Jon 7:35-52

³⁵A ramano kum te Juda det ting etetalai det lena, “A musano ri in nan mo urai, ra ka dat in sio lar pasi? Pepetlai, in nan sur a kum tamon anun a taro Grik ra anundat a taro det kis iai? Kutiro in ususeri mo a taro Grik?

³⁶Uni i watungi lena dat in sisio suri ikut ka dat in sio pasi, ma ka dat in nan lar pas kai una tamon ra in kis iai. Asau a kukurai ina nun a wasiso ri?”

³⁷A ururop na bung ina kum lamlabino bung na lotu, i a labino bung sakit. Una bung ra, o Iesu i tur ma i wasiso namin labino walngano, i watungi lena, “Osi ra i muruk, i wakak sur in nan torom iau ma in inum.

³⁸Osi ra i nurnur un iau, ‘a kum danim na nilaun det in sal pat tagun anun a nilaun,’ elar nami ra di sa tumus tari una Buk Tabu.”

³⁹Una wasiso ri, o Iesu i wasiso una Tokodos na Nion. Ka di pitari utmakai a Tokodos na Nion, uni o Iesu ke losi utmakai anun a minamar. Numur, det ra det nurnur un o Iesu, din tabor det nami.

⁴⁰Ara taro tagun a kunur na taro ra det longoro a wasiso ri, det watungi lena, “A lingmulus ut, a musano ri, i a poropet ra o God i tulu ru i urin.”

⁴¹Ara taro kai det watungi lena, “I a Karisito.” Ma ara taro kai det watungi lena, “Awu. A Karisito ken nanpat tagitong o Galili.

⁴²A Buk Tabu i watungi lena, a Karisito in nanpat tagun a kabotaro anun o Dewid. In nanpat tong o Betliem, a tamon ra numugu o Dewid i kis iai.”

⁴³Ma a nuknukin a taro uni, ke takai.

⁴⁴Ara taro det nem na pam ukai i, ikut katutaio i tulan tar a pinino.

⁴⁵A kum tene tamtamabat tagun a rumu na etabor det milet melet, ra a kum lamlabino tene etabor torom o God ma a kum Parisi det ting det lena, “Sur asau ra ka mot dat pas o Iesu urin?”

⁴⁶A kum tene tamtamabat tagun a rumu na etabor det balu det lena, “Katutaio utmakai i ser wasiso elar nama musano ri!”

⁴⁷A kum Parisi det ting det lena, “Pepetlai, mot kai i sa ben raro pas mot?

⁴⁸Pepetlai, taio tagun met a kum mugumugu ma a kum Parisi, i sa nurnur uni? Awu!

⁴⁹A kunur na taro ri, ra det nurnur un o Iesu, ka det tasman a Warkurai anun o Moses. A kankan anun o God i sa kis un det.”

⁵⁰Ara Parisi tagun det, a risano o Nikodimas, i ra numugu i wanpat pas torom o Iesu, i watungi tandet lena,

⁵¹“Una nundat a Warkurai, ka dat in takun oros pas taio ra ka di longoro i utmakai. Din longoro mugu tari sur din tasman asau ra i pami.”

⁵²Det balu i kut lena, “Ni, ui kai a te Galili ui? Un ususer una Buk Tabu ma un mananos uni, lena a poropet ken nanpat tagitong o Galili.”