San Juan 21:5-25

⁵Jesús oquimiluih: —Notlasohicniuan, ¿xamo yonanconahsiqueh itlah tlen itcuasqueh? Yehuan ocnanquilihqueh: —Amo.

⁶Ihcuacon Jesús oquimiluih: —Ixcontitlanican in red tlayecmapan den barca uan nanquimonahsisqueh. Yehuan ohcon occhiuqueh, uan acmo ouiliah ocquixtayah in red, quen tlailiuis miqueh peces oquintzitzquihqueh.

⁷Ihcuacon nitlasalohcau Jesús naquin Jesús simi octlasohtlaya oquiluih in Pedro: —¡Yeh yen toTecotzin! In Simón Pedro ihcuac oquicac nic yeh ninTecotzin, ocmoquentih nitlaquen, pues amo otlaquentoya, uan omopantlatiuih itich in mar.

⁸Nocsiqui itlasalohcauan oualahqueh itich in barca, ocualtilantahqueh in red iuan in peces, pues amo uehca ocatcah itenco in mar, san queh se ciento metro.

⁹Ihcuac otimoqueh itich in barca oquitaqueh tlixochtli, uan ipan in tlixochtli se pescado, uan pan.

¹⁰Jesús oquimiluih: —Ixconualicacan siquin pescados tlen yaquin onancoualquixtihqueh.

¹¹Simón Pedro otlehcoc itich barca uan octilan in red hasta itenco in atl, tentoc ica se ciento ome poual uan mahtlactlameyi (153) peces uehueyinten. Uan masqui hasta ohcon miqueh, in red amo otzayan.

¹²Jesús oquimiluih: —Xouiquih, namontlacuasqueh. Uan dion se itlasalohcau amo omixeuaya ictlahtlanis: “¿Aquih in touatzin?”, nic ocmatoyah yehua ninTecotzin.

¹³Jesús omotoquih, uan oquian in pan uan oquinmahmactih, uan noiuqui ohcon oquichiu ica in pescado.

¹⁴Ica nin ya ic yexpa Jesús omonextih innauac nitlasalohcauan satepan ihcuac yoyancuicayol itich miquilistli.

¹⁵Satepan ihcuac otlamitlacuahqueh, Jesús octlahtlanih in Simón Pedro: —Simón Pedro, iconeu in Jonás, ¿itnechontlasohtla ocachi uan amo nicancateh? Pedro ocnanquilih: —Quemah, noTecotzin, touatzin itconmati nic inmitzonniqui. Jesús oquiluih: —Ixquimonita nocolelohuan.

¹⁶Jesús ic opa octlahtlanih: —Simón, iconeu in Jonás, ¿itnechontlasohtla? Pedro ocnanquilih: —Quemah, noTecotzin, touatzin itconmati nic inmitzonniqui. Jesús oquiluih: —Ixquimonpia nochcauan.

¹⁷Jesús ic yexpa octlahtlanih: —Simón, iconeu in Jonás, ¿itnechonniqui? Pedro otlaocox nic Jesús octlahtlanih ya ica yexpa: “¿Itnechonniqui?”, uan ocnanquilih: —NoTecotzin, touatzin itconmati nochi. Touatzin itconmati nic inmitzonniqui. Jesús oquiluih: —Ixquimonita nochcauan.

¹⁸Tlamilauca yec inmitzoniluia, ihcuac otoncatca ocachi oc tontelpocatl, otonmotlaquentaya uan otoyaya campa otconniquia. Pero ihcuac tonisqui tontetahtzin, itquimonahcocuis momauan uan ocse mitzontlahcoilpis uan mitzonuicas campa touatzin amo itconniqui toyas.

¹⁹Jesús ohcon oquihtoh uan ohcon ocahsicamatiltih in Pedro quenih omiquisquia, uan ica nimiquilis icuehcapantlalis Dios. Uan ihcuac octlamiihtoh oquiluih: —¡Xouiqui nouan!

²⁰Ihcuac omocuitlapantlachilih in Pedro, oquitac nic incuitlapan oyaya nitlasalohcau Jesús naquin Jesús simi octlasohtlaya, naquin ihcuac occuahtoyah in pascuahtlacual omocuatoquih inauac Jesús, uan octlahtlanih: “NoTecotzin, ¿aquih mitzontemactis?”

²¹Ihcuac in Pedro oquitac, octlahtlanih in Jesús: —NoTecotzin, ¿uan necah, tlenoh ipan mochiuas?

²²Jesús ocnanquilih: —Tla neh inniquis mai hasta ihcuac inualmocuipas, ¿touatzin, tlen motiquiu? Touatzin xouiqui nouan.

²³Ica non, nin tlahtol omoxinih innauac in tlaniltocanih, octouayah non itlasalohcau in Jesús amo omiquisquia. Pero Jesús amo oquihtoh amo omiquisquia, tlayeh oquihtoh: “Tla neh inniquis mai hasta ihcuac neh inualmocuipas, ¿touatzin, tlen motiquiu?”

²⁴Yeh nin itlasalohcau Jesús naquin ictematiltia tlen omochiu, uan oquihcuiloh nochi nin. Uan itmatih nic tlen icteixmatiltia yeh milauac.

²⁵Cateh noiuqui ocsiquin miqueh chiualisten tlen oquichiu in Jesús. Tla omihcuilosquiah sehse tlen Yehuatzin oquichiu, inyoluia in amatlahcuilolten tlen oquimihcuilosquiah amo oaquisquiah itich in tlalticpactli. Amén.