Luk 21:8-24

⁸Goio, e Iesus kolia giteu maie mago “Amuto ge mata rara tigi, egiteu isahari ale kama kokora soukama gomai ge tutugolo amutou, amuto ge tilo te la merera tegiteu ele. La valalua usu ge guvi seseke tavu amutou, egite ge veia mutou mago ‘Eau e Kraist’, uka egite ge veia maie mago ‘La imamala koramuliti ale la tapasi la haro ge sibitala, e Kraist ge guvi rivu lou loata.’ Eala moli amutou umala ge mulimuli egiteu ele.

⁹Umala amuto ge taga, mai amuto ge lolo la rere la vaubila me la vikokuela eia sibitalati. La marapala tomi mai ele ge sibitala pala muga, mulimuli ovola la tapasi la haro ge sibitala.”

¹⁰Tio, e Iesus vei kaluvutia giteu la merera tetala mai ele, eia goio solo lou la vikararala tetala soio tegiteu, mago “La gale isa, eia ge hiliti tavu la gale isapolo, egiteu la galegale tomi ge vaubi rivu lou legiteu mai ele.

¹¹E malugulugu usu ge umu, la vitololola uru tai ge sibitala, ge pigi robo la maututula tomi.

¹²Eala moli pala muga tegiteu la irovilala tomi ele, egiteu la valalua la gima ge hiliti, egite ge lao tola pala muga amutou, egite ge viligi sesele amutou, egite ge vimagiri amutou te la vigagiala te la lumaluma la lotu tomi te la maututula, egite ge lapu amutou soio te la luma la kilisi. Egite ge loloa veia amuto valolo te la isagu, egite ge lapu amutou soio te la vigagiala tegiteu la mulugaluga.

¹³Ale taritigi moli, la vuhula amuto ge valolo egiteu te la valolo ale taritigi te la isagu.

¹⁴Eala moli umala amuto ge gabutatala papapai te la merera ale amuto ge tao robo le amutou ovola.

¹⁵Eau ge abia mutou la merera ale taritigi me la mari ale sesele, egiteu la gima tamutou kama koramulia ge tahi taroa.

¹⁶Egiteu e tatama mutou, e tatila mutou, egiteu tai e tabarabara mutou, egite tomi ele ge veipala amutou soio tegiteu la gima, egiteu e valalua mutou tomi, egiteu e vikilipilipi mutou tai, egite tomi ele ge igo moli amutou tomi mai ele. Egite ge bili taro tai isahari tamutou ele.

¹⁷La valalua tomi ge gima amutou te la isagu,

¹⁸eala moli isa tamutou kama ge vilua,

¹⁹la vuhula mai amuto ge magiri vagari, eia koramulia mai ele veia eau ge vimahuli la kalulu mutou.

²⁰“Mai mulimuli amuto ge hilo e Ierusalem, egiteu la valalua la vaubi ge gali roboa, amuto ge matagaga tigi tataho mai ele veia eia kamati ge tabaa, la mautu e Ierusalem ge sululu.

²¹Te la imamala ale, eia taritigi pepeho veia egiteu la valalua me hatavivilele Iudea, egite ge hele soata la goegove. Taritigi egiteu ale pou oluma, egite ge hele. Egiteu tai ale pou orivo, taritigi veia egite ge hele moli, egite umalati ge golumaluma.

²²La vuhula la imamala ale, eia la imamala la kiloli la iruru, ale La Uru ge vipuru sesele la merera tetala tomi ovola.

²³E maura miteu e hatavivile ale so visususu e latatu giteu te la imamala alele, egiteu tai ale savulatu, egite ge hele mave? La tilali ge uru sesele te la gale e Iudea, me la igototolola te La Tahalo Uru ge pigi robo la valalua me hatavivile tomi tetala.

²⁴Isahari tegiteu ge peho te la vaubila, isahari tegiteu lou, egite la gima ge lao tola egiteu, egite ge lapu egiteu soio te la mautu ale malau. Egiteu la valalua la maligoma ge soa kuru la mautu e Ierusalem, kara ale la imamala tegiteu ge kaluvu.