Roma 14:4-20

⁴Eked kepakay aw silahen tadon se ketanem egtekingan te menge doma otaw singed aw kenitadon sineligan, so olò amo dan se mepakay mikagi te mèpiya aw medaet se ketanem egtekingan te sineligan din. Meneng mèpiya se eg-inangen tadon menge sakop din, so egpeketabang se Pengolo tadon kenitadon.

⁵Iling heman kenyan, doen otaw meibeg megsimba te sebad aldaw te kelikit te simana. Meneng doen heman doma otaw mepakay diyà kandin se pegsimba te pengkey eden eldawi. Keilangan meg-aneng-aneng se teg sebad-sebad kenitadon aw eden se ibeg te Timanem inangen tadon.

⁶Aw meibeg se otaw megsimba te sebad aldaw, Timanem se ipegduyun din pineokit te pegtaking din te ketanem sìyan. Iling heman kenyan, aw egpengaen se otaw te pengelapen, Timanem se egbesahan din pineokit te pegpengaen din te pengelapen, so Timanem se egpesiontongan din kenyan. Meneng aw kenà egpengaen se otaw te pengelapen, Timanem se egbesahan din pineokit te kenà din pegpengaen te pengelapen, aw egpesiontong sikandin diyà te Timanem te egpengànen din.

⁷Pengkey matay kidon, pengkey dalem pa te wedà kidon kematay, eked kidon pegtebok te inangen tadon.

⁸Dalem te wedà kidon pa kematay, Pengolo tadon si Cristo se egseligan tadon. Pengkey matay kidon, sikandin heman se seligan tadon. Yan, pengkey dalem te wedà kidon pa kematay, pengkey matay kidon, sakop kidon pa te Pengolo tadon.

⁹Yan se doun te nematay si Cristo aw neantay heman sikandin lekat te nematay, amon lomowan sikandin diyà te kedita tadon te wedà kidon kematay, aw te pegkematay tadon heman.

¹⁰Yan se doun te eked kepakay aw silahen tadon se ketanem egtekingan te doma otaw migpesakop diyà kandin. Eked heman kepakay aw meglindò kidon kandan, so sominalo kwani se kedita tadon te Timanem amon okomen kidon din.

¹¹Netegahan tadon te benal iyan, so mebasa tadon se kagi te Pengolo tadon kidoen te kagi te Timanem insolat, “Metoman se kagi ko kenyo seini. Doen aldaw domateng te lomongken se kedita te otaw diyà kanak. Domuyun se kedita te otaw te Timanem.”

¹²Yan keilangan sominalo se teg sebad-sebad kenitadon te Timanem amon meg-indan kidon te benal tepad te kedita te ininang tadon dini lanto te tanà.

¹³Yan ikà niyo egsila te ketanem egtekingan te menge doma sakop i Cristo. Meneng keilangan eneng-enengen niyo tepad te ketanem egtekingan niyo amon eked kedàti se menge doma sakop i Cristo tandà te eg-inangen niyo, aw amon wedad heman otaw meboyo meg-inang te salà.

¹⁴Tandà te pegsebad ko ki Jesus, ontò a den netaga-taga te wedad palos kànen ininang te Timanem eked kepakay kànen. Meneng aw meg-aneng-aneng se otaw te doen kànen ininang te Timanem eked kepakay kànen, eked kepakay aw kànen din iyan.

¹⁵Aw kedàtan se doma otaw tomaking ki Cristo tandà te egpengànen niyo, medaet se pegpengaen niyo kenyan, so iling te wedà niyo sikandin kedekeli te pedowan. Ikà niyo egbaet te pegsalig te doma otaw diyà ki Cristo pineokit te pegpengaen niyo, so simelilin si Cristo heman kandin te pegkematay din doton te kros.

¹⁶Pengkey netegahan niyo te doen mèpiya mepakay inangen, meneng aw doen otaw somila kenyo tandà te peg-inang niyo kenyan, ikà niyo eg-inang kenyan.

¹⁷Diyà kenitadon migpesakop diyà te peglowan te Timanem, mepakay pengkey eden se kànen aw inemen tadon. Meneng keilangan metòlid se inangen tadon, aw melinaw se pedowan tadon diyà te doma otaw, aw yan begayan kidon te Espiritu Santo te keluba te pedowan tadon.

¹⁸Aw yan se inangen te kedita tadon egtolò ki Cristo, meluba se Timanem kenitadon, aw mikagi heman se doma otaw te mèpiya se eg-inangen tadon.

¹⁹Nayan, pengkey eden se inangen tadon, keilangan eneng-enengen tadon amon eked kebàti se kelinaw te pedowan tadon, amon megpetebangay kidon te pegtaking tadon ki Cristo.

²⁰Ikà niyo egbaet te eg-inangen te Timanem pineokit te pegpengaen niyo. Mepakay aw kànen tadon se kedita te kinemoloan te kànen, meneng eked kepakay aw kebàtan tadon se pegsalig te doma otaw diyà ki Cristo pineokit te pegpengaen tadon.