Luku 23:5-43

⁵Koto leekepate mo wanda꞉halima꞉ta꞉ ota꞉ honkopu hao hata꞉ alota꞉ Ta hali ipika꞉ wala꞉la꞉ pima꞉ta꞉ mo Diudia da yu paeyao pa꞉ta꞉ hala꞉ wanda꞉hali hoke hone mea wiatia pomina꞉la꞉me. Ipikana꞉ma꞉ta꞉ mo Ka꞉lili nane kini pea a꞉paata꞉ ameta꞉ do opolo a꞉pa꞉la꞉ handa꞉e lemekeme.

⁶Pailedima꞉ koto lemekeeki opua mo wanda꞉hali pa꞉ta꞉ lota꞉ pitolo alota꞉ Do halita꞉ Ka꞉lili hali ya꞉ka꞉ta꞉pe leekeme.

⁷Koto laata꞉ Pailedima꞉ Yesuta꞉ Hetodima꞉ handeteke hayeke da yu nane yama꞉ a꞉pa pia꞉ka꞉ta꞉me laa handa꞉ wiaata꞉ Yesuta꞉ Hetodi pa꞉ta꞉ tapaeyekeme. Ekipeke koto natena꞉ta꞉ Hetodita꞉ Diutuseleme da nane a꞉pa hayeke handa piekeme.

⁸Hetodima꞉ta꞉ Yesu hando haota꞉ ta꞉na꞉ tiekema꞉ homeekeme. Pa ekipeke. Hetodima꞉ta꞉ mo Yesuma꞉ pieke ekimanu opu haota꞉ Yesu handulueke laa nate hokuluna꞉ yu wia hatia peekeme. Ipikana꞉ma꞉ta꞉ Yesuma꞉ na handeke hau ma꞉nda꞉ pina꞉e hone wia hayekeme.

⁹Koto ekina꞉ Hetodima꞉ Yesu pa꞉ta꞉ anemone lota꞉ pita꞉la꞉ ekimanu wotu lota꞉ piekepate Yesuma꞉ hombo peaasa꞉eki ma꞉nda꞉ ota꞉ na piekeme.

¹⁰Kutupa mo yeni peao haemeke you haliweki make mo Lo Pi walo haemeke haliweki paeyao teke pa꞉ta꞉ leke a꞉pa honkopu tieke haaso hata꞉ Yesu pa꞉ta꞉ ma̱leke limikime.

¹¹Kutupa Hetodi make ipika꞉ a꞉ndeli minimiki haliweki ame̱le̱ Yesu eto eto lao pa ale au laemekeme. Kutupa ota꞉ epeke au leke dau hokulu mea yamao paa Pailedi pa꞉ta꞉ tapaa moneayekeme.

¹²Amba꞉ta꞉ Hetodi pita꞉ Pailedi yaapota꞉ a꞉nda꞉ tunkula alu pea haepekepate koto natena꞉ta꞉ ta꞉ma꞉ni pipikime.

¹³Pailedima꞉ mo yeni peao haemeke you haliwekima꞉ make tondiki haliwekima꞉ make mo wanda꞉hali

¹⁴paeyao pa꞉ta꞉ alota꞉ Ikana꞉ma꞉ I̱ pa꞉ta꞉ do hali hatuku ipuluta꞉ ipikana꞉ma꞉ wanda꞉hali hatuku pu hoeyaasa꞉me lemepate ameta꞉ I̱ma꞉ ipikita꞉ ika꞉ leke popelekena꞉ teke weitolopate ipikana꞉ma꞉ mo mandane pimanu yamba꞉la꞉me laa ma̱leke limipate homeke a꞉nda꞉ yamba꞉la꞉la꞉eki na handolome.

¹⁵Kutupa Hetodima꞉ make do halima꞉ pu hoeyaala꞉ hau homeke a꞉nda꞉ na handolo hata꞉ niki teke pa꞉ta꞉ pa do tapaala꞉ handa꞉e. Ipiki lia homamonota꞉ hoke hau ma꞉nda꞉ na pa꞉la꞉me.

¹⁶Koto ekina꞉ta꞉ I̱ma꞉ ipikita꞉ dopitama꞉ yombina꞉ laa pao pena꞉ lolueke leekeme.

¹⁸Mo mombelemeke wanda꞉halima꞉ e̱ wi tieke alo hata꞉ alota꞉ Yesuta꞉ homena꞉ liae. Mo Batabasita꞉ pena꞉ tapawae lemekeme.

¹⁹Koto Batabasita꞉ dipula pitieke ekita꞉ ipikana꞉ma꞉ mo daoni pa꞉ta꞉ kapomani ame̱le̱ a꞉nda꞉ lia make mandane wanda꞉hali lieke ekina꞉ piekeme.

²⁰Pailedina꞉ honema꞉ta꞉ Yesu tapaaluekema꞉ yeke mo wanda꞉hali pa꞉ta꞉ paa opolo peekeme.

²¹Kutu piekepate mo wanda꞉halima꞉ paa pi tanda pu alualu pitolo alota꞉ A꞉ka꞉tei wape piki tina꞉ homena꞉e. A꞉ka꞉tei wape piki tina꞉ homena꞉e lemekeme.

²²Pailedima꞉ paa hoto tepo peao alo alota꞉ Koto pa꞉la꞉pate ipikana꞉ma꞉ ekipiki pi ata꞉ka꞉ peala꞉pe. I̱ma꞉ta꞉ ipikana꞉ma꞉ homa꞉peke hau ma꞉nda꞉ na pa꞉la꞉ ekina꞉ ipikita꞉ pa dopitama꞉ yombina꞉ laa paa tapalueke leekeme.

²³Koto leekepate mo wanda꞉halima꞉ta꞉ poya꞉ tieke wotu alo hata꞉ Yesuta꞉ ota꞉ a꞉ka꞉tei wape piki tina꞉ endina꞉ laa lemeke e̱ wi ota꞉ yaeyekeme.

²⁴Koto ekina꞉ Pailedima꞉ Yesu homena꞉e lemekeeki telia piekeme.

²⁵Ipikana꞉ma꞉ mo wanda꞉halima꞉ pena꞉e lemeke halita꞉ pena꞉ tapaeyekeme. Mo hande kapomani pa꞉ta꞉ a꞉nda꞉ lia make mandane wanda꞉hali lieke some kone pena꞉ tapaeyekeme. Kutupa Yesuta꞉ mo wanda꞉halima꞉ ika꞉ hone pa꞉la꞉eki pina꞉yeke hala꞉ moneayekeme.

²⁶Mo hande dolo miniki haemeke haliwekima꞉ta꞉ Yesu hatuku pulu haena꞉ta꞉ Saitini da hali ma꞉nda꞉ Saimono manda꞉hande pimikime. Ipikita꞉ mo kenke honiki nane hao oni daoni tieke aneke pa꞉ta꞉ opolo ipulu haena꞉ pimikime. Mo dolo miniki haemeke haliwekima꞉ta꞉ Saimono yola꞉ meata꞉ mo Yesuna꞉ a꞉ka꞉tei wape piki ti mea tiawao Yesuna꞉ hoki nane telia꞉ mea epena꞉ lemekeme.

²⁷Wanda꞉hali tiekema꞉ Yesu telia꞉ mea pemekeme. Koto wanda꞉hali ame̱le̱ta꞉ mandane wanda꞉ sunuta꞉ puki yoka hata꞉ Yesuna꞉ e̱ wopu lemekeme.

²⁸Koto ekina꞉ Yesuma꞉ la꞉ka꞉la꞉ moneaaso hata꞉ alota꞉ Diutuseleme da wanda꞉sunuo. I̱na꞉ e̱ na leketa꞉ ika꞉ kone make ika꞉ wekiwandikina꞉ e̱ lapa꞉peke.

²⁹Pa ekipeke mo wetepena꞉ ipula꞉ nate ma꞉nda꞉ nina꞉ta꞉ ikana꞉ma꞉ dupiki pi lelimikie. Mo kenohali wanda꞉weki make hololuku hake piki wanda꞉weki make andu liki na sinkipa꞉la꞉ wanda꞉weki pa꞉ta꞉ta꞉ ta꞉na꞉ma꞉ homelememe lelimikie.

³⁰Koto natena꞉ta꞉ wanda꞉halima꞉ oli potemanu pa꞉ta꞉ta꞉ Niki manda lopa꞉e laata꞉ mo yu elimanu pa꞉ta꞉ta꞉ Niki mea a꞉mbae lelimikie.

³¹Pa ekipeke dupiki haumanu a꞉nda꞉ pilia꞉ta꞉ mo hande ti a꞉nda꞉ taniso̱ kiki pina꞉ pia꞉ka꞉na꞉ta꞉ kota꞉ hapina꞉ta꞉ eki pilia꞉pe leekeme.

³²Hali yaapo ma꞉nda꞉ ipilikita꞉ hoke hau pipiki some yaapo make Yesu ame̱le̱ mandakena꞉ lu endialuekema꞉ yeke hatuku pemekeme.

³³Kutupa mo hande haliwekita꞉ mo yueli ma꞉nda꞉ wiekeeki ipika꞉ bikita꞉ Hali You Holiki lemeke alena꞉ a꞉pa ikana꞉ma꞉ Yesu a꞉ka꞉tei wape piki tina꞉ lu endiaemekeme. Kutupa mo hande hoke hau pipiki some yaapo make homeke tupa꞉ lu endiaemekeme. Ma꞉nda꞉ta꞉ Yesuna꞉ popeke nane kikina꞉ endiao ma꞉nda꞉ta꞉ hoe nane kikina꞉ endiaemekeme.

³⁴Yesuma꞉ alota꞉ Apa꞉o. Do wanda꞉halima꞉ piteleme hauta꞉ iki hone na witolo pitelemema꞉ nakana꞉ma꞉ pa paeyawapeke leekeme. Kutupa mo dolo miniki haliwekima꞉ta꞉ Yesuna꞉ daumanu telipaaluekema꞉ kase tupa꞉ telepo laemekeme.

³⁵Mo wanda꞉halima꞉ handolo haena꞉ mo Diu wanda꞉halina꞉ you haliwekima꞉ Yesu kitaaso hata꞉ dupa lemekeme. Mandane wanda꞉halita꞉ pa꞉ta꞉la꞉tiki piekepate ipikita꞉ hande Koda꞉ma꞉ ma̱leke lila꞉ Ketiso haya꞉ka꞉na꞉ta꞉ kota꞉ ipika꞉ kone petelena꞉e lemekeme.

³⁶Mo a꞉ndeli dolo miniki haemeke haliwekima꞉ make Yesu makeaaso hata꞉ ipiki pa꞉ta꞉ a꞉pa hoke waini ikali halolo hata꞉

³⁷alota꞉ Neketa꞉ hande Diu wanda꞉halina꞉ Kini hali ya꞉ka꞉na꞉ta꞉ kota꞉ naka꞉ kone pa꞉ta꞉la꞉e lemekeme.

³⁸Kutupa Yesuna꞉ amboke mandata꞉ dupa laemekeme. Dota꞉ Diu Wanda꞉halina꞉ Kinie Halie laa wape pea endiaemekeme.

³⁹Mo hande pi yambeleeke some ma꞉nda꞉ma꞉ tetopiki pimanu la꞉ moneaso alota꞉ Neketa꞉ hande Ketiso dia꞉ya꞉ka꞉ta꞉pe. Neke make diki make pa꞉ta꞉la꞉taa leekeme.

⁴⁰Koto leekepate mo hande pi yambeleeke some ma꞉nda꞉ma꞉ mo some kake nalo hata꞉ alota꞉ Kutupiki pi na lapee laata꞉ Neketa꞉ Koda꞉ paala꞉ na pa꞉la꞉pe. Neke make ipikana꞉ma꞉ mina꞉la꞉ tanda kone mineleme.

⁴¹Dikita꞉ dika꞉ pupa꞉ ekina꞉ yenki ana꞉na꞉ minolopa꞉pate ipiki homeke hau ma꞉nda꞉ na pa꞉la꞉me laa

⁴²mo halima꞉ Yesu pa꞉ta꞉ alota꞉ Yesuo. Neke Kini hali ipilipi dina꞉ta꞉ I̱ hone wia꞉peke leekeme.

⁴³Kutupa Yesuma꞉ ipiki pa꞉ta꞉ alota꞉ I̱ma꞉ neke pa꞉ta꞉ ota꞉ pi la꞉ witolome. Ame do natena꞉ kone I̱ yaapo oli Pa꞉ta꞉daisi nane mandakena꞉ halupeke leekeme.