Loma 14:4-20

⁴A꞉iye! Mabu keka꞉ ama꞉le Godokono eta okodawoeno komo danagiya꞉midamenaka? Ba꞉be okodawoeno Namutudawate ha꞉kiya ebeno komo ba anagiya꞉midame hidoma꞉ da꞉goemene o kubama꞉ da꞉goemene, huiyatiya ama꞉leha꞉! Numa꞉, Kodawa Godokono helo modobola ba꞉be okodawatamo owalubi komo ihate, ba꞉bema꞉ hibila, ebete ebeno hibima꞉ midi ipuwalo a꞉kagamene, huiyatiya ebete kodakodalo kola꞉nama꞉ne.

⁵Ba꞉gala eta komo. Eta hibima꞉ midi dawate Godoko adikumima꞉ kapiya hegela konomamo emalagidolonako, ba꞉bema꞉ ebete ba꞉be hegela talonama꞉ ba goena tawakaluba꞉tamo talona ba꞉bo ihatenako, iba꞉te ba꞉be hegelalo ibino hiya꞉hiya꞉ oko owatiho komo ba꞉gala kalakala komo kododilima꞉. Huiyatiya eta lumagiti Godoko adikumima꞉ hiliyonomo hegela modoboma꞉ ba goena eta kapiya hegela hiya꞉nomo talona hegelama꞉ kamidinaha꞉. Ba꞉bema꞉ ba꞉moe komoma꞉ la꞉eno sose tawakalubino hiya꞉hiya꞉ ukuiti da꞉pola꞉lama꞉na, la꞉ ipuwalo etate etoeno ukui komamo dito akapapamiwatala꞉. Ao, wadiyala la꞉ hiliyonomate ba꞉ ba꞉ma ka꞉na nododiya꞉la꞉, eta lumagino hibima꞉ midi komote ebeno tepo ipuwalo keba ka꞉na kiya꞉tumina, ebe ha꞉kiya ba꞉be ukui kodakodalo lawete aeno Kodawa kawagaminanama꞉ ba꞉ba ka꞉na nemedenamene.

⁶Iyo, numa꞉la꞉, la꞉ ipuwalo pote eta hegela koma꞉ da꞉goena, ebete eta lumagino komo emalagidoloheno aeno Kodawa kapiya adipatema꞉ ba꞉be hegela talonama꞉ midinako. Ba꞉gala pote kolowami habalo katene lawete da꞉nanako, ebete atumu aeno Kodawa kapiya emalagidololo ododinako, mabu ebete ba꞉be naha ilinama꞉ Godotamo kalakala tabo badipatenako. Ba꞉gala pote ba꞉be katene na talonama꞉ da꞉goena, ebete atumu aeno Kodawa kapiya emalagidololo komo naha ilinoeno komoma꞉ kalakala tabo ebetamo ba adipate, huiyatiya ba꞉be katene ilina tama꞉mo dito ihatenako.

⁷Ba꞉bema꞉ la꞉ ba꞉moe ko komo nemalagidolala꞉, a hibima꞉ midipa꞉te ba꞉moe hopolo ba emedena, a ha꞉kiya a kokalakaluia꞉mema꞉ aeno ubi komokomo ododili modoboha꞉, mabu a aeno Kodawa kawagaminanama꞉ bemedenama꞉. Ba꞉bema꞉ ale aeno hibima꞉ midi mabuma꞉ da꞉ha꞉lahama꞉, ba꞉be komo atumu aeno ubi gabodo a꞉kododa꞉ma꞉, ale aeno Kodawa kawagaminanama꞉ koha꞉lahama꞉nema꞉. Ba꞉bema꞉ ale demedenama꞉ o ale da꞉ha꞉lahama꞉ ba꞉be komo ko komoha꞉. Ko komo ba꞉ ale Kodawoeno tawakalubima꞉ deda꞉hanama꞉ ba꞉be komola.

⁹Ba꞉ hibila, Kelisote ba꞉be mabuma꞉ hoe ipuwane gala ka꞉ka꞉mo a꞉kamahiguya꞉, dopamo da꞉ha꞉lahuya꞉ ba꞉gala ba꞉ma tetelo ka꞉ka꞉go demedehona ba꞉bi tawakalubi hiliyonomoeno Kodawama꞉ keda꞉nama꞉.

¹⁰Ba꞉bema꞉ mabu keka꞉ ama꞉le amia꞉no hibima꞉ midi ekawino komo danagiya꞉midamenaka? Ba꞉gala bada mabuma꞉ ama꞉le ebeno tepo ipuwoeno ukui kubama꞉ da꞉goena? Numa꞉, a hiliyonomate Godokono holoholo hapulu ba la꞉mota꞉hana ebe kapiyate aeno komo ba꞉bo kanagilamelea꞉mema꞉ne.

¹¹Ba꞉be mabuma꞉ Godokono Bukalo eta tabote ba꞉ma ka꞉na itana, “Na ba꞉ emedena tetelo demedenamo ba꞉be Kodawala, ba꞉bema꞉ na hibi tabonomo begoemo, hiliyonomo tawakaluba꞉te pupamo ba pegagahidi na ba꞉bo kopadikunamema꞉na꞉. Iyo, na hibi Godoma꞉ deda꞉namo, ibi hiliyonomate ba꞉be komo ibino tabamo kopehawakalimima꞉na꞉.”

¹²Ba꞉bema꞉ ba꞉moe komo ba꞉ ko komonomola, Godoko kapiyate a hiliyonomoeno komo ba anagilamelea꞉me, ale aeno hiya꞉hiya꞉ kuba ododili huiya uwatelo ebe duhimima꞉ ale eta tabo ga꞉lama꞉ a꞉kamodobama꞉.

¹³Ba꞉bema꞉ wadiyala a hibima꞉ midipi ipuwalo etate etoeno komo anagiya꞉midame komote nekelaa꞉ma꞉mene. La꞉ huiyatiya ba꞉moe komo nemalagidoluya꞉la꞉, la꞉ ipuwalo etate ebeno hibima꞉ midi ekawino nato ukamidadawama꞉ akeda꞉la꞉ ebete gakapoma꞉.

¹⁴Ba꞉ hibila, na Kodawa Ya꞉suku ipuwalo ba emedena ba꞉moe ukui komote nagodolo konomoma꞉ eda꞉na, naha ilina hiliyonomo ipuwalo Godote eta ilina kapiya talonama꞉ kagoenaha꞉, huiyatiya keba tetelo lumagiti ebeno hibima꞉ midi komone eta ilina talonama꞉ da꞉goemene, ba꞉ba tetelo ba꞉be ilinate ebetamo dalowa꞉ma꞉ keda꞉ma꞉ne.

¹⁵Ba꞉bema꞉ amia꞉no hibima꞉ midi ekawiti kebe ilina talonama꞉ da꞉goena, ama꞉le ba꞉be ilina ba nuta ebeno ukui da꞉kubahimimina꞉, ama꞉le ba꞉be komo malemale emalagidolamo kododitaha꞉. A꞉iye! Ama꞉ baa꞉ na ipuwalo ekawino nato ukamidadawama꞉ akeda꞉la꞉, mabu Kelisote ba꞉be lumagi mabuma꞉ atumu a꞉kahoiya꞉!

¹⁶Ba꞉bema꞉ amia꞉no hibima꞉ midi komone kebe komo ododima꞉ modoboma꞉ da꞉goena, ama꞉ ba꞉be komo ba ododita eta lumagino nato dukamidamemena꞉, ba꞉be komo modoboha꞉. Mabu keka꞉ ama꞉le eta komo amia꞉no tuputupu ukuilo ba ododita, komopa꞉te ba꞉be komoma꞉ kubama꞉ da꞉ga꞉luta?

¹⁷Numa꞉, Godote Ko Gawadalagima꞉ deda꞉na ba꞉be komoeno ipuwa ba꞉ naha komoha꞉ ba꞉gala niho komoha꞉! Ao, ebeno Gobogobote hibima꞉ midipa꞉tamo dikalamena, ba꞉be tuputupulu emede komo ba꞉gala hete komo ba꞉gala kalakala komo, ba꞉bi komokomo ba꞉ ebeno Ko Gawadalagi komoeno ipuwala.

¹⁸Ba꞉bema꞉ eta lumagiti ba꞉ ba꞉ba ka꞉na Kelisotamo oko ba owatina ebeno hibima꞉ midi ekawino nato ukamidameheno, Godote ebetamo hibilo kokalakalama꞉ne ba꞉gala tawakaluba꞉te atumu ebetamo kokakalakalahama꞉na꞉.

¹⁹Ba꞉moe ba꞉be mabuma꞉ wadiyala ale aeno ukui konomamo hete gabo kapiya ba꞉ta꞉matanama꞉, ale ba꞉ba ka꞉na etate eta kowalubi, etate eta kowalubi, ale hibima꞉ midi ipuwalo kapepehoma꞉.

²⁰Ba꞉bema꞉ Godote kebe hido oko eta lumagi ipuwalo dowatina, ama꞉le amia꞉no baa꞉ na komamo ba꞉be oko akakubahima꞉la꞉. Naha ilina hiliyonomo talonahenola, huiyatiya ama꞉ eta ilina ba nuta hibima꞉ midi dawoeno nato ukamidadawama꞉ deda꞉mena꞉, Godote ba꞉be komoma꞉ kubama꞉ kogoema꞉ne.