Romanos 14:4-20

⁴¿Cyu guc ru par nu niir nu yuꞌ falt ni moz ni reñaꞌ mbecy? Ndeꞌ cuen ni patro̱o̱ niy nu gniiy ti gruu nap moz niy o nu waruu nap yu. Nunu segur la gruu nap yu, gun Ñgyoozh cyiiñ mi nu locyuub mi dey nu gruu nap yu.

⁵Na yuꞌ mbecy nu ricy zily zir dey ca na tub dzi gazeꞌ deꞌ zir dzi. Zeꞌ yuꞌ gaꞌ mbecy nu rnii too dey nu tub ziꞌl na dela dzi. Tub ga la mbecy rlagy ñi nu nap gad lagy yu mod nu ricy ub yu.

⁶Mbecy nu ricy zily tub dzi, ni mod ricy yu par nu rca lagy yu lo Shuaan den. Yu nu row la ziꞌl coz, yu zeꞌ laabaꞌ nu rca lagy yu lom, gun rbic yu gras nim nu nac de coz nu row yu. Mbecy nu walagy gow de coz zeꞌ, ni ricy yu par nu rca lagy yu lo Ñgyoozh, nunu niꞌ rbic yu gras nim.

⁷Gun sac ni tub la mbecy lat den nu cui mbañ yu nu nac de nu ndeꞌ, gun ndeꞌ coz nu rlagy ub ziꞌl dey. Nunu sac ni tub mbecy lat den nu gat yu nu nac de nu ndeꞌ, gun ndeꞌ coz nu rlagy laab ubaꞌ ziꞌl dey.

⁸Benu cui mbañ den, orzeꞌ ndeꞌ par nu gyicy den coz nu rlagy Ñgyoozh. Nunu benu gat den, orzeꞌ gat na gun ndeꞌ coz nu rlagy mi. Orzeꞌ mas mbañ den o nu gat den, tees nac naa nim.

⁹Gun Crisht gut mi. Orzeꞌ byabañ mi, gun orzeꞌ mi zeꞌ nac mi Shuaan de mbecy mbañ nunu nac mi Shuaan de mbecy nu bi gut.

¹⁰Orzeꞌ a̱ꞌ nap benu nii der nu yuꞌ falt ni de bicy ru. Nunu niꞌ a̱ꞌ nap benu güii naañ der lo dey. Gun dela den rlagy ñi nu gyechaꞌn lo Ñgyoozh par nu gri beem ni den.

¹¹Gun riidz ni Ñgyoozh rniiñ: “Shuaan den nam, segur la ya̱ naca̱ biñ nu mbañ. Orzeꞌ dela mbecy zu tib dey lo̱, nunu dela mbecy gnii dey nu ya̱ naca̱ Ñgyoozh, nam”, rnii riidz nim.

¹²Orzeꞌ dela den rlagy ñi nu zeed cuen na lo Ñgyoozh dela coz nu bicy na.

¹³Ndeꞌ nu na rlagy ñi nu cueꞌ nii den nu yuꞌ falt ni losaꞌn, sinu rlagy ñi nu gzu fert den nu cueꞌ gyicy den ni tub la coz nu gyicy ñi nu gyaꞌ ich de bicy na, ni cueꞌ gyicy den ni tub la coz nu gyicy ñi nu gyicy de bicy na coz cyi.

¹⁴Ya̱ rad lagya̱ nu sac la coz nu row mbecy nu nil nac ñii coz nu a̱ꞌ caacy. Bguugy nap la lardo̱o̱ nu caacy dela coz nu row mbecy, gun ya̱ nac du̱ Shuaan na Jesuuz. Tees benu tub mbecy rnii tooy nu a̱ꞌ caacy la coz, orzeꞌ par yu zeꞌ ziꞌl a̱ꞌ caacy ñi.

¹⁵Orzeꞌ benu de ru shiꞌñ der baloor ni de bicy ru, orzeꞌ wagyicy der mod ni mbecy nu rca losaꞌ, gun niꞌ par de yu zeꞌ gut Crisht. Orzeꞌ cueꞌ zaan der nu gnuy nu nac de coz nu row der.

¹⁶Orzeꞌ cueꞌ cuic der lugaar nu gzat zi mbecy de coz nu nap par de ru.

¹⁷Gun asunt ni gyel gubier ni Ñgyoozh, ndeꞌ walab nu rzat ñi de coz nu dow den o coz nu doꞌn, sinu asunt ni gyel gubier nim, ndeꞌ nu rlagy ñi nu gyicy den coz nu laab ñi. Rlagy ñi nu nap chuꞌ den nu de losaꞌn. Rlagy ñi nu zu cyit lagy den nu nac Espiriit Yon ni Ñgyoozh.

¹⁸Gun cyu ziꞌl mbecy nu ni mod ricy de coz gal nu rlagy Crisht, yu zeꞌ ricy yu mod nu yet lagy Ñgyoozh. Nunu ricy yu nu nap rnii de losaꞌy niy.

¹⁹Orzeꞌ rlagy ñi nu dub laa tiem yub den mod nu nap chuꞌ dun losaꞌn, nunu rlagy ñi nu yub den mod nu gyafert zir dey nu nac de coz ni Crisht.

²⁰Cueꞌ gnu der de riiñ nu ricy Ñgyoozh lat losaꞌr nu nac coz nu row der, gun la ziꞌl coz nu gow mbecy caacy ñi. Orzeꞌ gac gow der, tees a̱ꞌ nap nu gow der ñii, benu gyicy ñi nu gyicy de losaꞌr coz cyi.