Luk 10:2-24

²Pe ipwai iya kili hu, ipa, “Anandrinai soyon iya, ara hu kaniman pwen hutora piyang, hapeko hu ndramat para poya mbulen, ara noye ko. Pwen pe akatohun kiya kili Yapan mepo mbukena piyang, para kipwandrisa hu ndramat para poya mbulen para hu kayapo mbulen kaya nondriya pingen.

³Akaya! Yo nakupwandrisa wawu tehe hu noru sipsip, para akaya mwalinga hu mwiy puyap.

⁴Pe wawu mbuna akasap ndropwa sombule pat, ndre ndrop, ndre hu hatna pwelekai. Pe wawu mbuna akarawulohani hamou kiho sai.

⁵Pe kapa wawu kasong kaya nondriya seu hawum, pwen wawu kapwai kimu, akapa, ‘Ndriya wayis, ara kiro polo wawu topo seu iye.’

⁶Pe kapa ndramat para ndriya wayis kiro seu ara, ara andre ndriya wayis kiro polo yiy, pe kapa pwi, andre nongna wawu kimui kisa kili wawu.

⁷Akoro ndron seu ara ko, pe akayan sehe anandrinai, ndre akayin sehe ndran mepo hu nakahang wawu, paratesah, ndramat ngara kipo mbulen, ara andre kiwiri kennen. Pe wawu mbuna akangas seu hawum kiya hawum.

⁸Pe kapa wawu kaya nondriya kol hakol ngawan, pe hu karawulohani wawu, pwen sehe anandrinai hu kasaikiy kisa kili wawu, ara akayan opu.

⁹Pe akasopwoyani mwamwa tahu ndramat humwa hutora ara, pe akapwai kiya kili hu, akapa, ‘Kolo King Ngindrai, ara kinsa pakeh kili wawu.’

¹⁰Hapeko kapa wawu kaya kol hakol ngawan pe hu kantawulohani wawu pwi, ara akaya kene payango sai tahu pe akapa,

¹¹‘Kohu pwan para kolo wawu mepo ipai iripo polndrika yowu, ara yowu topo tolohaniy pe wawu andre kawiri koran. Hapeko akalohonganiy kiya hiyan: kolo King Ngindrai ara kinsa pakeh kili wawu.’

¹²Yo upwai isa kili wawu, kiro mwonen lang para tamwaniye, kora kol ara, ara andre kiramwaitini koran nopwaran para kol Sotom.

¹³O wawu para Korasin! O wawu para Petsaita! Toimwa wawu. Nopwaran namandran ita ndrita wawu. Kapa ndramat hamou kinna kol malkol Tayar pe Siton, pe kinmbusi hu ndraikiya pwoke kiro aliy, tehe kintayah kinsa kili wawu pwen, ara andre hu kantapaiwani ndriyahu pwen ndrukoluw kinna, pe andre hu kansuluye hu kanna koyau para koisirai, pe andre hu kantumwi hu kanna palam i.

¹⁴Hapeko kiro mwonen lang para tamwaniye, koran nopwaran wawu nakakuniy, ara andre kiramwaitini kora nopwaran tahu para Tayar pe Siton.

¹⁵Pe wawu para Kapernawum, wawu pakasikiye wawu kaya paingan yang, ndre? Pwi yoh! Wawu andre kaya pwan masih ndrohonoku hu ndramat kanmat.

¹⁶Sehe ndramat kihilingi wawu ara ihilingi yo yi, pe sehe ndramat mbuwalin ta wawu, ara mbuwalin to yi; pe hiyeh mbuwalin to, ara mbuwalin ta hiyeh ipwandrisa yo usa iyapolo pwoke nopwaran.”

¹⁷Yihu ndramat andrtingui pe lumou ara humui huyapolo pwesai, pe hupa, “Yapan, yowu pohowe ngalam, pe hu payit ara huhulingiy pe huho ndruwa nongna yowu.”

¹⁸Pwen pe Yesu isomwi hu, ipa, “Yo unime Sinai iyos iro kol paingan yang isa pwan tehe kamit.

¹⁹Yo ara kunuiki pwoke nopwaran iya, kinsa kili wawu pwen, para wawu andre kangastoro pe karahatuwe hu mwat pe hu supwalngai, pe andre wawu karamwaitini pwoke masih ata Sinai; pe andre hapesah mwomwan kintayah kili wawu pwi yoh.

²⁰Pwen wawu mbuna akapwes kata hu payit huhulingi wawu, hapeko wawu kapwes tehe ngala wawu, ara Ngindrai kinratuluwiy pwen ita kol paingan yang.”

²¹Iro mwonen lang ara Mwoiwan Haiyan iyki pwesai namandran ipep ndriya Yesu, pe Yesu ipa, “Tomo, Yapane kol pwan pe kol paingan yang, yo uhuri ngalam, paratesah, wou ankulani hu melit aro kinna kili hu ndramat mepo lohongahu iman pe hupahas iya lohongai, hapeko aniyki hu melit kansa yelan ngawan kinna kili hu mbunah mendreheh. Ehe, Tomo, anmbusiy tehen tora, ara iho ndruwa namiliwam opu.

²²Melit masih, Tomo kiniyki hu topwei kansa kili yo. Pe hamou tanan ta Norun pwi, Taman opu tanan ta norun. Pe hamou tanan ta Taman pwi, Norun opu tanan ta Taman. Pe hu mepo Norun inamiliy para kiyingani Taman kiya yelan kili hu, ara yihu ara ko, hupahasani yiy.”

²³Pwen Yesu ipaiwani yiy iya kili ndramiran hu, pe iwong nokule ko, ipa, “Yihu mepo hunime tesah wawu topo nimei, ara lomwes ita kili hu.

²⁴Yo upwai isa kili wawu tehe hu poropet soyon pe hu king para koluw, ara hunamiliy para hu kanime tesah mepo wawu topo nimei, hapeko hu kannimei pwi. Pe yihu pakahalingi tesah mepo wawu topo hilingiy, hapeko yihu kanhilingiy pwi.”