Luka 10:13-25

¹³Korasini azaḡa zu Betesaida azaḡa, za fase vetuḡaḡa, aduga boro hidiꞌuma! Zae mazao haḡai gigiꞌaḡa haḡainutaꞌaꞌe Turo zu Sidona azaḡa mazao haḡaifone, zeꞌe sauꞌaonoꞌo garihe zamare ḡihurifo. Ze dabua ḡuꞌa vidau ehoradu vega vadinizeo ase ḡuzuheꞌenaꞌa, zeḡeꞌa zamare ḡihurifo.

¹⁴Kota madaḡano, zaꞌe Turo zu Sidono azaḡa aduga vitine hidiꞌuma.

¹⁵Zae Kaperanauma azaḡa, zaeꞌa zamareꞌetene za Badiꞌa habaꞌao gubaziꞌuma raꞌehe? Mene! Zaꞌe rune habaꞌano mae feuziꞌuma.

¹⁶Iniuꞌa zae ḡoere egozinine, aꞌe eḡe egoniꞌohe, zu iniuꞌa za hezahozinine, aꞌe eḡe hezahoniꞌohe. Ebu iniuꞌa eḡe hezahonine, eḡe tuḡuhiroteꞌe Badiꞌa hezahohauꞌohe.”

¹⁷Ebu Iesu tahiꞌa 72 onamadu aneꞌa ziroteꞌe gauḡa haḡairo. Ze barirotene, matuꞌuzeta feuriro. Ebu Iesu meꞌodoharo, raenaꞌa, “Zuhia Boro, eme ḡa niḡano vine saua hegozatene, ze eme ḡoere egadu feraneha!”

¹⁸Iesuꞌa ziro, raenaꞌa, “Oꞌe, vazabu adureonoꞌo agaru ovaoga teige, Sataniꞌa ḡarihe fase vaḡinateꞌe horoneha.

¹⁹Ḡianoꞌi! Mohe ga asiasi edeze ruzoga teige, emeḡe agire Satani gigiꞌa vitinifine, eḡeꞌa inara gigiꞌaḡa ziniro. Ḡau ꞌahoganiꞌa mene sausauziꞌuma.

²⁰Rehano vine sauꞌa sauꞌaniꞌa za ḡoere egateꞌe veize ago matuoꞌi! U matuoꞌi, mazaḡa Badiꞌaꞌa za niꞌe ane habao mirihiro.”

²¹Eꞌe madaḡano Iesuꞌe Vine Zaḡoḡaniꞌa ragano radu matuꞌe rudaro. Ebu Badiꞌa kurau niro, raenaꞌa, “Mama, ḡaꞌe adure zu raha Zuhiꞌaḡa! E niguꞌeꞌohe, mazaḡa ḡaeꞌa edaꞌeḡa zu edeḡa boro azaḡa mazao hube hune haḡaiḡa ꞌahi uꞌuꞌrutiro. Rehano tahiꞌa teige, edeḡa oꞌoꞌa rae zamareteꞌe azaḡa mazaoꞌe fureniro. Mama, a hube! ꞌOuge haḡirotaꞌe ḡaeꞌa urateꞌeteꞌe ḡauḡa.”

²²Ebu vaze zinaꞌa, “Eḡe Mamaꞌa ḡau niduꞌa eḡe iniro. Vaze ꞌahogaꞌe eꞌe aḡuꞌa, rehano eḡe Mama daꞌo edeḡa. Ebu vaze ꞌahogaꞌe eḡe Mama aḡuꞌa, rehano eḡe, Ane Ubuga daꞌo edeḡa. Ebu e eḡe Mama moneo ihozoga veize ohoteꞌeteꞌe azaḡa daꞌo eḡe Mama edeḡa.”

²³Ebu Iesuꞌa ane tahiꞌatahiꞌa tehe ḡiazadu sifu ziro, raenaꞌa, “Za, matuꞌoꞌi, mazaḡa naginiꞌa fureruꞌeteꞌe haḡaiḡa horoneꞌohe.

²⁴Eḡeꞌa ziꞌohe. Peroveta zu kini azaḡaniꞌa, zaeꞌa horoneꞌeteꞌe haḡaiḡa ꞌadi ḡianihi reinu, rehano mene horoniro. Ebu zaeꞌa igiꞌeteꞌe hariḡa ꞌadi igihi reinu, rehano mene igiro.”

²⁵Mada ꞌahogano Mose goro ḡoeꞌa ihozeꞌeteꞌe vazeḡa ꞌahoganiꞌa iḡunadu Iesu tuhune nurihi rae zamareꞌenaꞌa, ḡadiniro, raenaꞌa, “Ihore vazeḡa, e nougenougine, ḡabone tuḡutuḡu hidiꞌuma?”