Roma 14:4-20

⁴Ta'en niana riy ida netlia riy dom to'a hopopanni de plolli-halli, yoma hopopan de tlinni-tailli npa'eini-npahala ho'mana pen neka upni-matromni nmeh'a neka ed mak ketlia. Emkade walia Orgahi-Orha'a Nla' oleka makpesiay wialmi upni-matromni. Hota E' ed mak ketlia makpesiay wialmi lirni-tunnu. Hota Ntulan la hopopanni de totpena hihi'ini re rla' nana Orgahi-Orha'a ralamni.

⁵La' riy dom de wniarorni de riwra: “Ler memeh'a di, de narehelia lera korni,” mere dom de riwra: “Lera re honona ramneneha la Uplerlawna yamkekni”. Mere mak kaplola de, de totpa rima-rima nlernohora hya' ed maka ha nwarora de plola la Uplerlawna ralma-riorni, de edonna nlernohora riy dom to'a mak ktot nan e'a pa e nlernohora ir wniaror wamueheni.

⁶Riy maka kwaliri-kwalioha lera maka ha napili-nahniari de, enhi' emkade totpena na napilia-nahniaria Orgahi-Orha'a la' ler de. Riy maka ka'ana-kemnia haneknek wawannu mana ha nhi' emkade totpena na napili-nahniaria Orgahi-Orha'a wali, yoma ena'uli-nawedia Uplerlawna la' ya'ana-yemun de. Emkade walia maka ka'ana-kemni ortawi-autiawi, nhi' emkade totpena e' mana nhu'ru-nhelam palia Orgahi-Orha'a me nsumbain pa na'uli-nawedia E'a la' ortawi-autiawi re.

⁷Itsi' emkade yoma riy id mana edonna nmormior pia nlernohora e ralma-rior wamueheni. Me riy id la mai it mana edonna nmat die nlernohora E ralma-rior wamueheni.

⁸Yoma itmormiori la'pa ita tmati ho'mana hade nlernohora Orgahi-Orha'a ralma-riorni. La' hade pede Orgahi-Orha'a gahani ita, la'pa tmormiori onde tmati oleka wa.

⁹Hade rerieini pede Yesus Kristus Nmati olekwa mere Nmori owa'ana, totpena Enla' Matromlawanni mai ita, la'pa itmormiori ma'ta onde itmati oleka wa.

¹⁰Yesus Kristus Nmeh'a ed mak kla' Matromlawanni la' makpesiay hononita, pa hota hya' ed mak krei pia miy mak ka'an eneknek to'a ortawi-autiawi, de miy e mpiaghala mak kpesiay wialmi mak ka'an hya'-hya' to'a? Ne hya' ed mak krei pia miy mak mi'ina-miemun hya'-hya' to' de miy e mpiarwah'a nana mak edon ka'ana? It hononit di de hota ittutrier lia Uplerlawna gaini ralamni pa Enmeh'a maka Nhud it la watghudi lokarni.

¹¹Hota emeknekama ha rhorat targa la Puka ralamni de riwra: “Orgahi-Orha'a Nlokar pa Niwra: “Hota plol toto' memna de riy honona rru'u-rtowar la A ga'yu ralamni. Ne riy honona mana namni ra'uli-rawedia A na'nu de Uplerlawna-Mempulwatnu.””

¹²La' hade pede erammi la' temni. Rima-rima natiak la hihi'a-yapyap wamueheni yoma hota mpialol nohora la'a Uplerlawna.

¹³La' hade pede yan memmemna idma nwaghal owa'an ida. Ne mitiak rer wiali totpa wniehwami-liakatmi yana nhi' pa makpesiay wialmi rler la do'a-hala ralamni.

¹⁴Ina-nara ama-hyali, yoma agor oleka Orgahi-Orha'a Yesus mla' lir id wa pa apuesiay memna, de yamanna hya' to'a mana edonna nwal lia mak Uplerlawna Nlarna. Mere la'pa riy ida wniarorni-wnialaini de yamanan de Uplerlawna Nlarna, la' e' de plol toto'a pa yamanan de e rlarna.

¹⁵Ne la'pa mi'in hadoma pa inmi-narmi mak pesiay ramkek nana, pa hota pesiayni re wolwo'la yoma la' ir wniarorni de ra'an yamanan de do'a-hala hade, de mi'in yamanan de miy edon mtiutga ralam kalwieda la' ira. Pede yan memmemna mi'ina-miemun neka hadomdoma la makpesiay gaini, la'pa mi'in emkade la' ir gaini hota nodia ir la klieratni. Yoma Yesus Kristus mana Nmati olekwa la ir rerieini.

¹⁶La' hade pede la'pa miy hihi'imi-yapyapmi de hota narieiniande makpesiay wialmi pesiayni wolwo'la, kennama la miy wniarormi de hihi'imi de edon nhala la Uplerlawna yamkekni, samounu de yana mhi' hihi'-yapyap die totpa yan riy rwaghal yehwami de.

¹⁷Yoma la'pa Uplerlawna Nodi plolli pa emeka Ray la' it mormiorni-dardiarni, de Uplerlawna Nwahaka de hornama itsoli-tliet la plol wawna. Me totpa idma nkalwied la' ida me itamuki-tahepru yoma Uplerlawna Nhiwni mak kdella it ralamni. Ne hota hya' ed maka ha ta'ana-temnia, de edonna rakot nohora de.

¹⁸Riy maka klernohora Yesus Kristus mak ktutga nhioli mak emkadi, de hota Uplerlawna ralamni nala de. Ne rimormior wiali miana ralamni nal walia.

¹⁹La' hade pede itwahak neka pa totpena yana idma napie'er la ida, me totpena idma naruri-nalai nian id pesiayni.

²⁰Yanpa la' ya'ana to' nekane mpieyata-mpianiaga hya' maka Uplerlawna Nkar niana la riy mak kpesiay die ihranu ralamni. Meman nek la ya'ana-yemnu honona de Uplerlawna edonna Nlarna. Mere la'pa mi'in hadoma de hota narieiniande riy makpesiay dom ra'an walia pa hota la wniarorni de enhi' nan oleka do'a-hala, de hota mi'in hade de nhala.