Josua 9:16-26

¹⁶Iwe, ülüngat rän mürin ar föri ewe pwonen atipeeu, ekewe chon Israel ra rong pwe ekewe aramas ir chon arur mi nom lefiler.

¹⁷Mürin ekewe aramasen Israel ra saila o tori än ekewe aramas telinimw lon aülüngatin rän. Nge iten ar kewe telinimw Kipeon, Kefira, Pereot me Kiriat-jearim.

¹⁸Nge ekewe aramasen Israel resap tongeni nirela pokiten än nöür kewe souemwen pwon fän akapel ngeniir iten ewe Samol mi Lapalap ewe Koten Israel. Mürin, unusen ewe mwichen Israel a lal ngeni ekewe souemwen.

¹⁹Iwe, ekewe souemwen meinisin ra üreni unusen ewe mwichen Israel, “Äm aia fen eäni pwon fän akapel ngeniir iten ewe Samol mi Lapalap ewe Koten Israel. Iei mine sisap tongeni afeiengaueer.

²⁰Nge iei meta sipwe föri ngeniir: Sipwe amanaueer, pwe än Kot song esap feitiu woch pokiten sia eäni ngeniir ewe pwon fän akapel.

²¹Sipwe amanaueer, nge repwe chon uwos mwüch me chon üfüf koluk fän itach meinisin.” Iwe, ra föri usun mine nöür souemwen ra üreniir.

²²Iwe, Josua a körato ekewe chon Kipeon o üreniir, “Pwota oua atupukem o üra pwe ämi oua feito seni fanü toau, ngei oua fen nom lefilem?

²³Ren ei oua anümamau. Aramas repwe nöünikemi amanau fansoun meinisin, oupwe uwos mwüch o üfüf koluk fän iten imwen ai Kot.”

²⁴Iwe, ekewe chon Kipeon ra üreni Josua, “Äm noum chon angang aia rongorong pwe a let mine ewe Samol mi Lapalap om we Kot a allük ngeni nöün we chon angang Moses, pwe epwe ngenikemi unusen ewe fanü o arosala chon meinisin me mwemi. Iei mine aia chüngümongüw manauem pokitemi o föri ei föför.

²⁵Nengeni, iei äm aia nom fän nemeniom. Kopwe föri ngenikem mine a mürina o pwüng me reöm.”

²⁶Iei usun mine Josua a föri ngeniir: A amanaueer seni ekewe chon Israel pwe resap nirela.