se lipu mundumbu.” nimba taltorumu ye nokoli Karasimu kanokole pe koloni.” nirimu.

²⁷Mini Kake Sélimuni Simiono yu lipa mundorumu-kulu yu Pulu Yemo popo toko kaloringi ulka-tembelena purumu. Kanu-kinia Yesusi anumu lapatolo ungu-manemone kangomando “Saa.” nimba sirimu mele sengelendo kango Yesusi mengo ulka-tembelena sukundu puringili kinia