San Lucas 4:1-28

¹Ijkuak Jesús owalmokopato kan río Jordán, Ye yotentiwalaya de n Espíritu Santo, iwa n Espíritu okiwík kan amaka chanti.

²Ompa omoka ome póali tonati, iwa n diablo okinekia matlajtlakolchiwa. Itech nonteh ome póali tonati Jesús amitla okimomajsewi, iwa satepa owalxitlatlak.

³Ijkuakó n diablo okili: —Tla milák Te Ikone Dios, xikili nin tetl mamokopa paj.

⁴Jesús okinankili: —Itlajkuilol Dios kijtoa: “N tlakatl amo san ika paj yolitos.”

⁵Otlanki n diablo okiwík n Jesús kan se tepetl wejkapa, iwa okimititi nochteh n altepemeh de nin tlaltíkpaktli.

⁶Iwa n diablo okili n Jesús: —Ne nikchiwas xiknawati nochi tlan onka itech nin tlaltíkpaktli iwa tiweyixtos intech. Porke nochi noaxka, iwa weletis nikmaktilis san akin ne niknekis.

⁷Tla timotlankuaketsas nonawak iwa techweyilis, nochi yetos moaxka.

⁸Ijkuakó Jesús okinankili: —Itlajkuilol Dios kijtoa: “Xikweyijkachiwa Moteko Dios, iwa sanwel Ye tiktekichiwilis.”

⁹Otlanki okiwík n Jesús kan altepetl de Jerusalén, okitlejkolti ikpak n Weyi Tiopa kan okachi wejkapa iwa okili: —Tla milák Te Ikone Dios, ximokajkawa ixko tlali,

¹⁰porke itlajkuilol Dios kijtoa: Dios kinnawatis iangelwah mamitsmokuitlawikah.

¹¹Yejwah mitsmatsakuiliskeh para amo ximoikxitlanwi ika tetl.

¹²Jesús okinankili n diablo: —Itlajkuilol Dios noiwa kijtoa: “Amo xikyejyeko n Dios Moteko.”

¹³Ijkuak n diablo ayakmó okajsik kenijki weletis kiyejyekos n Jesús, okikakajte kech tonati.

¹⁴Jesús omókopki Galilea ika iweletilis n Espíritu, iwa sentetl omotlapowiayah tlan Jesús okichiwaya.

¹⁵Otlamachtiaya itech insinagogajwah n judíojteh, iwa nochteh akimeh okikakiah, kuali omotlapowiayah de Ye.

¹⁶Ijkuakó Jesús oyá Nazaret kan omoskalti. Non sábado okalakito kan sinagoga, kemi nochipa okichiwaya, iwa owalmóketski para kinamapoilis itlajkuilol Dios.

¹⁷Ompa okimaktilijkeh itlajkuilol n profeta Isaías, iwa ijkuak Jesús okimila, okajsik kan ijkuilitok:

¹⁸Iespíritu n Noteko notech kajki, ken Ye inewia onechpéjpenki para manikinmatilti n kualitlájtoli non amitla kipiah, onechaltítlanki manikinyolchikawaki akimeh moyolkokoah, iwa manikinmatilti kinkixtiskeh non tsaktokeh; iwa manikinmixtlajtlapo akimeh amo tlachiah, iwa manikinpalewi akimeh tlaijyowiah,

¹⁹iwa maniktematilti yoajsiko n tonati keman Dios kintiochiwas nochteh akimeh witseh inawak.

²⁰Otlanki Jesús okimemelo n tiotlajkuilolamatl, okimaktili akin tlapalewia itech non sinagoga iwa omotlali. Iwa nochteh non ompa okatkah, san okitlajtlatakeh,

²¹ijkuakó Jesús opé kinmilia: —Nin tonati nomoixpa yomochi tlan kijtoa itlajkuilol Dios.

²²Nochteh non ompa okatkah kuali otlajtoayah de Jesús iwa omotlajtlachialtiayah kenijki okinmatiltiaya n kualitlájtoli. Iwa omotlajtlaniayah: —¿Amo ye ipiltsi n José?

²³Jesús okinmili: —Kuali nikmatok nomejwah nonkinekih nonnechkakitiskeh nin tlájtoli: “Tlapajti, ¡ximopajti te monewia!”, noiwa nonnechiliskeh: “Tlan otikmatkeh otikchi Capernaúm, noiwa xikchiwa nika itech moaltepeu.”

²⁴Iwa okinmili: —De milajka nomechilia, nion se profeta kiyekseliah kan ialtépeu.

²⁵Ijkuak oyolitoka n profeta Elías, okatkah miakeh iknosiwameh itech nochi tlali de Israel, itech nonteh tonatijmeh eyi xiwitl iwa n tlajko mach okiawik, iwa okatka miak apisotl itech nonteh tlalmeh,

²⁶pero Elías mach okititlankeh inawak seme de nonteh iknosiwameh, yej sanwel inawak se iknosiwatl non ochantitoka kan altepetl de Sarepta, itech tlali de Sidón.

²⁷Noiwa ijkuak oyolitoka n profeta Eliseo, okatkah miakeh kokoxkeh de lepra itech nochi tlali de Israel, pero amaka de yejwah opajtik, sanwel Naamán non owalewatoka itech tlali de Siria.

²⁸Ijkuak okinkakeh ninteh tlájtolteh, nochteh non okatkah kan sinagoga, okualankamikeh.