Luka 18:5-15

⁵ka braninav akala udovica, adalese so but puti avela kora mande, i te na avel više te dosadini man!'”

⁶Tegani o Gospod o Isus phenđa: “Razmislinen adalestar so phenđa o nepravedno sudija!

⁷A o Devel li na ka branini ple izaberimen kola rat hem dive molinena le? Ov li ka ačhaj len te adžićeren?

⁸Vaćerava tumende, ka odbranini len sigate. Ali ked me, o Čhavo e Manušesoro, ka irinav ki phuv, ka arakhav li manušen kolen isi esavki vera?”

⁹Tegani o Isus vaćerđa akaja paramiz okolenđe kola mislinde dai pravedna, a averen dikhle sar po tikoren pumendar:

¹⁰“Duj manuša džele ko Hram te molinen pe: jekh fariseji, a o dujto cariniko.

¹¹O fariseji terdindoj molinđa pestar: 'Devla, hvala će so na injum sar avera manuša: čora, nepravedna, preljubnici ili sar akava cariniko.

¹²Postinava duj puti ano kurko; dava će dešto kotor oto sa so priminava.'

¹³A o cariniko, terdindoj odural, na manglja ni te dikhel nakoro nebo, nego khuvela pe ine ko gruđa te mothoj pli tuga hem vaćeri: 'Devla, ov milosno maje, e grešnikose!'

¹⁴Vaćerava tumenđe: akava cariniko irinđa pe čhere opravdime anglo Devel, a na o fariseji! Adalese so đijekh kova povazdela pe, ka ovel peravdo; a o ponizna ka oven povazdime.”

¹⁵O manuša anena ine anglo Isus pumare tikore čhavoren te čhivel ple vasta upro lende hem te blagoslovini len. I ked o učenici dikhle adava, na mukle lenđe.