Zone 7:35-52

³⁵Meke vari zamai teledia sari na koimata d tadi na tie Ziu, “Pavei si kote la gua Sa, ke lopu kote boka dogoria gita? Gina kote la gua Nana koari na popoa tadi na tie Quriki d vasina pu koa sari kaiqa tie Ziu turaṉada pude la variva tumatumae koari na tie Quriki?

³⁶Zama si Asa, sapu kote hata ia gita si Asa, ba lopu kaqu boka dogoria, meke lopu kote boka la ia gita sa vasina pu kote koa ia Sa, gua. Na sa sapu gunia Sa?” gua si arini.

³⁷Koasa rane vina betobeto sapu sa rane nomana hola tugo tanisa inevaṉa, si turu se Zisu meke velavela va ululae guahe: “Asa sapu memeha si mani mae napo koa Rau!

³⁸Ura guahe sapu zama nia sa Kinubekubere Hope: ‘Asa sapu va hinokarau, si kaqu bukaha vura pa korapa bulona sa kolo tinoa.’ ”

³⁹Sa maqomaqona sa Tamasa si gunia Zisu, sapu kaqu vagia rini pu va hinokaria si Asa. Ba lopu ele ta poni koa rini sa Maqomaqo Hope pa totoso asa, sina lopu ele tava lavata pa Maṉauru se Zisu.

⁴⁰Totoso avosia ri kaiqa tie sari Nana zinama si zama si arini, “Hinokara asa tugo sa Poropita,” gua.

⁴¹Zama si kaiqa, “Hinokara, Asa tugo sa Karisito,” Ba zama pule si kaiqa, “Lopu kaqu vura mae pa Qaleli sa Karisito.

⁴²Ba zama sa Kinubekubere Hope, sapu sa Karisito si kote mae gua pa tutina e Devita, meke kote podo si Asa pa Betilihema, koasa vasileana te Devita,” gua si arini.

⁴³Ke koasa guguana mo e Zisu, si ta paqaha rua sa kobi tinoni.

⁴⁴Kaiqa arini si hiva tuqe vagia si Asa, ba lopu keke arini hite taṉini la ia si Asa.

⁴⁵Meke sipu pule la sari na tie kopu Zelepade, si nanasa la i rina ṉati hiama na Parese si arini, “Na vegua ke lopu turaṉa mae nia gamu si Asa?” gua.

⁴⁶Meke olaṉa sari na tie kopu, “Na lopu ele hite avosia gami si keke tie sapu zama gua sa tie hie,” gua si arini.

⁴⁷Meke zama sari na Parese, “Ai gamu ba ele ta sekesekei tugo koa Sa?

⁴⁸Vegua, gilania gamu sapu lopu keke rina koimata, babe gami na Parese si va hinokaria si Asa?

⁴⁹Ba sari na kobi tinoni hire si lopu tumae nia rini sa tinarae te Mosese, ke ta levei koe Tamasa si arini!” gua sari na Parese.

⁵⁰Ba se Nikodimasi sapu keke mo koari kasa Parese sapu la koe Zisu pana boṉi, si zama la koa rini,

⁵¹“Pa tinarae te Mosese si lopu boka zutua gita si keke tie be lopu ele avosia meke gilana pakia gita, sapu gua ele tavetia sa,” gua si asa.

⁵²Meke olaṉa la koasa si arini, “Vegua, agoi ba keke tie Qaleli tugo? Hata ia pa Kinubekubere Hope, mamu gilania sapu namu loke poropita hokara si kote vura mae gua pa Qaleli,” gua si arini.