Jan Laabaalihamo 7:35-52

³⁵Lanyaapo Jufinba den tua bi yaba: O baa gedi hali le yo, ke ti kan go le o? O nan baa gedi yaa Jufinba n yayadi ki ye bi nilanba siiga yeni ki ban bangi bi nilanba yeni moko bii?

³⁶Wan maadi yaa maama ne bua ki yedi be yo? Yi baa ti lingi nni yi kan le nni. Yi kan fidi ki cua min baa ye naankani yeni mo.

³⁷Mi jaanma yeni badu dancianli daali yaali n tie li da juodikaali. Jesu den fii ki sedi ki kpaani ki yedi: ñuñuulu ya pia yua wan cua n kani ki ño,

³⁸Yua n daani nni li miali kpenciamu baa puubi ki ña o niini nani idiani n yedi maama.

³⁹Wan den yedi yeni, o den maadi U Tienu fuoma yua yaa maame. Yaaba n daani wani Jesu n baa ba yua, U Tienu fuoma yua daa den jiidi bi po, kelima Jesu daa den kua o kpiagidi nni.

⁴⁰Ku niligu siiga bi tianba den gbadi laa maama ki tua: One li tie sawalipualo moamoane.

⁴¹Bi tianba den tua: Wan tie U Tienu n gandi yua, bi ne mo den tua naani U Tienu n gandi yua baa ña Galile yo?

⁴²Naani idiani ki yedi ke UTienu n gandi yua baa tie Davidi puoli huanu, ki go ña Betelema dogu nni kaa? Lan tie Davidi dogu.

⁴³Lanyaapo yo mi paadima den tieni ku niligu siiga kelima Jesu po.

⁴⁴Bi siiga bi tianba den bua ki cuo o, ama o bakuli ki den sii o.

⁴⁵U Tienu diegu jiidikaaba n den guani bi kopadicianba yudanba leni Falisieninba yeni kani, bi den buali ba: Be n teni ke yii cuani o?

⁴⁶Bi jiidikaaba den guani ki yedi ba: Nisaalo bakuli ki maadi nani laa joa n maadi maama.

⁴⁷Falisieninba den guani ki buali ba: O boandi yi moko bii?

⁴⁸Naani li pia bi yudanba leni Falisieninba siiga yaaba n daani o bii?

⁴⁹Ama ku naa niligu yaaba n ki bani Musa balimaama tie ban soli yaaba.

⁵⁰Nikodema bi siiga yua, yua n den kpa gedi Jesu kani ku ñiagu yeni den yedi ba:

⁵¹Naani ti balimaama puni usanu ban jia o nilo buudi kaa kpa cengi o, ki bandi wan tieni yaala?

⁵²Bi den guani ki yedi o: Amoko tie Galile yua bii? han lingi idiani nni a kan le ke sawalipualo ñani Galile.