SAN JUAN 6:3-36

³Sya, mquée Jesús loo thìb yii. Ngua tub Jesús tya con myen' xin' mté'th Jesús.

⁴Nde nxon', leque le'n huiza nde zin' gaxle' huiz lni che'n pasc co' ndli mèn nación Israel.

⁵Co'se' gunèe Jesús nde nque huax mènléy' xís Jesús, Jesús ndxab loo Lip: ―¿Pá ya ti' gu' pan par hua rye mèn ba', Lip?

⁶Per Jesús asembli tataa ndxab Jesús loo Lip par ñee Jesús ñeene' cón càb Lip loo Jesús. Tac yub Jesús naneeque' xá mod li Jesús par hua rye mèna.

⁷Sya, mcàb Lip loo Jesús. Ndxab Lip: ―Tad, chele' na' ti' thìb mil chop ayo pes pan par hua rye mèn ba', pà gàala par hua rye mèn ba' sa sai.

⁸Le' sya, ndxab thìb myen' xin' mté'th Jesús co' lèe Ndech, co' ndxàc hues Mon Pedr, loo Jesús:

⁹―Tad, làth na' ndxè' nzo thìb mbyòo co' ngue no ga'y pan nagus no chop mbèel bix. Per pà gàal pana no mbèela par hua ryethe mèn ba' thìb le'i thìb le'i.

¹⁰Sya, ndxab Jesús loo myen' xin' mté'th Jesús: ―Guuz gu' loo rye mèn ba' tyub mèn loo yixii co' nzo'f ba'. Tataa ndxab Jesús tac anze'f thìb yixii mxyo'f tya. Sya, mdub mèna. Mèn co' nduhua, casque' ngòc ga'y mil mèn, ante mènbi'. Xà' mèngot. No xà' myen' bix. Indxòode cuent mèngot no myen' bix co' nduhua, ne.

¹¹Sya, mxen Jesús ga'y pana. No ndxab Jesús: ―Diox quix U', Diox, loo Diox. Ngolo ndxab Jesús: Diox quix U', Diox, loo Diox, mbli Jesús par mbyar' pana. Ngoloa, mda' Jesús pana loo myen' xin' mté'th Jesús. Le' myen' na, mbli'th pana loo mèn co' nzi nduba. Lomisque' mbli Jesús con mbèela. No nduhua mèna pana no mbèela axta plóthe mblya's mèna.

¹²Co'se' ngolo nduhua mèna axta plóthe mblya's mèna pan no mbèel co' mteyar' Jesús, Jesús ndxab loo myen' xin' mté'th Jesús: ―Fthop gu' rye le' pan co' mbyan' xo'f ba' par ne'yiza'de nec thìb le'i.

¹³Sya, mthop myen' si' fchop cardor le' pan co' mbyan' xo'f loo ga'y pan co' nduhua mèna.

¹⁴Per co'se' gunèe mèna yalguzye' co' mbli Jesús, syare', ndxab mèna loo xtàa mèna: ―Lìcpe' ba'i, mbi' ba' nac mbi' co' nde'th di's co' ndxab Diox co' ndxath yi'th loo izlyo', cara.

¹⁵Per com le' Jesús nonque' no nda'que' Jesús cuent le' mèna mbli nèele' lezo' mbi'th mèna par hue' yèe mèna Jesús par sanggàc Jesús reype' mèna, sya, ngro' thidte Jesús thìb lad loo mèna. Mbere Jesús, nda Jesús loo yiia tedib vez.

¹⁶Co'se' mzyèle' izlyo' huiza, mxen myen' xin' mté'th Jesús ned. Ngulàa tùub myen'. Nda myen' anzo anzo ro lagun.

¹⁷Sya, ngòo myen' loo thìb yòoyaa par tlo tetee myen' yòoyaa loo lagun par zin myen' tedib lad ro lagun co'te' nziri' yèez Capernaum. Hora, nde làale' yál' izlyo'. Le' Jesús na, yende pá ñaa bere par thidte ya no Jesús myen'.

¹⁸Per le'pe' tlo tetee myen' yòoyaa loo lagun, mtlo ngro' thìb mbiidó'. No mxít too mbii nít loo lagun.

¹⁹Co'se' nde teele' ndyee myen' loo lagun thìb distans co' ne' ga'y mil metr, gunèe myen' nde tee nii Jesús loo nít loo lagun. Per ne'ñeede myen' ché' Jesús na. Co'se' gunèe myen' nde zin gax Jesús loo myen', ale mzyeb myen'.

²⁰Jesús ndxab loo myen': ―Ne'zyebte gu', ey. Daa na.

²¹Le' sya, mdyac lezo' myen' ngo no myen' Jesús loo yòoyaa. No ale setilte mzin myen' con Jesús yèez Capernaum co'te' nda myen'.

²²Per tedib huiz co' nde nquea, rye mèn co' be' mbyan' tedib lad ro leque laguna, mèna gunèe le' myen' xin' mté'th Jesús ngòo loo thidte yòoyaa co' ndub tya. No yende pá gunèe mèna ngòo no Jesús myen' loo yòoyaa.

²³Per láth nzi li mèna xtùuz no mbez mèna loo xtàa mèna: ¿Pá ned nda Jesús, yey?, sya, mzin ndxep yòoyaa co' ndye'th par ned yèez Tiber, yèez co' nziri' gaxte co'te' nduhua mèn pan co'se' ngolo ndxab Tad Jesús: Diox quix U', Diox, loo Diox.

²⁴Co'se' gunèe mèna yende pá ndye'th Jesús làtha, ne' myen' xin' mté'th Jesús, ngòo mèna loo leque yòoyaa co' mzin tya par nda cua'n mèna Jesús par ned le'n yèez Capernaum.

²⁵Co'se' mzin mèna co'te' nzo Jesús tedib lad ro lagun, ndxab mèna loo Jesús: ―Maistr, ¿pól mzin U' par nedrè', yey?

²⁶Mcàb Jesús loo mèna. Ndxab Jesús: ―Lìcpe' ba'i, na ngue nii loo gu': Le' gu' mcua'n daa por nduhua gu' pan axta plóthe mblya's gu'. Per incua'nte gu' daa por ndxòn gu', no por mden' gu', no por mda' gu' cuent cón che'n yalguzye' co' gunèe gu' mblin.

²⁷Ne'gath lyuxte gu' por xít gu' no lua' gu' co' nde che loo gu' thìb thìb huiz. Ndxe'leque', guth blux gu' loo xít gu' no lua' gu' co' ne'lyuxte no co' ne'ryede loo gu', co' nee di's, con' co' ndlin par yòo ban no gu' Diox thidtene. Tac daa co' mbal yáal loo izlyo' ndxè' xalque' ndxáal chol mèn loo izlyo' ndxè', daa ndli par yòo ban no mèn Diox thidtene xal nac xít mèn no lua' mèn co' ngàal mèn co'se' ndxuhua mèn xít mèn no lua' mèn. Tac Diox co' nac xuden mblu' loon no mnibe' Diox loon par lin ryethe con' co' ngue lin loo izlyo' ndxè' no par xo'f zin'en ryethe con' co' mnibe' xuden Diox loon par lina.

²⁸Sya, ndxab mèna loo Jesús: ―¿Cón li nu' par tolo li nu' ryethe con' co' ñibe' Diox no co' nee lezo' Diox, sya?

²⁹Jesús mcàb loo mèna. Ndxab Jesús: ―Con' co' ndlya's Diox li gu' nac ante yila's gu' no gàp gu' yalxla's loo xa' co' mtel' Diox loo gu', co' nac yub daa.

³⁰Le' sya, ndxab mèna loo Jesús: ―Neeca. Ndxònque' nu' di's co' mbezl ba'. Per nu' ndlya's ñèe chó yalguzye' lil loo nu' par ñèe nu' lil yalguzye' no yila's nu' lool. ¿Chó con' lil loo nu' co' gàc xal thìb señ par ñèe nu'i, à'?

³¹Xudgool nu' co' ngo ban póla nduhua thìb loo pan co' ngro' lèe maná co'te' nagán, xalque' nac di's co' ndub loo libr co' nac xti's Diox co' mbez le' Diox mblàa thìb loo pan loo bé' par nduhua mèn tiempa. ¿Chó señ lil par ñèe nu' lila, à'?

³²Mcàb Jesús loo mèna. Ndxab Jesús: ―Lìcpe' ba'i, na ngue nii loo gu': Ne'ngàcte Moisés xa' co' mda' pan che'n bé' par nduhua mèn co' ngòc xudgool gu'. Ndxe'leque', xuden Diox nac xa' co' nda' pan co' nac lìcpe' pan che'n bé' par hua gu' nalle', co' nee di's, nac yub daa.

³³Tac pan co' nda' Diox par hua mèn nalle', pana nac xa' co' ngulàale' loo bé', co' nee di's, nac daa. No daa li le' mèn co' tyal yòo loo cón chenen, mèna yòo ban noque' Diox thidtene.

³⁴Sya, ndxab mèn loo Jesús: ―Tad, fta' U' pana par hua nu', tá.

³⁵Jesús ndxab loo mèna: ―Daa nac xa' co' ndli par yòo ban no mèn Diox thidtene xal ndli xít mèn no lua' mèn par ban mèn loo izlyo'. Mèn co' tyal yòo loo cón chenen no yila's mèn loon, mèna gàc xal mèn co' ne'gath huinte no co' ne'lyan'te thidtene. No mèn co' tyal yòo loo cón chenen no co' yila's loon, mèna gàc xal mèn co' ne'yecte lezo' thidtene.

³⁶Per daa guniile' loo gu': Mastale' gunèele' gu' daa, indxela'ste gu' loon no indxela'ste gu' loo con' ndlin.