Luk 23:5-43

⁵Arile, iri sarakau anya, “Iy mene leheya ma amekes ndrokowa iri lau badu loboho Judiya bado mwasin bwe. Iy mene amekes kandriyen doh, udu ndra Galili on, eme taku dah.”

⁶Eme Pailat anuhun sahou nane iri asehek ano iy ndremenya iri anya, “Iy badu Galili handru?”

⁷Ya eme Pailat akohok tanan amwenen ta kon ta Jises. Kon ta Jises badeh, udu baha tondrok ta Herot, eme iy suni Jises ili hawe Herot. Tasah, na len doh badeh, Herot udu Jerusalem ale.

⁸Eme Herot atou Jises badeh, iy sekesek handru, tasah iy ndra mwena mwena ndra-au badeh, aseken ta atou Jises labai. Iy mene anuhun le nyalan, eme na dah, iy anya kanyolom Jises kamekes kalem.

⁹Iy ndremenya Jises san solo-an solo-an, arile Jises andru-uk le.

¹⁰Eme iri lau tinan tiri pris, hawe iri lau ta leheya kandriyen tiri Juwis adek ame mirihik asehek sahou boto-on i bada Jises.

¹¹Ano Herot hawe oro lau ta bahun tan bobose iy, ma atehei kolau moroyan i la-un, ma suni iy i hamon hawe Pailat ja.

¹²Na len bwena ndra-au, Herot uru Pailat badeh, ndrokowa uru udu aliy, arile na le len dah, badeh, uru ndra kawas ja.

¹³Ano Pailat luhi iri lau hawe iri tinan tiri pris, ma hawe iri lau ta atondrok, hawe iri mari, ame.

¹⁴Ya eme iy tiye i tiri anya, “Ado tiyani ndramak dah eme, ado anya iy badeh, amekes bolo ndrokowa iri lau andra-i. Udu mada ado nane ndra-au badeh, jo batakalahei ari lakou ndramak dah, amekes andra-i, i buku none ado mene asehek, bwe.

¹⁵Ma Herot ale batakalahei ari lakou iy amekes andra-i bwe le. Ya eme ado anyolom, iy suni iy eme hamon ja dah. Iy winiyan bamak laleyah bwe, tasah iy bamesekei ari lakou bandra-i bwe.

¹⁶Ya eme, idah kameh jo tiye iri lau ta bahun tek amekes isi i badan, ano iy bara-au.”

¹⁸Arile, iri mari sarakau i le rasan anya, “Kadai iy, kadai iy! Ya karuwani Barabas keme hawe ahi!”

¹⁹Barabas in bolo kou mene badeh, iy ta amekes bahun udu bolo kon tinan, ma hawe idi ndramak amak.

²⁰Eme Pailat tiye i toro ja anya, “Katolowei Jises ki-iu ai?”

²¹Arile, iri aloh ma sarakau anya ja, “Katahi iy ki bada kei tondreh! Katahi iy ki bada kei tondreh!”

²²Ano i san tulusin ja iy tiye: “Buku sah handru, saba lakou ndra-in handru iy mesekei? Ndramak dah bamesekei se ari lakou bandra-i bwe, ya iy kimek laleyah ai? Eme idah kameh oro lau ta bahun tek ubwi iy ano iy bara-au.”

²³Arile, iri arah ma tiye sahou boto-on anya, “Katahi iy ki bada kei tondreh!” Eme ma abadok i tiri ai.

²⁴Eme Pailat in hamon ta boho iri ma tiye ta Jises badeh, kadai iy.

²⁵Ya eme iy ruwani Barabas mene amekes bahun udu kon tinan, ma idi ndramak badeh, udu bolo kou eme len. Ano iy atehei Jises ili mine iri, ma iri amekes sasah na seken tiri ai.

²⁶Eme iri lau ta bahun badu Rom sirini Jises ili le badeh, iri ndruni ndramak ari nyaran Saimon badu kon Sairini. Iy edek udu kon munyak tinan eme. Eme iri tawi iy, atehei kei tondreh i kasen ma iy bwese udu hamon ta Jises.

²⁷Na bolo len doh badeh, iri lau mwan ma badih solo-an solo-an labai adek an hamon ta Jises. Ma hawe iri badih solo-an aden ma taya ndranye Jises.

²⁸Eme Jises tubuni iy ma tiye i toro anya, “Ado badih badu Jerusalem, ado saden ndranyek; ado kaden ndranye ado le, hawe nadu ado oro.

²⁹Tasah, udu bolo maha-an doh, eme kameh iri tiye anya, ‘Iri badih kis, hawe iri badih bato-ou nah bwe, hawe iri badih ta asus nah bwe kameh ado mwasin ja tiri ala nah udu aliy.’

³⁰Tasah, na bolo len hamon doh kameh iri lau badu Israel tiye i tiri mandrei anya, ‘Ado katohou kame bwele-e aso!’ Ma hawe tiye i ta bwilin ndrondro-ou anya, ‘Ado tubuluhi aso ma katone aso ta lakou ndra-in doh!’

³¹Iri kameh amekes lakou doh, eme badak. Ya jo kameh i buku kei nyamanyak. Ya i buku none len ndra-in handru keme kameh, ado kameh i buku kei sana-an.”

³²Eme uru lau la-uh ndra-in ta tebelese badeh, sariye uru ala ta adeu uru ala bada kei tondreh ale.

³³Eme iri asos kon aloh, “Bwisi bar ta ndramak.” Eme iri atahi Jises i bada kei tondreh. Ma hawe atahi uru lau ma la-uh nane ale. Eme, iy ari udu loboho lim salin ta Jises, ya ari badeh, udu loboho lim kamweu.

³⁴Eme Jises tiye anya, “Tama, ou mani kandriyen ndra-in toro, tasah oro bala tana oro sasah oro amekes dah bwe.” Eme oro lau ta bahun atehei kolau tan i andri, ma oro amekes laki ta aliy, ta andrei kolau tan i le winiya oro.

³⁵Iri lau mari badeh, anyolom Jises, ya iri lau ta atondrok badu Juwis badeh, bobose iy anya, “Iy badeh, aseben iri lau rayah oh; ya abo, i buku none iy anya iy Krais handru, Kindrei suni iy; kanone iy kasebenei iy le amwenen se.”

³⁶Eme ya iri lau ta bahun ame bobose iy ale. Ma iri adeu waen titi-in i tan,

³⁷ma iri anya, “Buku none ou kabin tiri Juwis handru eh, ou none sebenei ou le se!”

³⁸Ya sahou tanan ari badeh, torowenei udu bwele-e batu Jises tiye i buku doh: “Idah Kabin tiri Juwis”

³⁹Eme ndramak ndra-in ari udu ta kei tondreh mirihik tan nane asehek sahou ndra-in i ta Jises anya, “Ou kede-eh Krais, bwe nadeh? Ou sebenei ou, ma hawe aru ah!”

⁴⁰Arile, ndramak ari udu bilisiu badeh, ibolosen i tan anya, “Ou kede-eh, banoh Kindrei bwe nadeh? Ou badeh, bwese maha-an i le buku iy kede-eh!

⁴¹Talu bwese maha-an dah, amwenen ai, ta lakou talu amekes, arile iy badeh, bamekes se ari lakou bandra-i bwe.”

⁴²Ano iy tiye i ta Jises anya, “Jises, i buku none ou ame hamon, ma boto-on tam atondrok kon mari, ou samani jo.”

⁴³Eme Jises tiye i tan, “Jo katiye tam kamwenen handru en, na le dah kameh, ou ado hawek ado kon mwasin udu kandrah.”