Iluk 13:8-17

⁸Dangei, musun atebe kunum be elo yan weng bokolewomele: ‘Kamok kutaka! Ne kukun a man a ais mit elo duku kebilii, itol mak ete ‘Dem so gilabe ye?’, angeko, atemoki te.

⁹Fein dem gilalinba kele tewe, ne elo sek so guko, ful fomdoloki te!’, dangse te.”, yangse kale.

¹⁰Sabat finengdakamin ding mak kese ding dim bakate, Yesus e Suda im wensankabiliw am mak kawtem uneko, Sunbin-Got em weng be kukuyemse kale.

¹¹Beem ding dim bakate, am auk nam kebu waneng mak ka kel bisu kale. Mali em king kel itol kelei, aneng matil mak waneng buum dim bomelei, ulo mulsukun keumeko, bise kale.

¹²Kaneko beli, Yesus e ulo watemeko, gaaneko, bokoumomele: “Waneng kutaka! Ku kale kel tala o!”, wangei, u telui, e ulo bokoumomele: “Kame itel kom wakamin be kuluko, kokemi te!”, wangse kale.

¹³Wangei, akalem teing e deeko, um dim meleumei, waneng bu ken kesomi, kiol kuw fitutuko, mosomi, Sunbin-Got em wiin fian be daolewsu kale.

¹⁴Beem ding bakate, Sabat finengdakamin ding dim kese kasike, wensankabiliw am beem kak kunum e Yesus elo kaisuw fian keleweko, ka biliw kawtiw ilo bokoyemomele: “Sabat finengdakamin ding dim kabalak e, yu kanelom wakamin so kawtiw mak yemde teleko, ‘Kilelyemoka!’, dangbokoliw te! Mali gung kel sak aulamin ding dim beem ding ete kuw ilo yemde telemoliwka!”, yangse kale.

¹⁵Yangei, Kamok Fian e yan weng bokolewomele: “Fimdi famde kawtiw yutaka! Sabat finengdakamin ding dim kabalak e, yukati diwkuw diwkuw bulmakao so, donki so, yom am samal alik alik biilo ok wanin beem dulum elo yemde unakabiliw kasike!

¹⁶Kate Seten-Ataanim e mali em king kel itol mak Abalakam em mulkon kalu sok so net keumse te. Keko kasike, ne ki keko, ulo Sabat em finengdakamin ding bakate nam wokmino kilelumoki sako?”, yangse kale.

¹⁷Yangse kasike, elo maka kelewsiliw kunum i inkal fian mak kulusiliw kate, Yesus em kitil so auk so alik alik be atemsiliw kawtiw alik alik bi em kanese beem dulum elote kalfong fian mak kelewsiliw kale.