Lifitikos 21:17-24

¹⁷“Kopwe üreni Aaron: Esap wor eman me lein mwirimwirum kana mi wor terin epwe kaneto pwe epwe eäni asoren mongö ngeniei. Ei epwe fis seni eu täppin aramas tori eu täppin.

¹⁸Pun esap wor eman mi mesechun ika mwen, are eman a ter won mesan ika a timwo, epwe föri ewe angangen asor,

¹⁹sap pwal eman a ter efoch pechen ika efoch pöün,

²⁰are a chuk sökürün ika ningenge, are a ülen ik lon mesan ika kilingau mi pwerik ika fas, are fokun.

²¹Esap fokun wor eman mwirimwirin ewe souasor Aaron epwe eäni ekewe asor ngeniei, are a wor terin. Pokiten a wor terin, esap tongeni eäni asoren mongö ngeniei.

²²A tongeni mongö seni ewe asoren mongö aramas ra uwato fän itei, ewe asoren mongö mi unusen pin pwal ewe mi pin.

²³Nge esap tongeni kan ngeni ewe chechen lefil ika ewe rongen asor, pokiten a wor terin, pwe esap apiningaua imwei mi pin. Pun ngang ewe Samol mi Lapalap üa apini ekewe mettoch.”

²⁴Mürin, Moses a asile ngeni Aaron me nöün kewe mwän pwal ngeni aramasen Israel meinisin ekei kapas meinisin.