Juan 6:3-36

³Igtikáddág si Jesus asta tô mga disipulu din tun ta pabungan, asta igunsad dan.

⁴Na, masig dán dumunggù tô kalimudan ka mga Judio na ágngadanan Kalimudan Ka Kalabé.

⁵Tô igsállág si Jesus, igkita din tô marapung manubù na ágsadun tun kandin. Igkagi si Jesus ki Felipe, na mà din, “Ánda é bálliyan ta ka pan ébô makakan dan?”

⁶Tô gó tô iginsà i Jesus ébô kinnaman din tô kapamaké i Felipe kandin, su taganà dán isóddóran i Jesus ka ándin tô lumun din.

⁷Igtaba si Felipe, na mà din, “Atin ka duwán duwa gatus (200) salapì na denario para pagbálli ta ka pan, dì makanángngà tô pan na pakannán katô marapung manubù.”

⁸Taddô tô sábbad disipulu i Jesus na si Andres na adi i Simon Pedro. Igkagi si Andres, na mà din,

⁹“Duwán mallaki kannun na igpid ka lima abuk pan na sebada, asta duwa abuk sáddà. Asal pamánnun ni, su tuu marapung tô mga manubù.”

¹⁰Igkagi si Jesus, na mà din, “Pónsad yu tô mga manubù.” Na, maluwag tô sigbáttán. Purisu igunsad dan. Mga lima mararan (5,000) tô mga gamama na ilimud.

¹¹Igkangé i Jesus tô lima abuk pan, igpasalamat tun ta Manama, asta igpatalad din para katô mga manubù na igunsad. Magunawa pagsik tô iglumu din katô sáddà sippang ka ibássug tô langun dan.

¹²Tô ibássug dan dán, igkagi si Jesus katô mga disipulu din, na mà din, “Limud yu tô samà ka ágkannán ébô dì ágkanugunan.”

¹³Purisu iglimud dan tô samà ka lima abuk pan na sebada, asta sapulù duwa (12) tô magdakál basket na ipánnù.

¹⁴Tô igkita tô mga manubù katô kasalábbuan na iglumu i Jesus, igkagi sikandan, na mà dan, “Sikandin gó tô bánnal propeta ka Manama na madun nit banuwa!”

¹⁵Asal igpanó si Jesus tikud tun kandan na sábbad din dád, asta igtikáddág puman sikandin tun ta pabungan, su isóddóran din na mirit dan pád kandin ébô imun dan na harì.

¹⁶Na, tô igsalláp dán tô álló, igtupang tô mga disipulu i Jesus sippang tun ta ligad ka ranó.

¹⁷Tô dukilám dán, agad ándà pa dunggù si Jesus, igsaké dan ka barangé ébô tumalipag dan tun ta Capernaum.

¹⁸Na, igdakál tô mga balud su mabákkár tô karamag.

¹⁹Tô igbugsay dan ka mga lima ó ánnám kilometro, igkita dan si Jesus na igpanó tun ta bówwó ka ranó, asta igpadani sikandin tun kandan. Imáddangan dan.

²⁰Asal igkagi si Jesus, na mà din, “Sakán ni. Yakó ágkamáddangan.”

²¹Purisu idayawan dan, asta igpasaké dan si Jesus tun ta barangé dan. Tigkô dád igdunggù dan tun ta lugar na sadunan dan.

²²Na, pagkasimag, tô mga manubù na igtananan ka mga disipulu tun dipag ka ranó, isóddóran dan na sábbad dád tô barangé, asta ándà tákkás si Jesus katô mga disipulu din katô kasaké dan.

²³Asal duwán mga barangé tikud tun ta Tiberias na igdunggù madani tun ta lugar na igkannan dan ka pan na igpasalamatan katô Áglangngagán.

²⁴Tô ikasóddór dan na ándà taddô si Jesus asta tô mga disipulu din, igsaké pagsik sikandan ka mga barangé, asta igsadun dan tun ta Capernaum ébô mamasak ki Jesus.

²⁵Tô igdunggù dan tun ta Capernaum, igkita dan si Jesus, asta iginsà sikandan, na mà dan, “Sir, kadángngan ka igdunggù kannun?”

²⁶Igtaba si Jesus, na mà din, “Paminág yu ni kagin ku ákniyu. Igpamasak kó kanak ánnà su igpamaké kó ukit katô kasalábbuan na igpakita ku ákniyu, asal igpamasak kó kanak su ibássug kó katô pan na igpakan ku ákniyu bani.

²⁷Yakó ágpamasak katô ágkakan na ágkandà dád. Asal pamasak kó katô ágkakan na dì ágkandà, su tô gó tô makabággé ka kantayan na ándà ágtamanán. Tô gó tô bággén ku ákniyu, su sakán tô Igpamanubù, asta igpasóddór katô Ámmà ku na Manama na sakán tô igpapid din.”

²⁸Purisu igkagi sikandan ki Jesus, na mà dan, “Ándin tô kailangan lumun dé ébô makatuman ké katô kakalyag ka Manama?”

²⁹Igtaba si Jesus, na mà din, “Ni gó tô kakalyag ka Manama na lumun yu. Pamaké kó kanak na igpapid ka Manama.”

³⁰Iginsà sikandan, na mà dan, “Ándin tô kasalábbuan na pakitanán nu áknami ébô mamaké ké áknikó? Ándin tô lumun nu?

³¹Su sayyan róggun igóddô tô mga kamónaan ta tun ta disyerto, igkan dan tô ágngadanan mana, su mà katô kagi ka Manama, “‘Igbággé din kandan tô ágkakan tikud tun ta langit.’”

³²Igkagi si Jesus, na mà din, “Paminág yu ni kagin ku ákniyu. Ánnà si Moises tô igbággé katô ágkakan tikud tun ta langit, asal tô Ámmà ku tô ágbággé ákniyu katô bánnal ágkakan tikud tun ta langit.

³³Tikud tun ta langit tô bánnal ágkakan na bággén ka Manama, asta tô gó tô makabággé ka kantayan tun ta mga manubù nit banuwa.”

³⁴Igkagi sikandan, na mà dan, “Sir, bággéyi ké kani ágkakan tukid ka álló.”

³⁵Igkagi si Jesus, na mà din, “Sakán tô ágkakan na ágbággé ka kantayan. Tô manubù na padani kanak asta mamaké kanak dì gó ballusán, asta dì gó katákkangan.

³⁶Asal taganà ku igkagi ákniyu na agad igkita kó kanak, ándà kó gó pamaké kanak.