Juan 6:3-36

³Timikedeg si Jesus aw menge tinoledaan din te bontod, aw nenenoo dan kidoen.

⁴Neinang ini te agpet domateng se pista te menge Judiyo iningedanan Pista te Pegpelowà.

⁵Pegtengteng i Jesus, kinità din se medita otaw migpesalo diyà kandin. Minikagi si Jesus diyà ki Felipe, “Kenan lay beyadi se ipekaen tadon kandan?”

⁶Yan se ininsà din amon tendaen din se pegsalig i Felipe diyà kandin, so tapay netegahan din aw eden se inangen din.

⁷Timaba si Felipe, “Simpana doen ontò dakel kwarta tadon, pengkey doen dowa gatos se kwarta dinaryo ibayad tadon te pan, kolang pa se pan iteped diyà kandan, so ontò dan medita.”

⁸Kidoen heman se sebad tinoledaan i Jesus si Andres, sìyan adi i Pedro. Minikagi sikandin,

⁹“Doen telaki dini nengibing te bawo din lima se pan ininang lekat te sebada, aw dowa se ikan din. Meneng iling iyan te wedad, so ontò medita se otaw netipon.”

¹⁰Minikagi si Jesus diyà te menge tinoledaan din, “Peonsadi niyo se menge otaw.” Nayan, mebelad se sagbet kidoen aw yan minonsad dan kidoen. Menge lima melalan se kedita te meama kidoen, aw doen heman menge bayi.

¹¹Inabat i Jesus se lima pan, aw migpesiontong kenyan diyà te Timanem, aw impeteped din iyan diyà te menge otaw minonsad. Onawa heman se ininang din diyà te ikan lamig nebesog se kedita dan.

¹²Pegkebesog dan, minikagi si Jesus diyà te menge tinoledaan din, “Imoni niyo se samà te kànen amon wedad kebàtan.”

¹³Peg-imon dan te samà te pan wedà kàni, doen sempolò teg dowa buun nepenò te pan.

¹⁴Pegkità te menge otaw te kepelahan ininang i Jesus, minikagi dan, “Sikandin se ontò benal telekeliwat te kagi te Timanem insogò din dini te keneyonan.”

¹⁵Meneng nesayo den si Jesus lekat kidoen sebad din, aw dimeleg doton didaya, so netegahan din te doen ibeg dan megleges kandin amon inangen dan sikandin selotan dan, meneng kenà niyan se ibeg din.

¹⁶Pegsallep te aldaw, timegbeng se menge tinoledaan i Jesus doton te kilid te lanaw.

¹⁷Pegkedelem, simakay dan te belangay, so wedà pa dateng si Jesus. Minatas dan pesalo doton te Kapirnaom.

¹⁸Meneng wedà kenamay, migkedakel se balud so migkebandes.

¹⁹Pegbugsay dan te menge lima kilomitro, kinità dan si Jesus migpesalo kandan, aw minipanaw sikandin diyà te lanto te lanaw. Ontò dan nelemitan.

²⁰Meneng timawal si Jesus, “Siaken inì. Ikà niyo egkelemitan.”

²¹Penga niyan, ontò dan neluba aw impesakay dan sikandin. Wedà kenamay, dimateng dan kidoen te tanà dinotonan dan.

²²Keeldawan niyan, nengemahà ki Jesus se menge otaw tinenanan te menge tinoledaan doton dipag te lanaw, so netegahan dan te gebenini doen olò sebad belangay kidoen, aw netegahan dan heman te wedà taking si Jesus diyà te menge tinoledaan din te pegsakay dan kenyan.

²³Wedà dan pegkità ki Jesus, meneng doen menge belangay lekat te Tibiryas migdong dapag te tanà kinànan dan te pan impesiontong i Jesus.

²⁴Penga niyan, pegketaga-taga dan te wedad kidoen si Jesus aw menge tinoledaan din, simakay dan heman minatas pesalo doton te Kapirnaom, amon mengemahà dan ki Jesus.

²⁵Pegdateng dan doton te Kapirnaom, kinità dan si Jesus, aw mig-insà dan, “Sir, kano ka lay dini?”

²⁶Timaba si Jesus, “Eneng-enengi niyo se kagi ko kenyo. Nengemahà kaw kanak kenà so nemenal kaw pineokit te kepelahan impekità ko kenyo, meneng nengemahà kaw kanak so nebesog kaw te pan impekaen ko kenyo gebenini.

²⁷Ikà niyo egpengemahà te kànen megkewedad te eked kenamay. Meneng pengemahà kaw te kànen eked pegkewedad aw mekebegay te pedowan wedad temanan. Yan se ibegay ko kenyo, so siaken se Timanem Migpekeotaw, aw impetaga-taga te Amay ko Timanem te siak se insogò din.”

²⁸Minikagi dan diyà ki Jesus, “Toledai kay aw eden se inangen day amon metoman day se ibeg te Timanem.”

²⁹Timaba si Jesus, “Seini se ibeg te Timanem inangen niyo. Pemenal kaw kanak, so insogò a te Timanem.”

³⁰Mig-insà dan heman, “Eden lay se pengilala ipekità no kenami amon memenal kay kamno? Eden lay se inangen no kenami?

³¹So gebii te peg-ogpà te menge kemonaan tadon doton te kebigtilan, kinaen dan se kànen iningedanan mana, so doen kagi te Timanem insolat, ‘Binegayan din dan te kànen lekat te langit.’”

³²Minikagi si Jesus, “Eneng-enengi niyo se kagi ko kenyo. Kenà si Moises se nemegay te kànen lekat te langit, meneng Timanem se egpemegay kenyo te benal kànen lekat te langit.

³³Insogò dini lekat te langit se benal kànen ipegpemegay te Timanem, aw yan se mekebegay te kaling pedowan wedad temanan diyà te kedita te otaw.”

³⁴Minikagi dan, “Pengolo, begayi kay te kànen sìyan te kelikit te aldaw.”

³⁵Minikagi si Jesus, “Siaken se kànen mekebegay te kaling pedowan wedad temanan. Se otaw tomaking aw memenal kanak, yan se otaw eked palos bellosi aw eked heman palos kelao.

³⁶Meneng tapay ko inikagi kenyo, te pengkey kinità a niyo, meneng wedà kaw pa pemenal kanak.