Luk 1:45-50

⁴⁵En yu garra jidan gudbinji du, dumaji yubin bilib langa God, en ebrijing weya imbin dalim yu garra hepin truwan.” Lagijat na det olgamen bin tok.

⁴⁶Wal Meri bin tok na, “Mi preisimbat God det brabliwan Bos,

⁴⁷en mi brabli gudbinji langa im, dumaji im na bin seibum mi.

⁴⁸Nomeda mi nomo haibala gel, bat stil God bin jinggabat mi. Nomeda mi oni wekingel blanga im, bat stil imbin pikimat mi, en brom tudei na ola pipul ebriweya garra gulum mi Blesidwan.

⁴⁹Dei garra tok lagijat dumaji God bin dum loda gudbala ting blanga mi. God im brabli haibala, en im garram loda pawa. Im na det brabli Holiwan,

⁵⁰en im brabli kainbala langa ol detlot pipul brom ebri jinareishan hu rispek im.