Rom 14:4-20

⁴Aôm asa, tec gobe ômêtôc ŋac teŋ nê sakiŋwaganê biŋ. Eŋ tau nê Ŋatau oc êjac eŋ sa êkô, me êkêŋ eŋ êku sa. Eŋ oc êkô gebe ênê Ŋatau ŋajaŋa gêmoa, tec oc êjac eŋ sa êkôgeŋ.

⁵Ŋac teŋ ketoc bêc teŋ sa kêlêlêc ŋagêdô su, ma ŋac teŋ ketoc bêc samob sa kêtôm taugeŋ. Agêc lulugeŋ sêkêŋ êwiŋ nêŋ biŋ tau ma sêsap tôŋmaŋ.

⁶Ŋac taŋ ketoc bêc ŋagêdô sa naŋ, gêgôm kêtu Apômtau ŋa, ma ŋac, taŋ geŋ gêŋ ŋagêdô samob naŋ, gêgôm kêtu Apômtauŋa, gebe gêjam daŋge gêdêŋ Anôtô gêwiŋ. Ma ŋac, taŋ geŋ gêŋ ŋagêdô samob atom naŋ, geŋ gêŋ atom kêtu Apômtauŋa ma gêjam daŋge Anôtô,

⁷gebe aêacnêŋ teŋ gêmoa mata jali kêtu tauŋageŋ atom, ma teŋ gêmac êndu kêtu tauŋa atom amboac tonaŋgeŋ.

⁸Aêac embe tamoa mateŋ jali, go tamoa êtu Apômtauŋa, ma embe tamac êndu, go tamac êndu êtu Apômtauŋa. Amboac tonaŋ tamoa mateŋ jali me tamac êndu, oc tatu Apômtaunê gêŋgeŋ.

⁹Kêtu biŋ amboac tonaŋŋa Kilisi gêmac êndu to gêmoa mata jali gebe êtu ŋacmatê to lau mateŋ jali nêŋ Apômtau.

¹⁰Aôm kômêtôc lasimnê biŋ kêtu asageŋŋa. Ma aôm teŋ tonec gôbu lasim kêtu asageŋŋa, gebe aêac samob oc takô Anôtônê lêpôŋ ŋanêmŋa,

¹¹êtôm teto gêc gebe “Apômtau kêsôm gebe Aê tec gêŋgôŋ matoc jali biŋŋanô. Amboac tonaŋ ŋamalac samob sêpôŋ aeŋduc êndêŋ aê, ma aweŋ samob êôc aê Anôtô.”

¹²Amboac tonaŋ aêac samob tonec oc dawa tauŋ nêŋ lêŋ ŋam sa êndêŋêndêŋgeŋ êndêŋ Anôtô.

¹³Amboac tonaŋ tamêtôc lasitêwai êtiam atom, ma asôm êtu tôŋ gebe êlênsôŋ to atim nêm lasitêwai êtiam atom amboac tonaŋgeŋ.

¹⁴Apômtau Jesu gêbiŋ aê tôŋ, tec galic ma kajala kêtu tôŋ gebe gêŋ tonaŋ ŋai samob ŋateŋ tau sec atom. Ma ŋac teŋ embe taê ênam gêŋ teŋ gebe sec, oc êtu sec êndêŋ eŋ.

¹⁵Aôm embe ôniŋ gêŋ, taŋ êlênsôŋ lasimnê ŋalêlôm naŋ, oc ôsa nêm lêŋ totêmtac gêwiŋgeŋ êtiam atom. Kilisi gêmac êndu kêtu lasimŋa, tec onseŋ eŋ su ŋa nêm gêŋ taniŋŋa atom.

¹⁶Amboac tonaŋ ajop nêm gêŋ ŋajam gebe lau sêsôm biŋ alôb-alôb êpi atom.

¹⁷Anôtônê gamêŋ ŋam kêsêp sêniŋ to sênôm gêŋŋa atom. Ŋam tau tonec gebe Ŋalau Dabuŋ kêkêŋ biŋgêdêŋ to biŋmalô ma têntac ŋajam mêŋgêjam auc.

¹⁸Ŋac taŋ ênam sakiŋ Kilisi ŋa lêŋ amboac tonaŋ naŋ, ênac Anôtô mataanô ŋajam to ŋamalac tetoc eŋ sa.

¹⁹Amboac tonaŋ tapeŋ biŋ, taŋ êmboa biŋmalô sa to biŋ, taŋ ênam aêac sa gebe tapuc lasitêwai tôŋ.

²⁰Onseŋ Anôtônê kôm su ŋa gêŋ taniŋŋa atom. Gêŋ samob ŋajamgeŋ, mago nêm gêŋ taniŋŋa embe êlênsôŋ ŋac teŋ nê ŋalêlôm, naŋ ôwi siŋ ma ôlic amboac gêŋ sec.