Joshua 6:12-23

¹²Me od Joshua nri kab kadbul u reb e rran riy, me fek e pi prist fare Kahol ko M’ag.

¹³Me yan fa medlip i prist ni kar feked fa medlip i yabul ni gagey ko saf ni pumo’on ngranod ni yad be m’on, ma yad be thoy. Ma be yan e pi salthaw ni yad ba m’on rorad, me yib e matanag nga tomur ko fare Kahol ko M’ag. Ma yugu be thow fapi yabul ni gagey ko saf ni pumo’on.

¹⁴Me chirofen ni migid miyad yan ngar liyeged fare binaw bayay, miyad sul ko gin be par piyu Israel riy. Nel’ e rran nra yodoromgad.

¹⁵Me chirofen ni gaman e medlip ngay miyad od ni be puf e woch ngranod ngu’ur liyeged fare binaw ni medlip yay ni ku aram rogon. Kemus ni rofen nem e ranod ra liyeged e re binaw nem ni medlip yay.

¹⁶Ma nap’an ni gaman e medlip yay ni kar liyeged nga tomuren nike thoy fapi prist fapi yabul, me ga’ar Joshua ngak fapi girdi’, “Mu tolulgad! I SOMOL e ke pi’ e re binaw ney ngomed.

¹⁷Re binaw nem nge urngin ban’en ni bay riy e kan turguy ni ngan kirebnag ni nge mang ba maligach ngak SOMOL. Kemus ni fare pin i Rahab nma chuway’ ngak, nge girdi’en e tabinaw rok e dab ni bit’ ngorad, ni bochan e mithag fa gali mol’og rodad.

¹⁸Machane gimed e ngam ted gimed u orel ko n’en ni bay ni kirebnag. Fa’an gimed ra fek ban’en ni kan turguy ni ngan kirebnag, ma gimed ra girengiy e gafgow nge riya’ ko gin be par piyu Israel riy.

¹⁹Ma urngin ban’en nni ngongliy ko silber, nge gol, nge bronze, nge wasey e ngan tay ni fan ngak SOMOL, ngan tay ngalan e tamachibgil rok SOMOL.”

²⁰Me thoy fapi prist fapi yabul. Ma nap’an ni rung’ag e girdi’ lingan, miyad tolul ni ba ga’ lamrad, me muchubu’ fare yoror nga but’ nib liyeg fare binaw. Me wethap ga’ngin fa raba’ i salthaw ngalan fare binaw nranod nib k’iy kanawo’rad ngar koled.

²¹Miyad li’ urngin e girdi’ u lan fare binaw ko saydon rorad, ni pumo’on nge ppin, ni pi’in ni bfel’ yangren nge pi’in kar pilibthirgad. Ma ku er rogon e garbaw nge saf nge dongki nra li’ed.

²²Me ga’ar Joshua ngak fa gali pumo’on ni fa’an ranow ndamit, “Marow nga tafen fare pin nma chuway’ ngak, ngam nonow ngak nge girdi’ nu tabinaw rok ngarbad nga wean, ni bod rogon ni mmichegew ngak.”

²³Ma aram miyow yan ngar piningew Rahab ngeb nga wean, nike un e chitamngin ngak nge chitiningin, nge pi walagen ni pumo’on, nge tin kabay e girdi’ ni girdi’en e tabinaw rok. Min fekrad ni yad gubin, ni girdi’ nu tabinaw nge pi sib rorad, min ta’rad nga wuru’ e gin be par piyu Israel riy.