Luk 4:1-28

¹Ano Jises udu gwa Jodan eme loken le badeh, iy idih na boto-on ta Malawin Ndrabun. Eme Malawin Ndrabun andrei iy iu ili kon lomale an.

²Udu loboho kon doh, balik none iy ta iy kataku udu bolo len ma hanoh (40). Udu bolo len doh Jises baimon se nyamon bwe, eme suniya len anya kano badeh, iy imeson.

³Eme balik tiye i ta Jises i buku doh, “I buku none ou anya, ou Nadu Kindrei, ou asehek sahou ki ta bek kede-eh, kasahan jabi ramen.”

⁴Eme Jises tiye i tan i buku doh, “Ndratorowenei, ‘Lau winiyan balelei le jabi ramen ta samak bwe!’”

⁵Ano ja, balik andrei iy uru ala loke, suwi suwi iy leheya iy ta kon tinan mari badu munyak, iri kabin atondrok.

⁶Eme ma balik tiye i ta Jises i buku doh, “Lakou mari ou atou nane kede-eh, udu minek. Eme ya jo winiyan edeu i tare lau na seken tek, ya eme idah kameh, jo edeu boto-on ma hawe lakou mwasin mari doh kameh i tam,

⁷i buku none ou atehei bwili ndru-um keme tek, ma atudun nyarak.”

⁸Eme Jises tiye i tan ja i buku doh, “Sahou ta Kindrei badeh, ndratorowenei ale, ‘Ou atudun le nyara Laban Kindrei tam, ma ou a-en hamon tan le ari kabwe.’”

⁹Ano ja, balik andrei iy uru ala Jerusalem, eme ma balik atehei iy ales udu bwele-e no-o asiu tinan ta Kindrei loken on. Ano balik tiye i tan i buku doh, “Ou anya ou Nadu Kindrei handru eh, ou akahei ou ado dah ala andri.

¹⁰Tasah, i buku ndratorowenei, ‘Kindrei kameh edeu sahou batanau ili tiri angelo tan ame ta aseben ou ma atondrok ou.

¹¹Ma idah kameh, iri bwese-ei ou, ma bek winiyan batahi katim bwe.’”

¹²Jises tiye i buku doh i tan, “Sahou ta Kindrei badeh, ndratiye, ‘Ou satehei Laban Kindrei tam sala ta bolo none.’”

¹³Ano balik none iy ta madasan mari, arile Jises banuhun iy bwe, ano iy ruwani iy ma iy iu, winiya len ari ja, iy barasahan.

¹⁴Ano Jises eme hamon eme Galili, hawe boto-on ta Malawin Ndrabun udu hawen eme. Ya eme sahou ta nyala iri lakou iy amekes badeh, aseker ili winiya loboho doh.

¹⁵Ano iy leheya iri udu asiu ta atukum tiri Juwis, eme ma iri atudun iy.

¹⁶Ano Jises iu i hamon ja ili Nasaret, kon mene iy i tinan udu aliy. Eme i buku none len ta amunyau mari ndra-au, eme na len ta amunyau dah ja, Jises ili bolo asiu ta atukum tiri Juwis.

¹⁷Eme iy ales ere loke, iri atehei tarou ta Aisaya i minen. Ano iy sihi buk i ta sahou nane Aisaya atorou dah. Ano iy aloh:

¹⁸“Malawin Ndrabun ta Laban badeh, udu bwele-ek, Tasah, iy suni jo ta atiye sahou ki tiri lau lakou bwe. Iy suni jo ta tiye sahou ki tiri lau are bolo kou kame len, Ma kamekes iri lau mada iri kaseu, kanyolom ja; Ma ta talou malou tiri lau, ado ndra-in handru ka-au.

¹⁹Ma hawe ta tiye ta Laban kameh aseben iri lau tan na jaha doh.”

²⁰Ano Jises lukumwi buk nane dah, ya atehei i mine ndramak ta atondrok, ano ma iy udu andri leheya oro. Eme iri lau mari nane ado asiu ta ndrahu tukum tiri Juwis dah, mada oro asoh ili le tan.

²¹Ano iy tiye i toro, “Sahou nane ado ndranuhun badeh, ndrasahan handru na len dah.”

²²Eme oro asehek anya, iy ndramak mwasin labai. Ya, mani oro atur, ma oro lomondra solo-an labai ta sahou mwasin iy asehek. Ya eme oro anya, “Iy kede-eh nadu Josep labai, neh?”

²³Ano Jises tiye i toro, “Jo tanan labai, idah kameh ado anya, ‘Ou tiye sahou mwasin ki tam le. Ou badeh, ndramak ta amekes lau oh? Ou amekes kudu kon tam mwena op!’ Ya idah kameh, ado tiye eme tek ale anya, ‘Abo, ou none amekes lahou mene ou amekes udu Kapena-um kudu kon tam amwenen dah se.’”

²⁴Eme Jises anya, “Jo katiye tado kamwenen, iri lau badu bolo kon tiri propet amwenen badeh, iri winiyan baseken iy bwe.

²⁵Arile jo katiye tado kamwenen, kabatana Alaija, iri badih nyau badu Isra-el badeh, solo-an labai. Idoh, amwenen na len iri lau badu kon mari mene ameson, tasah ur badeh, bandruk se bwe, winiya jaha taloh ranah.

²⁶Eme Alaija badeh, bala baselesen oro ari badu Isra-el bwe, arile iy le ili hawe badih nyau ari udu kon Sarepat, udu loboho kon Saidon.

²⁷Ya na len propet Alaisa in ndra propet badeh, iri Isra-el solo-an badeh, sik lepra udu tiri. Ya udu bolo iri mari badeh, ndramak ari le badu Siriya, nyaran Naman badeh, Alaisa mesekei iy amwenen.”

²⁸Eme iri mari nane ado bolo asiu ta atukum nane dah anuhun, ma iri abolosen.