Yohana 21:5-25

⁵Bai Yesu ngabakonya, “Achikakombo mpatiteje yamaki?” Ngabajanga, “Tupatitije kilebe.”

⁶Yesu ngabalengela, “Nnekele lipelele kingonu chakalelo ja ntumbwi, namangweto mampata yamaki.” Bai ngabalekela lipelele nambu ngoe baotwije kuuta kabele, magambu ikajoloka yamaki.

⁷Penia napunji jwajo ojwapaligwe na Yesu ngannenge Petulo, “Ngangwana!” Simoni Petulo apajowa Ngangwana, ngakitaba ngobo jakwe maana akiba makengele, ngagoloke umache.

⁸Nambu baba akinapunji bange ngabaika kumbwani na ntumbwi kongo bakauta lipelele elitweli yamaki. Bakiba kutaalije na kujomo, ila bakiba kube kipemo cha meta mia jimwe kuboka muluboga.

⁹Pabaika kujomo ngabaubona mwoto gwa makala upambigwe na panani jakwe pabekigwe yamaki na nkate.

¹⁰Yesu ngabalengela, “Nnetange pamba yenge yamaki yannopwile.”

¹¹Bai Simoni Petulo ngaombe muntumbwi, ngajomboka mpaka kujomo lipelele lyale elitweli yamaki ngolongolo mia jimwe na amusini na itatu, naiganukube yamaki ndu yene lipelele linyopwikije.

¹²Yesu ngabalengela, “Nhwikange nnabuke.” Akibaje wala jumwe kati ja akinapunji jwajigite kunkonya Yesu, “Mwe mabene?” Maana bamanyi benia Angwana.

¹³Yesu ngaika, ngatola nkate, ngabape. Ngatenda uyo na yamakiye.

¹⁴Penia pakiba kingobu cha patatu Yesu kapitila akinapunji bakwe kuboka ja kuyoka kuboka kwa abawile.

¹⁵Pabajomola kulye, Yesu ngankonya Simoni Petulo, “Simoni mwana jwa Yohana! Bo, umbaile nenga kupeta ababa?” Petulo ngajanga, “Umo Angwana, umanyi nenga nampaile mwe.” Yesu ngannengela, “Nng'oye yana yamambelele gango.”

¹⁶Yesu ngannenge mala ja pabele, “Simoni mwana jwa Yohana, umbaile?” Petulo ngajanga, “Umo Angwana, umanyi nampaile.” Yesu ngannengela, “Nng'oye mambelele gango.”

¹⁷Yesu ngankonya mala ja patatu, “Simoni mwana jwa Yohana, Bo, umbaile?” Petulo ngaechuka magambu ankonyite mala ja patatu, “Umbaile?” Ngannengela, “Angwana, mwe mmanyi goa. Mwe mmanyi kutenda mbi kumpala.” Yesu ngannengela, “Nng'oye mambelele gango.

¹⁸Nannengela kweli, pamakiba makakombo mayobalile kujenda okumpaala. Nambu pampakube machiokolo mpakutondobea maboko ginu, na mundu jonge apakuntaba na kumpeleka kwangapala kujenda.”

¹⁹Kukulenga genia, Yesu alondola kiu chapakuwe Petulo na kunkoya Nnoongo. Kuboka penia ngannengela, “Ungengame!”

²⁰Penia Petulo ngatendabuka, ngammona jwajo napunji ojwampaile Yesu akakengama napunji jwenio ngajwajo jwatamita papipi na Yesu kingobu cha kulye ndalilo na kunkonya, “Angwana ngabeneke abapakung'aluka?”

²¹Bai Petulo apammona jweno, ngankonya Yesu, “Angwana, ojo bo?”

²²Yesu ngannyanga, “Andambai aigale mpaka pambakuika, ganhusu nike? Ungengame!”

²³Bai nhwalo gweno nguujoanika kubene akangwetojika napunji jwenio ajomokaje. Nambu Yesu annengije kutenda ajomokaje. Ila ngalenga, “Anda mbala aigale mpaka pambakuika, ganhusu nike?”

²⁴Jwenio nga napunji jwachalakicha genia nu kugaandika. Na twe tumanyi agalongile nga kweli.

²⁵Ibi ilebe yenge ijingi yatendite Yesu. Yene ikaandikigwe yoa, chimwe chimwe, mbemele ata dunia jene jakabi ikwelitije.