يٌسُوٍ 6:12-23

¹²يٌسُوٍ نَشَ كٍلِ سُبَشّ مَ، سّرّشّدُبّيٍ نَشَ عَلَتَلَ شَ سَاتّ كَنكِرَ تٌنفٌ.

¹³سّرّشّدُبّ سٌلٌقٍرٍيٍ، قٍرِ سٌلٌقٍرٍيٍ سُشُشِ نَشٍيٍ يِ، نٍيٍ نَشَ عٍ حّرّ قْلْ عَلَتَلَ شَ سَاتّ كَنكِرَ يَ رَ، عٍ نُ قَ قٍرِ قٍ. مَكَنتَتِ سِنفٍيٍ تِشِ يَرٍ، عَلَتَلَ شَ سَاتّ كَنكِرَ يَ رَ. مَكَنتَتِ دْنشْييٍ قَن تِشِ عَ شَنبِ رَ، عٍ عٍ حّرّ مَ قٍرِ شُي مَ.

¹⁴عَ شِ قِرِن ندٍ، عٍ نَشَ تَا رَبِلِن سَنمَيَ كٍرٍن، عٍ قَ فبِلٍن حَمَ يٌنكِندٍ. عٍ نَشَ نَ مْولِ رَبَ شِ سٍننِ بُن مَ.

¹⁵عَ شِ سٌلٌقٍرٍ ندٍ، عٍ نَشَ كٍلِ سُبَشّ مَ، عٍ تَا رَبِلِن عَلْ عٍ دَرِشِ عَ رَ كِ نَشّ. كْنْ يِ بِيَاسِ، عٍ نَشَ نَ رَبَ سَنمَيَ سٌلٌقٍرٍ. عٍ تَا رَبِلِن سَنمَيَ سٌلٌقٍرٍ نَ شِ سٌلٌقٍرٍ ندٍ كَنسَن نّ.

¹⁶عَ سَنمَيَ سٌلٌقٍرٍ ندٍ، سّرّشّدُبّيٍ نَشَ قٍرِ قٍ قَ. يٌسُوٍ قَ عَ قَلَ حَمَ بّ، «وٌ سْنشْي رَتٍ، بَرِ مَ عَلَتَلَ بَرَ يِ تَا سَ وٌ بّلّشّ.

¹⁷عَلَتَلَ بَرَ يِ تَا رَتْن نُن عَ عِسٍيٍ بِرِن نَتْن، قٌ رَشَبِ لَنفٌي فِنّ كٍرٍنيِ ثٍتِ نَشَن نَتَنفَشِ، نُن مِشِ نَشٍيٍ بِرِن نَ عَ شَ بَنشِ كُي، بَرِ مَ عَ تَن نَن يِفِيَ قِ وٌن مَ شّيرَيٍ مَ.

¹⁸كْنْ وٌ عَ عِدْيِن سٍ رَتْنشِيٍ مَ، وٌ نَشَ كٍرٍن شَنِن وٌ شُن، شَ نَ مُ عَ رَ عِسِرَيِلَ حَمَ قِندِ مَ نّ سٍ رَتْنشِ رَ.

¹⁹فبٍتِ، شّيمَ، وُرٍ، نُن وُرٍ فبٍيلِ، نٍيٍ قِندِ مَ عَلَتَلَ نَن فبٍ رَ. وٌ شَ عٍ رَفَتَ عَ بّ.»

²⁰حَمَ نَشَ سْنشْي رَتٍ، سّرّشّدُبّيٍ نُ قَ قٍرِ قٍ. حَمَ تٌ قٍرِ شُي مّ، عٍ نَشَ سْنشْي فبٍفبٍ رَتٍ. تّتّ نَشَ بِرَ عَ يّتّ مَ، حَمَ قَ سٌ كٍرٍن نَ تَا كُي. تَا نَشَ قِندِ عٍ فبٍ رَ.

²¹عٍ نَشَ تَا رَتْن، عٍ نَ تَا مِشِ بِرِن قَشَ سَنتِدّفّمَ رَ، شّمّيٍ نُن فِنّيٍ، دِ مّيٍ نُن قٌرِيٍ، نِنفٍيٍ، يّشّييٍ نُن سٌقَلٍيٍ.

²²يٌسُوٍ نُ بَرَ عَ قَلَ يِ شّمّ قِرِنيِ بّ، نَشٍيٍ سِفَ يِ بْشِ رَبّندٍ، «وٌ سِفَ نَ لَنفٌي فِنّ شَ بَنشِ كُي، وٌ عَ رَ مِنِ عَ نُن عَ شَ مِشِيٍ بِرِن، عَلْ وٌ وٌ كَلِ عَ بّ كِ نَشّ.»

²³يِ سّفّتَلَ قٍ رَبّنيِ قِرِنيِيٍ نَشَ سِفَ، عٍ سَ رَشَبِ رَ مِنِ بَنشِ كُي. عٍ نَشَ عَ بَبَ، عَ نفَ، عَ تَارَيٍ، عَ شُنيَيٍ، نُن عَ بَرِبٌورٍيٍ بِرِن نَمِنِ، عٍ قَ عٍ مَكَنتَ عٍ كٍرٍنيِ مَ عِسِرَيِلَ حَمَ يٌنكِندٍ سّيتِ مَ.