Luka 13:8-17

⁸Andeta wurâta tamâta nde ipai tu, ‘Tamâta Ŋalae, kupile imandi mbwera taitu nâ kilo. Naŋa ma asau tâno ara tava ŋgoa take lâ kâi warika tini.

⁹Ambo tu kâi ŋine ma ipula kanaŋo lâ mbwera muli, ande ara ndo. Ambo tu ipula kanaŋo tia, ŋineŋga noko kumâ ku kuso piti lâ.’” Yesu iporo ŋgua tambirâŋa mine.

¹⁰Lâ Juda nenzi pwareâŋa ne zo sapâŋa toŋge, Yesu nde imo ipanananzi tamâta lâ luma ŋana pasauŋa kâ ilo.

¹¹Aku taine toŋge imo ndaina tona, koroani saka toŋge ipakâe kuku ku iveta pukoŋa lâ i tini ikura mbwera saŋao kanaŋo lima kanaŋo ŋato lâ. Mine kala taine ŋinde kumbu tuka nde mwaŋgi ndo lâ, ikura ŋana imandi sondo kâ, ande tia.

¹²Yesu nde mata ilâ imora taine ŋinde, ku isarâwa papa tu imâ. Ŋineŋga ipai tu, “Taine, naŋa azavaru noko ne pukoŋa piti lâ tini.”

¹³Yesu iporo mine lâ, ŋineŋga io mbau lâ taine ŋinde kulu, aku walele nâ taine kumbu tuka ipâŋga sondo kilo, aku imandi sondo. Aku imo ipanea Maro Kindeni.

¹⁴Aŋga luma ŋana pasauŋa kâ ŋinde ne katonâŋa tamâta nde wisi nâna, ŋana tu Yesu iveta taine ŋinde tini ara lâ pwareâŋa ne zo sapâŋa. Mine kala katonâŋa nde iporo kawa kâki panzi tamâta mine tu, “Zo lima kanaŋo taitu nde zo ŋana taveta wurâta kâ. Ambo miki ilomi pa tamâta toŋge tu ma izavaru nemi pukoŋa piti lâ tinimi, ande ara ŋana miki ma kamâ lâ wurâta ne zo. Andeta miki ma kaveta mine lâ pwareâŋa ne zo sapâŋa ndimo!”

¹⁵Andeta Yesu itu lâ i kawa tu, “Opopo, miki kawami nde kaporo ŋgua kie toŋge, aŋga ilomi nde keno piti ndo! Ikura zo sapâŋa rârâni, miki rârâni uru kalâ pa ŋgoa ŋalaŋala nenzi luma, ŋana kayautenzi nemi ‘bulmakao’ wa nemi ‘donki’ wa, aku kakainzi kalâ ŋana sinu lââ kâ.

¹⁶Aŋga taine ŋine nde timbunda Abraham ne vâsa, andeta Sadana nanayoni ipaipa kuku i lee ikura mbwera saŋao kanaŋo lima kanaŋo ŋato lâ. Mine kala ara ŋana naŋa ayaute i piti lâ Sadana mbau ilo lâ pwareâŋa ne zo sapâŋa!”

¹⁷Yesu ne kazâŋa tamâta nde siloŋo i ne ŋgua ŋine, aku mainzi pâta kanaŋo. Aŋga kinzi tamâta rârâni nde sindeka pâta ŋana mâsi ara rârâni Yesu iveta ŋinde.