LUKU 4:1-28 - Luda yã takada kũ Bisã yão

LUKU 4:1-28

Click on verse(s) to share them!

¹Yesu bò Yoda àtɛn su kũ Luda Ninio pɛkɛrɛna, akũ Nini pìi gɛ̀ɛ kãao gbárannan.

²Ibilisi a yↄ̃̀ à gwà gwe ari gↄrↄ bupla. Gↄrↄ kũ̀a adi pↄ́ke blero. Kũ gↄrↄ bupla pìi pàpa, nà tɛni a dɛ.

³Akũ Ibilisi pìnɛ: Tó Luda Nɛ́mɛ n ũ, ǹ pi gbɛ̀ dí li burodi ũ.

⁴Yesu wèa à pì: À kú Luda yãn ò pì: Pↄ́blen bisãsiri dìgↄ̃ kúo adoro.

⁵Akũ Ibilisi gɛ̀ɛ kãao musu, akũ à andunia kpatanↄ mↄ̀nɛ pínki a zɛki gbɛ̀n gↄ̃̀nↄ

⁶à pì: Mani n gba abirenↄ iko pínki kũ a gakurio, zaakũ à kú ma ↄĩmɛ, gbɛ̃ kũ má yei mani kpáa.

⁷Tó n kutɛ ma arɛ dé, ani gↄ̃ n pↄ́ ũmɛ pínki.

⁸Yesu wèa à pì: Ò kɛ̃̀ ò pì, ǹ donyĩ kɛ Dikiri n Ludanɛ ǹgↄ̃ doi ado.

⁹Akũ Ibilisi gɛ̀ɛ kãao Yurusalɛmu, à a zɛ̀ Luda kpɛ́ mìsↄ̃ntɛa à pì: Tó Luda Nɛ́mɛ n ũ, ǹ ↄ gbarɛ n zĩdai la,

¹⁰zaakũ ò kɛ̃̀ Luda yãn ò pì: Ani n yã o a malaikanↄnɛ ò n dãkpã.

¹¹Ò pì dↄ: Oni n sɛ́ ń ↄĩ, de ǹsun gɛ̃̀ sí gbɛ̀ɛaro yãi.

¹²Yesu wèa à pì: Ò pì, ǹsun Dikiri n Luda lɛ́ ǹ gwaro.

¹³Kũ Ibilisi Yesu yↄ̃̀ à gwà kũ yã pínkio à làka, akũ à a tòn ari zĩkea dↄ.

¹⁴Yesu ɛ̀ra à tà Galili kũ Luda Nini gbãnao, akũ a tↄ́ dà bùsuu pìla pínki.

¹⁵Àdi yã dańnɛ ń aduakɛkpɛnↄ gũn, baadi pínki dì a sáabu kpá.

¹⁶Akũ à gɛ̀ɛ Nazɛra, gu kũ à nɛ́ blèn. Kámmabogↄrↄ zĩ à gɛ̀ɛ aduakɛkpɛn lákũ àdi kɛ nà. À fùtɛ à zɛ̀ de à kyó kɛ,

¹⁷akũ ò annabi Isaya takada kpàa. Kũ à pòro, à bò gu kũ ò yã dí kɛ̃nwa ò pì:

¹⁸Dikiri Nini kúma, à ma ditɛ mà baaru nna kpá takasidenↄnɛ, à ma zĩ mà gↄ̃nzĩdanɛ kpàkpa kɛ gbɛ̃ kũ ò ń zĩda vĩronↄnɛ, mà wɛ́wɛ̃naa kpàkpa kɛ vĩ̀nanↄnɛ, mà gbɛ̃ kũ ò yĩnanↄ poro,

¹⁹mà Dikiri gbɛ̃kɛkɛnnɛgↄrↄ kpàkpa kɛ.

²⁰Akũ à takada pìi kòko à kpà kpanyĩriia, à vùtɛ. Gbɛ̃ kũ ò kú kpɛ́ gũnnↄ wɛ́ fĩa ń pínki.

²¹Akũ à nà yã'onnɛnaaa à pì: Luda yã dí pàpa gbãra lákũ átɛn ma nà.

²²Yã mana kũ à da a lɛ́n bò ń sarɛ ń pínki, òtɛni a tↄ́ nna sí ò pì: Yusufu nɛ́n díroo?

²³Akũ à pìńnɛ: Má dↄ̃ sãnsãn kũ áni yáasi dí zumɛnɛ. Tó mↄkↄ̃mmɛ likita ũ, ǹ n zĩda were. Áni omɛnɛ mà yã kũ a mà ma kɛ̀ zaa Kapɛnamu kɛ ma bɛ wɛ̃tɛ gũn la dↄ.

²⁴Yãpuran matɛn oárɛ, annabii dìgↄ̃ bɛ̀ɛrɛ vĩ a bɛ wɛ̃tɛ gũnlo.

²⁵Matɛn oárɛ yãpura, kũ ludambɛ zɛ́ tà Iliasu gↄrↄ, gyaanↄnↄn dasi. Legũ dí maro ari wɛ̃̀ aakↄ̃ kũ mↄ suddoo, akũ nà zↄ̃kↄ̃ↄ gɛ̃̀ Isarailanↄ bùsun pínki,

²⁶ama Luda dí Iliasu zĩ ń gbɛ̃kearo, sé gyaanↄ kũ à kú Zarɛfa, Sidↄ̃ sarɛ.

²⁷Annabi Ɛlisa gↄrↄ sↄ̃, Isarailanↄ bùsun kusunↄn dimmɛ, ama adi ń gbɛ̃ke werekↄ̃aro, sé Siria bùsu gbɛ̃ Naama.

²⁸Kũ gbɛ̃ kũ ò kú aduakɛkpɛ gũnnↄ yã pìi mà, ń pↄ fɛ̃̀ manamana ń pínki.