Lucas 17:7-17

⁷“Ashmaynincuna arushganpita o misicushganpita chaptin manami pipis ashmayninta: ‘Jamayculay micuyänayquipä’ ninsu.

⁸Saypa trucanga lapanpis niyan: ‘Yanucamuyrä garamänayquipä. Micusquiptërämi gamga micunquipä.’

⁹Mandashganta ruraycaptinpis manami ‘Päquilä’ ninsu say ashmayninta.

¹⁰“Ashmaynölami gamcunapis caycäyanqui. Saymi Tayta Diosninsi munashganta rurarpis ama shuyacuyanquisu pipis: ‘Alitami rurashcanqui’ niyäshunayquita. Saypa trucanga niyay: ‘Nogacunaga Tayta Diosninsipa ashmayninmi caycäyä. Saymi munashgalanta ruraycäyä.’ ”

¹¹Jerusalenpa aywarmi Jesús päsargan Samaria y Galilea provinciacuna cuchulanpa.

¹²Tacsha marcaman chänanpä caycaptinmi leprawan gueshyaycag chunca (10) runacuna payta ricayargan. Saymi carulapitana gayacuyargan:

¹³“¡Tayta Jesús, nogacunata cuyapaycayälämay!” nir.

¹⁴Saymi Jesús nergan: “Aywayay cüracunaman ricayäshunayquipä.” Sayno niptin aywaycäyashgalanchöna aliyäyargan.

¹⁵Saymi aliyashganta tantyaycur juc cutergan Jesús cagman Tayta Diosninsita alabaraycar.

¹⁶Chaycurnami gongurpacuycorgan Jesuspa puntanman: “¡Päquilä, taytay!” nishpan. Say cuteg runaga cargan Samariapitami.

¹⁷Saymi Jesús nergan saycho cag runacunata: “Leprapita aliyagcunaga ¿manacu chuncag (10) cayargan? ¿Maytä waquin cäga?