JOAN 18:4-13

⁴Taa ju'u Jesus, si'imeta juka' au yeu weenemta betana jaibu ju'uneakai, yeu sikaa, intok inimmeu: ―Jabetasa eme'e jaiwa ―ti ameu nattemaek.

⁵Bempo: ―Juka' Jesujta, Nasaret tea'po jometa ―ti a' yoopnak. Ju'u Jesus intok: ―Ineponee juna'a ―ti ameu jiiak. Ju'u Juuraj teame, ju'u aapo'ik yeu bwisekame ket inime'emak ama weaman.

⁶Juka' Jesujta: “Ineponee juna'a”, ti ameu a' jiako, inime'e amau rukteka intok bwiau ko'om to'otek.

⁷Junak intok ju'u Jesus juchi: ―Jabetasa eme'e jaiwa ―ti ameu nattemaek. Bempo intoko: ―Juka' Jesujta, Nasaret tea'po jometa ―ti jiiak.

⁸Junak ju'u Jesus: ―Jaibu su ne enchim tejwaasuk in juna'atuka'po. Eme'e nee jaiwa'ateko, inime'e nemak rejteme am saka'atuane ―ti ameu jiiak.

⁹Ini'i inien tuk, jiba aapo'ik Jesujta, ju'ubwa jeela: “Jume'e, in yo'owata neu bicha yeu a' pu'aka'um betana, tua kaabe, jitat ta'abwisi eaka, nee betana au na'ikimtek”, ti a' teuwaaka'uta, junuen a' chupne' betchi'bo.

¹⁰Junak ju'u Simoo Peeo'o teame, ini'i, tebem sisi'iwook kuche'ekame, yeu am wikeka intok senuk, Malko' teaka, ju'u te'opopo tekiakammeu yo'ota sawe'uta, inika'a batatana naka chukti a' beebak.

¹¹Taa Jesus, ju'u Peotau: ―Jume' kuchi'im, em yeu am wikeka'po am ketcha. Inien, juka' in yo'owata, jiokot nee ino a' bit i'ao utte'atune, inien tua jiokot in ino bitnee'u ―ti au jiiak.

¹²Junak jume' sontaaom yeu pu'arim, ju'u ameu weyekamtamake, intok jume' te'opopo yee suuatuawame, inime'e, Jesujta bwiseka intok a' sumaka,

¹³chukula ket, bempo che'a bat ju'u Anaj teamta kariu a' tojak. Juka' Anaj teamta, ju'u Kaipaaj teame a' ase'ebwakan. Ini'i ju'u junae wasuktiat ama te'opopo tekiakammeu che'a yo'otuka'u.