Jon 21:5-25

⁵Pa e Iesu i deken la mange, “Kakakla, mulo dat pas ot al sis?” La puai mang, “Belal.”

⁶E Iesu i atai la mange, “Mulor minggen a uben ana ris a sot a kumulo, sur mulor dat pas al sis.” Pa la minggeni larning i atai la. Pa la datdat panan a uben, anasa ka bukus ana sisla.

⁷A kaklik asasaer ning e Iesu i katnani, i atai e Pita mange, “A Leklek ot numo!” Ning e Saimon Pita i longori mang a Leklek, i pipis ulak pas a kaen ning i paksen tari, pa i sirok uting latasi.

⁸A kakak a asaer la mur ana mon utumo latasi. Pa la dat purum a uben ning i bukus ana sisla, anasa bel la kes bakbak kusun a hang, i arlar ka ona takai a mar a param.

⁹Ning la sot ana mon, la oroi a barang a iah taum ana sisla kaning onoi, pa la oroi otleng a bretla.

¹⁰E Iesu i atai la mange, “Mulor los al sis ute miting na sisla ning nokane mulo uben pasi.”

¹¹Pa e Pita i kas ana mon, pa i dat purum a uben utumo latasi. I bukus ana tatatnan sis, a wawas onla i arlar ana takai a mar dilima na bonot pa pisir natol. La galis kol, ika a uben bel i taksilir.

¹²E Iesu i atai la mange, “Mulo han ute pa mulor hangan.” Bel tik tagun anuna kakak a asaerla i tolsot sur ir dekeni mang, “U esi?” La ka tasmani mang a Leklek ot ning.

¹³E Iesu i los pas a bret pa i tabar la ono, pa lamur i tabar la kale ana sis.

¹⁴Ka munatol na tuntunurot ne ane Iesu tetek anuna kakak a asaerla lamur ana kamkamtur anunai kusun a minat.

¹⁵Ning la ka hangan pas, e Iesu i deken e Saimon Pita mange, “Saimon, nat e Jon, u mang kol sur iau tanla ne?” I kelesi mange, “Momol, Leklek, u tasmani mang a mang sur u.” E Iesu i atai i mange, “Ur tabar anuk na tona sipsipla.”

¹⁶E Iesu i deken ulaki mange, “Saimon, nat e Jon, u mang kol sur iau?” I kelesi mange, “Momol, Leklek, u tasmani mang a mang sur u.” E Iesu i atai i mange, “Ur tai alar anuk na sipsipla.”

¹⁷Munatol onoi e Iesu i dekeni mange, “Saimon, nat e Jon, u mang sur iau?” E Pita i nuklingiri, anasa e Iesu ka dekeni munatol mang, “U mang sur iau?” I atai i mange, “Leklek, u tasman a ututnala rop. U tasmani mang a mang sur u.” E Iesu i atai i mange, “Ur tabar anuk na sipsipla.

¹⁸“A atong momoli tam, ning u barman, u ot u amermer pas u, pa u han ana pukna ning u mang sur ur han ia. Ika ning u ka bun, ur atostos naur a kum, pa tik masik ot ir amermer u, pa ir ben u ana pukna ning bel u mang sur ur han ia.”

¹⁹E Iesu i atongi larne, sur ir aslang a ngas a hinirua ning ir kibas e Pita. Ana nuna hinirua ning ir aleklek e God. Lamur i atai i mange, “Ur mur iau.”

²⁰E Pita i talingir pa i oroi a kaklik asasaer ning e Iesu i katnani kaning i mur diau. Esaning i tan tar o e Iesu ning la hangan, pa i deken e Iesu mange, “Leklek, esi ma ir tuam tar u?”

²¹Ning e Pita i oroi, i deken e Iesu mange, “Leklek, mangmangasa ma a barsan ne?”

²²E Iesu i kelesi mange, “Ning a mang sur ir laun tuk ning ar ulak, bel a utna anumi. Ika u, ur mur iau.”

²³A warwara ne, i kamkamna sur ning a warwara otleng i han sarara tetek la ning la tortorot, mang a kaklik asasaer ne bel ir mat. Ika e Iesu bel i atongi mang bel ir mat, i atongi ka mange, “Ning a mang sur ir laun tuk ning ar ulak, bel a utna anumi.”

²⁴A kaklik asasaer kane, i ning i warwara talapor ana ututnala ne, pa i tumus akesi. Pa dala tasmani mang anuna warwara talapor, i momol kol.

²⁵E Iesu ka tol tar a galis a ututnala otleng. Ning dir tumus arop la, a nuki mang a rakrakan hanua bel i itna sur dir suah a bukla rop onoi.