Juan 18:4-13

⁴Pero e Jesús warix unata tunor lo que cꞌani anumuy y tamar era achpa locꞌoy y uyare e winicobꞌ y che: —¿Y chi war isajca tara? che e Jesús.

⁵Entonces ojronobꞌ e winicobꞌ y chenobꞌ: —E Jesús xeꞌ tuaꞌ e chinam Nazaret, che e winicobꞌ era. Y che e Jesús: —Jax nen, che e Jesús. Y e Judas xeꞌ war utuchꞌi e Jesús ya war tujam e winicobꞌ era ubꞌan.

⁶Pero conda ojron e Jesús cocha era y che: “Jax nen”, ixiobꞌ tupatobꞌ y cucremobꞌ tut e rum tunorobꞌ.

⁷Y ojron e Jesús otronyajr y che: —¿Y chi war isajca? Y che e winicobꞌ: —E Jesús xeꞌ tuaꞌ e chinam Nazaret, che e winicobꞌ era.

⁸Y che e Jesús: —Inwareoxix que: “Jax nen”. Y jay nen war isicbꞌen actanic chicobꞌ tunor tin e turobꞌ taniwejtzꞌer era, che e Jesús.

⁹Pues numuy tunor era tuaꞌ acꞌapa achempa lo que arobꞌna umen e Jesús que: “Mamajchi satpa tujam tin e ajcꞌunen umen Nitata”, que cay che e Jesús tama inyajr.

¹⁰Pues ayan inteꞌ winic tujam e sian winicobꞌ era xeꞌ ucꞌabꞌa Malco xeꞌ jax inteꞌ man tuaꞌ e más nuquir winquir tuaꞌ e inmojr sacerdotiobꞌ. Y tujam uyajcanuarobꞌ e Jesús turu e Simón Pedro xeꞌ qꞌuecher umener inteꞌ umachit. Y tamar era e Pedro ujajpi umachit y usani tama ujor e Malco pero jax taca uchiquin ujuxi ojri esto tut e rum.

¹¹Pero wacchetaca e Jesús uyare e Pedro y che: —Pedro, turbꞌan amachit tiaꞌ atajwi. ¿O war ca abꞌijnu que machi tuaꞌ innumse nibꞌa era? Pero bꞌan tuaꞌ anumuy porque Nitata bꞌan ucꞌani tuaꞌ inche, che e Jesús.

¹²Entonces e sian soldadobꞌ era y tin e quetpa ajcꞌotorer tujorobꞌ y cora sian policía xeꞌ tuobꞌ e templo ixin ucachiobꞌ e Jesús y uqꞌuechiobꞌ ixin.

¹³Y bꞌajxan uqꞌuechiobꞌ ixin esto tama uyotot inteꞌ winic xeꞌ ucꞌabꞌa Anás. Y e Anás era jax upixam e Caifás xeꞌ jax e más nuquir winquir tuaꞌ e inmojr sacerdotiobꞌ tama e año yajaꞌ.