Loekaas 21:8-24

⁸Tab oe bolies: „Batjaaike rahiehe kie toke koi na bahakaai lei. Dher log aaike boliega: ‘Ham Kriest baatie.’ Aur bhie: ‘Aane waala tem nagietj aail gail hai!’ Aisan manai ke pietjha na pakariehe.

⁹Aur djab toelog soeniehe kie manai logan laraai kare hai aur haltjal matjaawe hai, tab na ghabaraihe. Ie sab tjiedj pahiele howe ke tjaahie, bakie tabbo ie djoeg ke ant abbe na aai rahie.”

¹⁰Oe bolies: „Ek djaatie doesar djaatie se aur ek des doesar des se laraai karie.

¹¹Hia hoewa barka bhoeidol aai, akaal parie aur tjaaro bagal kharaab bemaarie phailie. Aur bhie bahoet ghabaraahat aur atjambho tjienha aasmaan me dekhaaiga.

¹²Ie sab tjiedj howe se pahiele manai toelogke pakarke partjaar ke ghar ke barkwan ke haath me saup deiga. Oesab toelogke djahal me band kar deiga, aur hamaar tjela bane ke biese me raadja aur laat log ke aage ledjaaiga.

¹³Tab toelog aapan bieswaas ke biese me gawaahie dei sakiehe.

¹⁴Bakie toelog agwe se sotj-phiekier na kariehe kaise apane ke batjaawe ke tjaahie.

¹⁵Ham to apane toelogke gjaan aur baat debe, tab doesman koetjh na bol paawe.

¹⁶Toelog bhie aapan maai-baap, bhaai, palwaar aur sanghatian dwaara doesman ke haath me saup dewal djaihe aur oesab toelog me se koi koi ke maar dhaariega.

¹⁷Sab koi toelogke djaran kariega hamare me bieswaas kare ke khaatien.

¹⁸Tabbo koi tor koetjh na kar paaiga.

¹⁹Aur djab toelog hiemmat na hariehe, tab toelog aapan djiewan batjaihe.

²⁰Djab toelog dekhiehe kie soerdjaatie ke djhoend Jeroesaalem ke ghere hai, tab djaan djaihe kie sahar ke barbaadie nagietj aai gail hai.

²¹Tab Joedea diehaat waalan ke pahaar ke or bhaage ke tjaahie. Aur dje sahar me hai, ohoeke hoewa se bhaage ke parie aur dje khet me hai, oke sahar me na djaaike tjaahie.

²²Oe dien Parmeswar sadja deiga djaise oe aapan sanesian se liekhwaais hai.

²³Djaun aurat log ke larka hoiga kie to doedh piaite rahiega, oesabke oeppar bahoet doekh pariega. Ie des ke oeppar barka moesiebat aaiga aur Parmeswar ie djaatie ke oeppar goessaail rahiega.

²⁴Oe dien dher manai talwaar se maar dhaaral djaaiga. Bhie doesar log pakaraaike aur har ek rakam des me ledjaawal djaaiga. Aur doesar des ke manai log Jeroesaalem me kara hoekoem se raadj tjalaaiga djab talak ohoesabke sadja na mieliega.”