Luk 2:4-41

⁴Wal Josef bin oldei jidan langa det lilwan taun gulum Nesareth deya langa det kantri gulum Gelali. Bat imbin lafta go langa det taun weya King Deibid bin bon. Dei gulum det taun Bethlahem, en im deya langa det kantri gulum Judiya, en Josef bin lafta go deya dumaji im grengrenfatha olabat bin kamat brom det taun na.

⁵Wal Josef en im pramis Meri bin go langa Bethlahem blanga gibit dubala neim. Meri bin jidan femiliwei,

⁶en det taim blanga im bin kaman deya na langa det taun,

⁷en imbin abum det feswan beibi blanga im. Lilboi imbin abum, en imbin repdimap im garram speshalwan klos, en imbin lafta pudum im langa det pleis weya ola buligi bin oldei dagadagat daga, dumaji loda pipul bin silip insaid langa det haus en nomo eni rum bin deya.

⁸Wal sambala stakmen hubin oldei maindimbat ship bin jidanbat langa opin kantri deya gulijap langa Bethlahem,

⁹en wanbala einjul brom God bin kamat langa olabat, en imbin jandap wansaid langa olabat, en det braitwan lait blanga God bin shain ebriweya langa olabat. Wal detlot stakmen bin brabli bradin.

¹⁰Bat det einjul bin dalim olabat, “Yumob nomo bradin. Aibin kaman iya langa yumob blanga dalim yumob gudnyus, en det gudnyus garra meigim ebribodi brabli gudbinji.

¹¹Tudei na det beibi bin bon deya langa det pleis weya King Deibid bin bon longtaim. Det beibi na garra deigidawei ola nogudbala ting brom yumob. Im neim Jisas Krais, en im na det Bos blanga yumob.

¹²Dijan im trubala ai dalim yumob. En yumob garra faindim det beibi silip deya langa det pleis weya ola buligi oldei dagadagat daga, en im mami bin repdimap im garram speshalwan klos.” Lagijat na det einjul bin tok.

¹³Wal streidawei bigmob einjul bin jandap deya wansaid langa det wanbala einjul, en ol detlot einjul bin gibit theingks langa God, en deibin jinginat,

¹⁴“God im nambawan! Oni im na det brabli haibalawan langa hebin. En im na garra meigim yumob jidan gudbalawei, dumaji im laigim yumob. Im garra meigim ol detlot pipul weya im laigim garra jidan gudwei.” Lagijat na detlot einjul bin jingat, en afta deibin ol gobek langa hebin.

¹⁵Afta na detlot stakmen bin tok, “Wi lafta go langa Bethlahem en lukabat det beibi weya God bin dalim wi.”

¹⁶En deibin go, en deibin faindim Meri en Josef, en deibin faindim det beibi silip deya langa det pleis weya ola buligi bin oldei dagadagat daga.

¹⁷En wen deibin luk det beibi, deibin dalim ola pipul wanim det einjul bin tok blanga im,

¹⁸en ola pipul bin hatjamp wen deibin irrim olabat toktok,

¹⁹en det beibi mami bin oldei jinggabat brabli detlot wed weya detlot stakmen bin dalimbat olabat.

²⁰Afta na detlot stakmen bin gobek, en deibin gibit theingks langa God blanga det beibi weya deibin luk. Deibin gibit theingks langa God blanga ebrijing deibin irrim en blanga ebrijing deibin luk, dumaji detlot wed weya det einjul bin dalim olabat bin trubala.

²¹Bambai na wen det beibi bin wan wik ol, deibin deigim im blanga sekamsais im, en deibin gulum im neim Jisas. Det neim na det einjul bin gibit im bifo im mami Meri bin abum im.

²²Bambai na det taim bin kaman blanga Meri en Josef blanga abum det serramoni blanga meigim Meri fri weya imbin abum det beibi. Longtaim God bin gibit det lowa blanga det serramoni langa Mosis. En imbin gibit najawan lowa deya du. Det lowa im tok det mamiwan garra gibit det feswan boiwan beibi langa God. Wal dubala bin deigim det lilboi langa Jerusalem blanga gibit im langa God,

²⁴en seimtaim dubala bin gibit dubala yangwan dab o pijin langa detlot serramonimen blanga kilim blanga meigim det lilboi mami fri.

²⁵Wal seimtaim wen dubala bin deigim det lilboi langa det Serramoni Pleis, wan olmen neim Simiyan bin jidan deya langa det taun. Imbin gudbala olmen, en imbin oldei weidabat blanga det rait taim wen God garra larramgo fri ol detlot pipul blanga im langa Isreil. Wal det Holi Spirit bin jidan garram det olmen,

²⁶en imbin dalim det olmen, “Yu kaan dai raidap yu garra luk det Boswan gulum Masaiya weya God bin pramis im garra jandim.”

²⁷Afta na det Spirit bin dalim det olmen blanga go langa det Serramoni Pleis blanga ola Juwish pipul,

²⁸en deya na wen Josef en Meri bin deigim det lilboi blanga det serramoni, det olmen bin gajim det lilboi, en imbin holdim im garram im bingga, en imbin gibit theingks langa God.

²⁹Imbin tok, “Main God, yubin dum wanim yubin dalim mi yu garra dum, en yu gin larram mi dai gudbalawei na, dumaji garram main ron ai aibin luk dijan lilboi weya yubin jandim blanga seibum ebribodi.

³¹Ola pipul garra luk garram olabat ron ai wanim im garra dumbat blanga olabat.

³²Im garra meigim ola kantrimen blanga Isreil jidan haibala, en im garra shoum ol detlot najalot pipul wanim yu wandim olabat blanga dumbat.” Lagijat na det olmen bin tok.

³³Wal wen det mami en dedi blanga det lilboi Jisas bin lisin det olmen tok lagijat blanga det lilboi, dubala bin brabli hatjamp.

³⁴Brom deya det olmen bin gibit gudbala wed blanga det lilboi mami en dedi, en afta imbin tok langa det lilboi mami, “God bin jandim dijan lilboi blanga album loda Isreil pipul en blanga binijimap loda Isreil pipul du. Im garra shoum ola pipul wotkain God.

³⁵En loda pipul garra tok najawei langa im en shoum im wanim olabat jinggabat insaid langa olabat selp. “Wal Meri, yu garra wori detmatj blanga dijan lilboi. Det wori garra jidan jis laiga shapwan naif weya kadim yu insaid langa yu hat.” Lagijat na det olmen bin tok.

³⁶Wal wan olgamen neim Ena bin deya langa det Serramoni Pleis du. Imbin speshalwan mesinja blanga God brom Esha klen, en im dedi bin neim Fenyuwel. En wen det olgamen bin yanggel, imbin merrit. Bat afta 7 yiya imbin jidan widogel. En imbin brabli olgamen na. Imbin 84 yiya ol.

³⁷En imbin oldei jidanbat deya langa det Serramoni Pleis, en imbin oldei weship langa God deitaim en naitaim, en imbin oldei tok langa God, en im nomo bin oldei abum daga wen imbin bisi toktok langa God.

³⁸Wal det olgamen bin kaman deya langa det pleis seimtaim wen det lilboi bin deya, en imbin sabi det lilboi, en imbin gibit theingks langa God, en imbin dalimbat ebribodi deya blanga det lilboi. Imbin toktokbat blanga det lilboi langa ol detlot pipul deya hubin oldei weidabat blanga det rait taim wen God garra meigim ola pipul blanga im deya langa Jerusalem go fri.

³⁹Wal deibin binij dumbat ol detlot serramoni blanga det lilboi weya det lowa blanga God bin tok dei garra dum, en afta Josef en Meri en det lilboi bin gobek langa Nesareth deya langa Gelali, en deya na deibin jidan langa olabat ron kemp.

⁴⁰Wal det lilboi bin growap deya na, en imbin strongbala, en imbin brabli klebabala du, en God bin brabli gudbinji langa im.

⁴¹Wal ebriyiya det dedi en mami blanga Jisas bin oldei go langa Jerusalem blanga det bigwan serramoni gulum Pasoba,