San Juan 6:3-36

³Dxel wëꞌpaman tijb ruguiaꞌ abiꞌ gurenë ree xbejnman.

⁴Dxejzii ree ma zidyob pascw, xlanij ree bén Israel.

⁵Chi gules loj Jesús, abiꞌ baguiaaman zëëd ree bénguixiuj lod zaꞌman, dxel rëbaman loj Felip: ―¿Ban yusii ree ni gaw gra ree bén guin?

⁶Per rëbzaman zian din guidoon xhie guiëb Felip, din Jesús mal ragbeeman xhie güünman.

⁷Dxel badxiꞌ Felipan rëbaman: ―Niꞌqui ni rüjn bejn gan loj xhujn bëëw ad zadaant yoꞌ guiadxtil din gaw tijbgaj reeman majsi tibliaꞌdogajzan.

⁸Dxel gunee stijb xbejn Jesús, bén la Andrejs bijch Simón Bëd, rëbaman:

⁹―Laa tijb xindo caꞌ gaay guiadxtil con zatioꞌp bëjl zaꞌ guie. Per, ¿tëꞌczi taan ni guin par gra bén guin?

¹⁰Dxel rëb Jesús: ―Gol güjdx loj gra reeman din cwe reeman. Abiꞌ guial yuꞌ daꞌt guixyaꞌ yagaj, dxel gurej reeman. Na̱j reeman cost gaay mil xinguiaaw.

¹¹Dxel cwaꞌ Jesús guiadxtil guin ree. Chi gulox badëëman quixtëë loj Dios, badëëman laa reen loj ree xbejnman persi gudiꞌs reeman laa reen loj gra ree bén zojb yagaj. Ziangajc beenman con ree bëjl guin, badëëman laa reen ziꞌctzi guyën reeman.

¹²Chi ma bixienladx reeman, dxel rëbaman loj ree xbejnman: ―Gol batoꞌp gra ree ni laay bayaꞌn, chitëë xhie guizëëb.

¹³Zianz batoꞌp reeman laa reen, abiꞌ bacha reeman chiptioꞌp dxüm nilaay bayaꞌn ree loj gaay guiadxtil guin.

¹⁴Chi baguiaa ree bejn milagr naroob ni been Jesús, rëb reeman: ―Walican bén guin na̱j bén rudëë xtiidx Dios loj ree bejn, bén na̱j guiꞌt loj guidxliuj.

¹⁵Per gogbee Jesús guial rën reeman chinë naguiejn reeman laaman din güün reeman laaman rey, dxel bazaman yagaj, wëꞌpaman mazri ladya guijc guiaꞌ guin, lod su xtijbaman.

¹⁶Chi ma cabej guiaal, biguiajt ree xbejn Jesús roꞌnijsdoo,

¹⁷guyu reeman loj tijb barcw, abiꞌ cadëd reeman loj nijs guin din guidxin reeman Capernaum. Ma bicajy, guiáad Jesús gadaman yadxin.

¹⁸Dxel guzuloj cabiꞌ bidoxh abiꞌ wajs xtüjp nijs guin.

¹⁹Chi ma gojc ziꞌc gaay o xhoꞌp kilometro zë reeman, baguiaa reeman caza Jesús lojnijs guin cabigaman lod zë barcw guin, dád bidxeb reeman.

²⁰Per rëbaman loj reeman: ―¡Najn, ad rdxebidi!

²¹Dxel guyën reeman niuman loj barcw guin, per hor guin gajc bidxin reeman lod zë reeman.

²²Chi bareguiaal, bén rigaꞌ ree stiblad roꞌ nijs guin, ragbee reeman guial tijbzi barcw guzu yagaj, abiꞌ gogbee reeman, lojn zë ree xbejn Jesús per ad nët laaman.

²³Loj hor zii bidxin ree barcw ren za guiedx Tiberias, gajxh lod gudaw reeman guiadxtil chi gulox badëëd Jesús quixtëë loj Dios.

²⁴Chi baguiaa reeman achutri Jesús zaꞌ yagaj niꞌqui ree xbejnman, dxel wëꞌp reeman loj ree barcw guin, zë reeman Capernaum zigdiil reeman laaman.

²⁵Chi bidxin reeman Capernaum, badxejl reeman Jesús, abiꞌ gunabdiidx reeman lojman, rëb reeman: ―Mextr, ¿goc biꞌtil guie?

²⁶Badxiꞌ Jesúsan rëbaman: ―Ragbeechaawan, raguiilidi naj guial gudawidi xt bigdxinladxidi, ad guial baguiaatidi milagr ree ni rünan.

²⁷Ad chuꞌdi xgab guialraw rara, gol guyu xgab guialraw runee guialnaban tiblayaa con Dios. Din laan na̱j ni runee Bén guxhaal Dios loj guidxliuj guial ma bacaabee Dios laaman.

²⁸Dxel gunabdiidx reeman lojman rëb reeman: ―¿Xhie rayal yaguieenan din chileꞌ yaguieenan ni rën Dios?

²⁹Badxiꞌ Jesús laan rëbaman: ―Ni rën Dios güündi na̱j guial chililadxidi bén guxhaalaman loj guidxliuj.

³⁰Dxel rëb reeman lojman: ―¿Xhie gulüül dunujn din yaliduladxan lüj? ¿Xhietëë ree milagr rüjnl?

³¹Dux béngulal ree gudaw reeman mana chi guzu reeman niz loj yujbidx, ziꞌc rëb loj xtiidx Dios: “Badëëman guiadxtil biajb xanyabaa loj reeman gudaw reeman.”

³²Badxiꞌ Jesús laan rëbaman: ―Naj rni lojdi: Ad Moisejst badëëd guiadxtil guin, da Dadan na̱j bén runee quijb guiadxtil za xanyabaa.

³³Guiadxtil runee Dios, laan biꞌt diizd xanyabaa abiꞌ runeen guialnaban loj bénguidxliuj.

³⁴Abiꞌ rëb reeman lojman: ―Dad, banee guiadxtil guin du lojn zianczi.

³⁵Rëb Jesús loj reeman: ―Naj na̱j guiadxtil runee guialnaban guin. Bén guiꞌt lon, ad yuꞌt dxej guiliaanman, ziangajc bén chililadx naj, ad yuꞌt dxej cheꞌcaman nijs.

³⁶Per ziꞌc rnin lojdi, majsi ma baguiaadi naj, ad rliladxtidi naj.