Luke 23:5-43

⁵Machane miyad towasor ngak nike gel merin ni be lungurad, “Machib rok e be k’aring e wagey u fithik’ e girdi’. I tabab u lan yu Galile, me yan u lan yu Judea ni polo’, ma ke taw ngaray e chiney.”

⁶Ma fa’ani rung’ag Pilate e re bugithin ney me fith ni ga’ar, “Be’ u Galile e re mo’on ney?”

⁷Ma fa’ani nang ni yib Jesus ko gin ni ba’aram e nug ni Herod e be yog e thin riy, me pi’ Jesus nge yan ngak Herod, ni ku bay u rom u Jerusalem e ngiyal’nem.

⁸Ma fa’ani guy Herod Jesus me ri felfelan’, ya ke rung’ag murung’agen ma ke n’uw nap’an ni i finey ni manga yigi guy; ya i finey ni manga yigi ngongliy Jesus e maang’ang nge guy.

⁹Ma aram me fith Herod bo’or ban’en ngak Jesus, machane de fulweg Jesus ta’ab bug riy.

¹⁰Fapi tolang ko prist nge pi tamchib ko Motochiyel e ra thaygad ngam’on ngrogned e thin nib gel nib togopluw ngak Jesus.

¹¹Me par Herod nge pi salthaw rok ngu’ur moninggad ngak Jesus miyad be darifannag. Miyad yin’ ba mad nib n’uw ma bfel’ nga daken miyad pi’ ngan fulweg ngak Pilate.

¹²Ka rofen nem me tafager Herod nge Pilate; ma kafram e ur pirew ndaburow dakenrow.

¹³Me ulunguy Pilate e pi tolang ko prist nge pi’in yad be yog e thin ko girdi’, nge girdi’

¹⁴me ga’ar ngorad, “Kam feked e re mo’on ney i yib ngog, ma kamogned ni be yog e tin ni gathi ir ngak e girdi’. Me ere chiney e kug fith u roy u p’eowchemed, ma dawor gu pir’eg nib buch e rok ko pin’en nib kireb ni gimed be yog nib togopluw ngak.”

¹⁵Ma ku de pir’eg Herod nib buch e rok, aram fan nike fulweg ngodad. Dariy ban’en nike ngongliy e re mo’on ney nike yib tapgin ni ngan thang e fan rok.

¹⁶Bay gu pi’ ngan toy, nge mu’ min pag.”

¹⁸Ma fapi girdi’ ni aram urngirad e ra tolulgad ni be lungurad, “Mu li’ ngem’! Ma ga pag Barabbas!” (

¹⁹Me Barabbas e nin’ nga kalbus ni bochan ba wagey ntay u lan binaw, ma ku bochan e pogofan ni thang.)

²⁰Me Pilate e ba’adag ni nge pag Jesus, ma aram me yog fare bugithin ni ka’a yog bayay ngak fapi girdi’ ni aram urngirad nri ba ga’ laman.

²¹Machane miyad fulweg ngak u fithik’ e tolul ni be lungurad, “Mu richibiy ko kuruth! Mu richibiy ko kuruth!”

²²Me yog Pilate ngorad ko yay ni gaman e dalip ngay ni ga’ar, “Be mang oloboch e ke ngongliy nrib kireb? Dawor gu pir’eg ban’en nike ngongliy ni nge mang tapgin ni ngan thang e fan rok! Ere bay gu pi’ ngan toy nge mu’ min pag.”

²³Machane miyad par ni yad be tolulnag ngak nike musmus mam’ungun i lamrad ni be lungurad ngan richibiy Jesus ko kuruth; me munmun me mang e tin ni yad be tolulnag e ni fanay.

²⁴Ma aram me turguy Pilate e n’en ni ngan rin’ ngak Jesus ni bod rogon ni be tolulnag fapi girdi’ ni aram urngin.

²⁵Me pag fare mo’on ni ba’adag fapi girdi’ ni ngan pag, ni fa’anem nnin’ nga kalbus ni bochan fare wagey nge pogofan ni thang, me pi’ Jesus ngorad ngar rin’ed ngak e n’en ni yad be finey.

²⁶Miyad fek Jesus i yan. Ma nap’an ni yad be yan miyad mada’nag be’ nib mo’on ni Simon fithingan, ni be’ u Cyrene, ni be yib u ted i yib ngalan binaw. Miyad kol ngar ted fare kuruth nga daken pon nge fek ngi i lek Jesus.

²⁷Ma bo’or ni bo’or e girdi’ ni lek Jesus; ni bay boch e ppin u fithik’rad ni yad be yornag ni be yan lamrad ngalang.

²⁸Me changar Jesus ngorad nga tomur me ga’ar ngorad, “Ppin nu Jerusalem! Dab mu yor niged gag, ya ngam yor niged gimed nge pifakmed.

²⁹Ya bayi taw nga boch e rran ni bayi ga’ar e girdi’, ‘Rib fel’wa’athan e pi’in ni ppin ndar diyen gad, ma dar gargel niged e bitir, ma dar tathuth niged e bitir!’

³⁰Ireram e re ngiyal’ i n’en ni bayi ga’ar e girdi’ ngak e burey, ‘Mmuchubu’ nga dakenmad!’ me lungurad ko burey nib sobut’, ‘Mmithagmad!’

³¹Ya fa’anra ireray rogon e pin’en ni kan ngongliy ko ngiyal’ ni kab kak’ling e gek’iy riy, me ere ra yan i di’in ko ngiyal’ i n’en nike l’ud?”

³²Ma kur feked l’agruw ni’ ni kar th’abew e motochiyel ni ngan chagiyrow ngak Jesus ngan thang e fan rorad.

³³Ma fa’anra tawgad ko fare gin’en nu “Lo’” fithingan, miyad richibiy Jesus ko kuruth u rom, nge fa gali cha’nem ni kar th’abew e motochiyel, ni bagayow nga ba’ ni mat’aw rok ma bagayow nga ba’ ni gilay’ rok.

³⁴Me ga’ar Jesus, “Chitamag, mu n’ag fan u wun’um e n’en ni yad be rin’! Ya dar nanged e n’en ni yad be rin’.” Miyad f’oth e mad rok rorad, ni yad be girngiy e pow ni nge duwgiliy e bin ni nge fanay bagayad.

³⁵Me sak’iy e girdi’ ko gin’em ngu’ur yaliyed, ma pi’in yad ma yog e thin rok piyu Israel e ur moninggad ngak ni be lungurad, “Ke ayuweg e pogofan rok boch e girdi’; ere bayi ayuweg e birok’ e pogofan, ni fa’anra ir fare Messiah ni Got e ke turguy!”

³⁶Ma ku errogon fapi salthaw ni ur moning niged; ya rabad ra pi’ed e wayin ngak nib sobut’ puluwon,

³⁷me lungurad, “Fa’anra gur e pilung nu Israel, me ere mu ayuweg e birom e pogofan!”

³⁸Ma pi thin ni ba’aray e ir e kan yoloy ngabangi ban’en kan richibiy ko kuruth u puluwon lolugen ngalang ni ga’ar: “Ireray fa’anem ni pilung rok yu Israel.”

³⁹Ma bagayow fa gali cha’ nra th’abew e motochiyel kan kuruth nagrow e yog e thin nib kireb ngak ni ga’ar, “Gathi gur fare Messiah? Ere mu ayuweg e birom e pogofan nge pogofan romow!”

⁴⁰Machane bagayow e puwan’ ngak fa’anem ni yow ni ga’ar, “Mog, damur tamdag ngak Got? Ya gadad gubin ni ta’reb rogon e gechig rodad ni kan pi’.

⁴¹Machane gechig rodow e bmat’aw ni kan pi’ ngodow, ya ba’ tapgin ni ngan pi’ ngodow ni bochan e tin nib kireb ni kad rin’ew; me ir e dariy ban’en nib kireb nike rin’.”

⁴²Me ga’ar ngak Jesus, “Ri ga ra leam nigeg ko ngiyal’ ni ga ra yib ni gur e kam mang pilung!”

⁴³Me ga’ar Jesus ngak, “Nggog ngom, ni daba’ e ga bay rog u tafen e fla’ab.”