Juan 18:4-13

⁴Jesusaqui c̈hjulut watac̈haja, jalla nii tjapa zizatc̈ha. Nii tjonchi z̈oñinacz̈quiz macjatz̈cu, pewczic̈ha, tuz̈ cjican: —¿Jectc̈ha kjur anc̈hucjo?

⁵Jalla ninacaqui kjaazic̈ha, tuz̈ cjican: —Wejrnacqui kjuruc̈ha Jesusa, nii Nazaret wajtchiz z̈oñi. Jesusaqui tuz̈ kjaazic̈ha: —Wejrtc̈ha niitqui. Judas, nii tarazuñi z̈oñiqui ninacz̈tan chica tsijtchi z̈elatc̈ha.

⁶Jesusaz̈ “Wejrtc̈ha niitqui” cjitiquiztan nii tanñi z̈oñinacaqui wir kjutñi atz̈cu porapat tewksarascu yokquiz tjojtassic̈ha.

⁷Jesusaqui wilta pewczic̈ha: —¿Jectpan anc̈huc kjurjo? —cjican. Ninacaqui wilta kjaazic̈ha, tuz̈ cjican: —Wejrnacqui kjuruc̈ha Jesusa, nii Nazaret wajtchiz z̈oñi.

⁸Jesusaqui nekztan zakaz cjichic̈ha: —Wejrtc̈ha cjichinsala. Anc̈hucqui wejr kjurc̈ha. Jaziqui tii parti z̈oñinaca cutznaquic̈ha.

⁹Jalla nekztan Jesusaz̈ tuqui chiita taku cumplissic̈ha. Tuquiqui Jesusac̈ha chiichiqui, jalla tuz̈: “Yooz Epiz̈ wejtquiz tjaata z̈oñinacaqui ana tsjiimi pertichinc̈ha”.

¹⁰Simón Pedruqui pajk cuchillchiztac̈ha. Jalla nii cuchillu jwescu, Pedruqui timplu jilirz̈ piyunz̈ z̈ew cjuñi pootz̈cu chjajtz̈inchic̈ha. Jalla nii cjuñi chjajtz̈inta z̈oñiqui Malco cjitatac̈ha.

¹¹Nekztanaqui Jesusaqui Pedruz̈quiz cjichic̈ha: —Am cuchillu cuchillz̈ z̈ejlz̈quiz quijtz̈na. Wejt Yooz Ejpz̈ pinsita kuz jaru wejtlaqui sufristanc̈ha. ¿Anaj wejr tii sufrasajo?

¹²Jalla nekztanaqui zultatunacami, zultatz̈ comandantimi, niz̈aza judío timplu wijilñi zultatunacami, jalla ninacaqui Jesusa tanz̈cu kjara jwerz̈inchic̈ha.

¹³Nekztan Anás cjita jilirz̈ kjuyquiz chjitchic̈ha. Anasqui Caifás ajmuz̈ ejptac̈ha. Jalla nii wata Caifasqui timplu chawjc jiliritac̈ha.