HAHEMAORO TAUDIA 5:10-29

¹⁰Doniki kurokurodia ai o guimu taumui, ba gwauraia, hedinarai, Geda udunadia ai o helaimu taumui, ba gwauraia hedinarai, Dala ai o rakamu taumui, ba herevalaia.

¹¹Ranu gabudia ai e kiri heboumu hahinedia gadodia a kamonai, Unuseni ai danu Iehova ena siahu karadia e herevalaimu, Ena kara maoromaoro Israel taudia bogaragidiai e gwaurai hedinaraiamu. Iehova ena orea taudia na hanua ikoukoudia e raka henidia lao.

¹²A noga, a noga, Debora e! A noga, a noga, ane avabia! Barak e, a tore isi, Abinaom natuna e, emu abi-mauri taudia a hakaudia lao.

¹³Goada taudia kwabukwabudia na tuari ela, Iehova ena orea taudia ese goada taudia e tuari henidia, ia bagunai.

¹⁴Efraim amo ema, koura ai e hekei diho; Beniamina e, oi murimu ai e raka, oiemu orea ida. Makiri amo tuari biagudia e hekei, Sebulun amo tuari lohiadia ema.

¹⁵Isakara lohiadia na Debora ida ema, Isakara taudia ese Barak e abidadama henia, Ia murinai e heau lao, koura ai e hekei diho. Ruben iduhuna doḡorodia bogaragidiai Daradara vada e bada.

¹⁶Dahaka dainai mamoe edia maḡu ai o halahe? Dahaka dainai mamoe ireḡudia taudia edia ivilikou reḡedia mo o hakala henidia? Ruben iduhuna doḡorodia bogaragidiai Daradara vada e bada.

¹⁷Gilead taudia na loridane unukahana ai e nohova; Dan taudia na dahaka dainai laḡatoi ai e halaheva? Asere taudia na kone ai e nohova, Sinavai iduaradia badidiai e nohova.

¹⁸Sebulun taudia na edia mauri inegena asie gari, Napatali taudia danu ororo ai tuari gabuna ai asie gari.

¹⁹Hanua pavapavadia na ema, e tuari, Kanaan pavapavadia e tuari henidia; Taanak ai, Megido ranudia badibadidiai, Silver sisina taina asie abia,

²⁰Hisiu na guba amo e tuari, Edia guba daladia amo Sisera e tuari henia.

²¹Kison sinavaina ese e arudia lao, Abata ese e laohaidia, Kison abatana. Laumagu e, ba ha tuari, mai goadamu ida.

²²Hosi aedia reḡedia vada e bada; Tuari hosidia vada e heau, vada e heau.

²³Iehova ena aneru e tomamu, Meroso ba uduguiraia, Meroso taudia ba uduguiraidia bada; Badina be Iehova iduruna asiema, Goada taudia bogaragidiai Iehova iduruna asiema.

²⁴Hahine bogaragidiai laele mo namo, Hebere tau Kene adavana mo namo herea. Kalaga inoholaidia hahinedia bogaragidiai ia mo sibona namo herea.

²⁵Ranu e noia negana ai, ia ese rata e henia; Dihu namo-hereana ai bata e mailaia, ana.

²⁶Ikoko na imana ai e abia, Lavu na imana idibana ai e abia, Ia ese Sisera e kokoa, Kwarana e huaria, Ibunina daena e haberoa, e gwadaia.

²⁷E igo diho, e keto, Aena badibadinai e hekida diho; Aena badibadinai e igo diho, e keto, E igo diho gabuna ai e mase.

²⁸Sisera sinana na e igo lasi, Gaba-mauru amo e boiboi: Dahaka dainai ena kanota na e halahemu? Badina be dahaka kariota hosidia aedia reḡedia asina kamonaimu?

²⁹Ena aonega hahinedia ese e haere henia, Bona ia sibona e haere: