LUCAS 23:31-49

³¹Porke belne zeree rlaa mén yagyaa, ¿pezee ylaaleg men yagbidx?

³²No zano men txup ngbaan chen ykaa men men lo kruz yra men Jesus.

³³Chene wdxiin men ledne la Berxtoo Mengut, wkaa men Jesus lo kruz no wkaa ke men yrup ngbaan guin lo kruz: te men wkaa lo kruz ne zob koo Ne ladbëë, le ste men wkaa lo kruz ne zob koo Ne ladbëg.

³⁴Chene le Ne ka lo kruz, re Ne: ―Dëde, gugun men perdon porke nandet men pe rlaa men. Le yra soldad wa pwest gan txu yganen xab Ne.

³⁵Le yra mén ndxin nga rwii, no axtegue xtis rzhidxno Ne, re men: ―Wselaa ménree ste mén; orrenaa yselaa men men laake men, belne nli laa men nak Crist ne wxaal Dëdyuzh.

³⁶Zenga ke rzhidxno soldad Ne, rbig soldad rdee soldad binaguer goo Ne.

³⁷Re soldad lo Ne: ―Belne laa de nak xerrey men-Israel, guselaa de laake de.

³⁸Lex wkaa men leter xtoo xekruz Ne kon diz-griego, kon diz-latín no le kon diz-hebreo, re leter guin: “Laa xerrey men-Israel nee.”

³⁹No te ngbaan ne ka lo kruz wninyaan lo Ne, re men: ―Belne laa de nak Crist, guselaa de laake de no guselaa noo yrup noo zeree.

⁴⁰Per wakndux ste mén guin lo men, re men: ―¿Pe rdxedet de Dëdyuzh, no laake kastig ke gwa kadee de?

⁴¹Laa be rzëël be ne kayak be sufrir, porke zeree rgyizh be ne wlaa be, per le ménree bet ne mal wlaadet men.

⁴²Lex re men lo Jesus: ―Jesus, ynileedxchee de noo chene ydxiin de ledne ynebééy de.

⁴³Wke Jesus, re Ne: ―Nligue yna noo lo de, ne nedxekeree tsuu de ledne nuu Dëdyuzh yrup de noo.

⁴⁴Zeg rwen ngbiz wzelo waknkeb ydendxee gyëzlyu axtegue beytson wzëë.

⁴⁵Noze waknkeb lo ngbiz; wrëznzeli kortin ne ka lenxeydoo Dëdyuzh.

⁴⁶Orguin wkarëz Jesus, re Ne: ―Dëde, ledxnya de guu xespíritu noo. Nonchee wluzh re Ne zenga, wetgue Ne.

⁴⁷Chene wii kapitan neguin ne wak, wzaknon men Dëdyuzh, re men: ―Nli ne bet xdoldet ménree.

⁴⁸Yrandxee mén ne ndxin nga no ne wii neguin ne wak, wka men nëz sya men, rzelo men rgap laz men por gyelenles.

⁴⁹Per le yra mén ne rnebeey Jesus no le yra wnaa ne wrunal Ne axtegue Galilea, wyan men axtegue nat rwii men yra neguin ne kayak.