Joshua 1

1

5

24

¹Maranai Bada ana taunola Moses i ʼraḡe; ma Joshua, Nun natuna ma Moses ana tauagu i riwei,

²“Au taunola Moses i ʼraḡe. Marina mai Israel maiteni ona vokaukaua ma Jordan ona damani da dobu a vereveremiana kampa ona ḡeta.

³Metaui dobui ae-lapalapami o terei, lamna ina viḡarimiei, Moses wenanare a parivainuaḡani.

⁴Ami dobu lamna mutulua Negev da Lebanon; au waira Euphrates (au maramatanei) da mai Hitti ai dobu anatapuna da i ḡaira madeḡa e arearere lana Mediteranean au bogana.

⁵Eḡa aiai ina vobelem bo ina viubaim am au lawana. Tau awarim ana mae, me Moses awarina a kaukauei nanare. Tau eḡa melanai ana tere-ḡairem bo ana voterem.

⁶—Parivainuaḡana bagibagina a kauei wei ravai noinoii maiteni da wei dobuna ana verei. Lamna aubaina ma virewapana ma tepam ina tora ma am rava ma ruiei wei au dobuna.

⁷Anina ma virewapana ma tepam ina tora; ma nuanuam eḡa ina vuru da tarawatu Moses i verem, anatapuna ma voteletelei. Ma ma vojijina-kauei da awarina eḡa ma deḡa au oiem bo au kelakelaum da aiwai anatapuna e kaukauei ina ai.

⁸Marana patapatai wei tarawatuna ma iaiavi. Ma marai da waguvarai ma vinua-notenotei; wei lamnei tarawatu anatapuna ma aramanei. Mepa da wenanare ma kauei lamna tam ma maura ma nuaiai ḡaeḡaena ma nelaḡai kaua au anatapuna.”