Lucangundru 10:2-24

²Nau tanangu jatana wonti: “Kampananto marapu parai, ja ngankanietja windri ngalje; jendrania Kampani Kaparani ngatjianau, Nulia ngankanietja worana jinpananto nunkani kampanaia.

³Wapanau! mai, ngato jurana jinpai tjipi kuparu jeribaka pandipandi mandrani.

⁴Wata billi, wata pailtji, ja wata tidnaputa mandranau; ja bakana wata kulnuni mandurini jaura jinkianau.

⁵Mina pungani jura wirila nganai, ngopera jatanau; “Murla nunkangupini pungani nganaiatimai!”

⁶Ja naka murlaia kupa ngananani, jurani mura nunkangu wokarala nganai; ja pani, nau jurangu tikala nganai.

⁷Nunkangupini pungani ngamanimai; tajianimai ja tapanimai mina tanali ngamalkai; ngangau ngankanietjani talku nganai nunkani kalala; wata punga kulnundru punga nguruja wapanau.

⁸Ja mina ngurani jura wirila nganai, ja tanali jurana patanani, naka tajianimai mina tanali jurangu kurai.

⁹Ja nunkangupini ngurani kana muntja tepi ngankanau, ja tanangu jatanau: Godaia milila jurangu karakara wokarala wapaia.

¹⁰Mina ngurani jura wirila nganai, ja tanali jurana wata patanani, tanani paltuni dunkaniniai ja jatanimai:

¹¹Bakana nina puturu, nau jurani ngurandru ngaianangu tidnani parai, ngaiani jurangu kantikantiai; windri jania ngujanianau, jurangu Godaia milila karakara wokarala wapaia.

¹²Ngani jurangu jatai: Sodom mitalali kalala morla waka manila nganai kalala ditjini nunkangupini ngurani.

¹³Jakajai jinkangu Choraziniai! Jakajai jinkangu Bethsaidajai! Ngangau Tyrus ja Sidon ngurani jenia pirnala pantjinani, judlangu pantjinala, pudla nurujeli kati murumurunto ja turuputani madlentjandru karitjinanto.

¹⁴Tyrus ja Sidon mitalali kalala morla waka manila nganai kalala ditjini, judlangu.

¹⁵Ja jidni Kapernaum, jidni miririna pariwilpaia, turujelu jidni ngarila nganai!

¹⁶Warle jurana ngarai, nulu ngana ngarai; ja warle jurana worarai, nulu ngana worarai; ja warle ngana worarai, nulu ninaia worarai, Nulia ngana jinpanala.”

¹⁷Tana marapratjana pota mara wora ja mandru niankinali tikana wonti ja jatana wonti: “Kaparajai, bakana kutji wora ngaianingu jinkani talani wodatarana ngamana warai.”

¹⁸Nau tanangu jatana wonti: “Ngato Satan talara praitji jeribaka pariwilpandru ngarinani najina warai.

¹⁹Mai, ngato jurangu ngurula jinkiai tjutjuni ja katni-nuntini nankana wirarinanto, ja talpalaia ngurulani pratjanani, ja tanali jurana wata jupala nganai.

²⁰Wata jendrangundruja mankianimai, jurangu kutji wora wadatarana ngamai, a-ai, jendrania mankianimai, ngangau tala jurani pariwilpani matja dakana parai.”

²¹Nunkangupini ditjini Jesus Jaolali mankina wonti ja jatana wonti: “Ngato Jidnana Ngaperiai, Kapara pariwilpaia ja mitaia, jurakokala wapaia; ngangau Jundru jenia kana kirini ja ngujamanietjani kutibana warai ja kupani tinkari ngankana warai; kau Ngaperiai, jeruja jinkangu manju nganana wonti.

²²Ngaperali ngakanali ngakangu warupoto jinkina wonti; ja wata kulnujeli ngujamai, worana Ngatamura nganai, windri Ngapili, ja worana Ngili nganai, windri Ngatamurajeli, ja woraugu Ngatamurajeli ngantjai jenia tinkari ngankala.”

²³Ja Nulu mili mudlakalkana wonti ja jatana wonti: “Murlali pirna tana milki, tanali najiai mina jura najiai!

²⁴Ngangau ngani jurangu jatai: Propheta ja mitaia kapara marapujeli wolkareli nganana wonti jenia najila mina jura najiai, ja wata najina wonti; ja jenia ngarala mina jura ngarai, ja wata ngarana wonti.”