Judges 5:10-29

¹⁰Gimed e pi’in kam afgad nga daken e pi dongki nib wechwech, ni kam pired nga daken e n’en ni kan filath nga daken keru’ e dongki e ngam weliyed murung’agen, ma ku er rogon gimed e pi’in nthingar mmarod u but’ ko gin ngam marod ngay.

¹¹Mu telmed! Girdi’ ni pire’ nike mada’ lamrad ngalang u to’oben e pi luwed ni yad be weliy murung’agen e gel ni tay SOMOL ko pi mael, ni pi mael ni gel piyu Israel riy! Me thelep e girdi’ rok SOMOL ko pi binaw rorad nga pe’ning.

¹²Mm’on, Deborah, mm’on! Mu gafaliydad! Ngad tanggad! Nggu leked gur! Barak, ni ga be’ nib mo’on ni fak Abinoam, mman nga m’on, mu gafaliy e pi’in kam kol i yan ngabang!

¹³Ma aram e pi’in yad ba yul’yul’ e rabad nga pe’ning ngak e pi’in yad e gafal rorad; girdi’ rok SOMOL e rabad ngak ni kar fal’eged rogorad ko cham.

¹⁴Rabad u Efraim ngalan e loway ni yad be lek e ganong rok Benjamin. Me yib e pi’in yad be tay murung’agen e salthaw u Makir nga pe’ning, ma pi tolang ko salthaw e rabad u Zebulun nga pe’ning.

¹⁵Ma pi’in yad be yog e thin ko ganong rok Issakar e ra cheggad ngak Deborah ngarbad; er rogon, i yib Issakar, ma ku er rogon Barak. Ra leked ngarbad ngalan e loway. Machane ganong rok Ruben e ruw raba’ e girdi’ riy; ma de yag ni ngar turguyed ni ngarbad.

¹⁶Mang nra pired rok e pi saf rorad ma darbad? Ngar motoyilgad nga laman e pi’in yad ma gafaliy e saf ni yad be pining e yu ran’ i saf? Errogon, ganong rok Ruben e ruw raba’ e girdi’ riy’ dayag ni ngar turguyed ni ngarbad.

¹⁷Ganong rok Gad e par ko ngek u Jordan, ma ganong rok Dan e par u charen e pi barkow. Ma ganong rok Asher e par u dap’el’ay; ra mageygad u dap’el’ay.

¹⁸Machane girdi’en e ganong rok Zebulun nge Naftali e ra paged fan e pogofan rorad u tagil’ e mael.

¹⁹Me yib e pi pilung ngar’uned ko mael u Taanak, u to’oben e lul’ u Megiddo. I un e pi pilung nu Kanaan ko mael, machane de yag nra feked e silber.

²⁰Pi t’uf u lang e ru’uned ko cham; yad be yan u lanelang ma yad be cham ngak Sisera.

²¹I sugbur e lul’ nu Kishon me fekrad e ran, ko gireng ko lul’ nu Kishon. Bay gu ayi salthaw, i yan nga m’on nib el mirin!

²²Ma aram me yib e pi os ni yad be tim’og, ni yad be rugoy ayrad nga but’.

²³Be ga’ar fare engel rok SOMOL, “Mu bucheg wa’athan yu Meroz, mu bucheg wa’athan, mu bucheg wa’athan e pi’in yad be par u rom. Ya darbad ni ngar ayuweged SOMOL, ni ngarbad nrogon e salthaw ngar chamgad ni fan ngak.”

²⁴Re pin nth’abi fel’ wa’athan e Jael, ni le’engin Heber ni be’ nu Keni, ni ir e re pin nth’abi fel’ wa’athan u fithik’ e ppin ni yad ma par u lan e pi tent.

²⁵I ning Sisera e ran, machane me pi’ e milik ngak, me fek e kirim i yib ngak nike tay ngalan baraba’ i dabiy ni bfel’ ya’an.

²⁶Me fek ba richib ko tent nga baraba’ i pa’, me fek e ama ni yima maruwel ngay nga baraba’ i pa’; me pirdiiy lolugen Sisera nge bilig, me kuruf lolugen nge for u barba’.

²⁷Me aw nga but’ nib ragbug, me thig nga charen rifrifen ay fare pin. To’oben i rifrifen ay e aw riy nga but’ nib ragbug me thig; me thig nga but’ nike yim’.

²⁸Me changar e chitiningin Sisera nga wean u thilin e sagal ko winda; me ga’ar, “Mangfan nike pag nap’an ni nge yib e chariot rok? “Mangfan nike sag’al e pi os rok ko sul?

²⁹Ma pi ppin ni yad ba gonop ni yad ma par rok e ra fulweged lungun, mi i ga’ar u wan’,