SAN JUAN 21:5-25

⁵ꞌBa Jesús kitsure: —Jun naꞌen, ¿a kje xuntsjajíun tjiuti? ꞌBa nchjabiu kitsingojore: —Junjun.

⁶ꞌBa Jesús kitsu nganire: —Ngate kixire barku chanikjoꞌo naꞌyanu ꞌba sa̱kunu. ꞌBa ꞌba kitsaꞌen nchjabiu, ꞌba ninga bi nde ma kjenijinni naꞌyo, ngatꞌa ne nkjin tjiuti kiskaya naꞌyare.

⁷ꞌBa ꞌbatsaꞌen xutare xi Jesús ꞌñu tsimején kitsure Pedro: —¡Naꞌenna kibiu! ꞌBa kionga Simón Pedro kjintꞌe nga ꞌba kikꞌinre: “Naꞌenna kibiu”, tsakaja ngani najñure (ngatꞌa tsꞌaxje) ꞌba kiskijin ndachikun.

⁸ꞌBa jaskan xutare xi yakꞌa echuko barku nga inyaꞌbefe naꞌya xi kitse tjiuti, ngatꞌa bi kjin mare nangi kixiu ña kui inya, jeru mején jngu sientu metro.

⁹ꞌBa kionga nchjabiu ꞌetukajen barku, tsabe ndiꞌi xꞌi, ꞌba jngu tjiuti kjijñajin ko niñuxtila.

¹⁰ꞌBa Jesús kitsure: —Ndeko masion tjiuti xi kisakunu.

¹¹Kui kjuañu tsijunni Simón Pedro barku ꞌba ꞌefe ña nangi naꞌya xi kitse tjiuti yaꞌe, xi jngu sientu masen ko ján mani. ꞌBa ninga tsa ꞌbatsaꞌen nkjin mani tjiutiu, tunga bi ꞌejnda naꞌyo.

¹²ꞌBa Jesús kitsure nchjabiu: —Ndechino. ꞌBa nijnguú xutare kuán kakun nga tsiningiyare: “¿ꞌYá= ni ji?”, ngatꞌa be= nga Naꞌenna kibiu.

¹³ꞌBa ꞌbatsaꞌen Jesús kitsitiñatꞌare ꞌba kiskjebe niñuxtilo ꞌba kitsjare nchjabiu, ꞌba ꞌba nde kitsaꞌen ko tjiutiu.

¹⁴Kibi= xi majánni ndiya nga Jesús kuatsejenre xutare, jaskan nga je jaꞌaya nganire ngajinre mikꞌen.

¹⁵ꞌBa kionga je tsakjen, Jesús tsiningiyare Simón Pedro: —Simón, kiꞌndire Jonás, ¿a ngisa= ꞌñu nimejénnaa̱ ji nga ko mare nchjabi? ꞌBa Pedro kitsingojore: —Jun naꞌen, ꞌyani nga tsimejénra̱ ji. ꞌBa Jesús kitsu nganire: —Tikuendai chutsangana̱.

¹⁶ꞌBa tsiningiya nganire xi majóni ndiya: —Simón kiꞌndire Jonás, ¿a nimején=naa̱? ꞌBa Pedro kitsingojo nganire: —Jun naꞌen, ꞌyani nga tsimejénra̱ ji. ꞌBa Jesús kitsure: —Tikuendai chutsangana̱.

¹⁷ꞌBa tsiningiya nganire xi majánni ndiya: —Simón kiꞌndire Jonás, ¿a nimején=naa̱? ꞌBa Pedro kuabare nga kichjaningiyare xi majánni ndiya: “¿A nimején=naa̱?”, ꞌba kitsure: —Naꞌen, ꞌya yejeni xi tjin. ꞌYa=ni nga tsimejénra̱ ji. ꞌBa Jesús kitsure: —Tikuendai chutsangana̱.

¹⁸Kjuakixi= xi texinra̱. Kionga saꞌe kiꞌndi, kichaja tajngu=ni najñuri tuxi kꞌuinni nituña ña kuamejénri. Tunga kionga je ku̱achingai, kjuente=ni ndsai ꞌba tjin= xi sikajari najñuri ꞌba kuekori ña ji bi mejénri kꞌuin.

¹⁹Nga ꞌbi kitsu Jesús, kitsuyatitjuun jótsaꞌen kueya Pedro nga kuakutsejen kjuajere Naꞌenchana. ꞌBa jaskan kitsure ngayeje: —Ndetjenngina.

²⁰ꞌBa ꞌbatsaꞌen Pedro kiskutsejen ngastun ꞌba tsabe nga tjenngire xutare xi Jesús ꞌñu tsimején, xi tijñatꞌa tiñare Jesús kionga kiskine xichine sꞌi pascua ꞌba xi jaꞌba je tsiningiyare: “Naꞌen, ¿ꞌyá xi singantsjari?”

²¹ꞌBa kionga Pedro tsabe xutabiu, tsiningiyare Jesús: —Naꞌen, ꞌba kui xutabi, ¿mé= xi ku̱anre?

²²ꞌBa Jesús kitsure: —Tsa mejénna̱ nga janda kꞌuejña kaꞌnda nga kjuaꞌe ngañaa̱, ¿mé= kuendari? Ji ndetjenngina.

²³Jaskan kiya enbi ngajinre xi makjainre ngatꞌare Jesús, nga bi kueya xutare kibiu. Tunga bi ꞌba kitsu Jesús, tsa bi kueya xuto. Tu kitsu sani: “Tsa mejénna̱ nga janda kꞌuejña kaꞌnda nga kjuaꞌe ngañaa̱, ¿mé= kuendari?”

²⁴ꞌBa ndekuini xutare xi tsuyakixi ngatꞌare kibiu ꞌba kui kitsiꞌindu kibi. ꞌBa ꞌya=ni̱ nga kjuakixi= en xi kinchja.

²⁵ꞌBa tjin= ngisa kjaꞌe tsajmi xi kitsaꞌen Jesús. ꞌBa tsa jngu jngu sꞌe̱tꞌa ngayéje xi kitsaꞌen, biru sꞌe̱n ngayéje ngasunꞌndio xujun xi sꞌe̱tꞌa kibiu.