Jon 21:5-25

⁵Mako i nina or ve, “Thengengekre, o paural vet silang pelie?” Ave o olal ile riong ve, “Avele, posispot.”

⁶Mako i ria or ve, “Thomu o ulu omu susua a wok epee a menumu sivenga nge anga mo aro o paural silang pelie.” Mako o ulu ol oa susua, ave o pavurvur nge imontetanga avele, eneke silang pulua o uro nge.

⁷Na Jon ako ini a Jisas ile wainlanga ako ia sagu rintet i, i ria Pita ve, “Aken ini a Toko Pomnga.” Ma Pita i nongpol ako ve, toko ako i lengpot or ini a Toko Pomnga, mako i teun werer ia neong, eneke i teuntetpot tel i lale. Ma i opthou a thei lemi la ma i keo a thei wopo la.

⁸Na Jisas ile wainlangaere ako rongan o voth a wok nge, o rumongal nge i ma o montet oa susua ako i vual rintet nge silang ma o mono a wopo la. Na o melapot nge thei wopo avele, i pavurvur nge mita or mule pa mule.

⁹Na nge ako o pelo a thei wopo, o thopol silang na bret ako i ngo a won sesenga mikeri nge.

¹⁰Lamako Jisas i ria or ve, “O ela silang pelie ako o paural i mo o el i me.”

¹¹Na Saimon Pita i ro a wok nge mo aro i titpoo susua a wopo me. Na susua aken i vual nge silang aoliloenga. Na oa titaling i pavurvur nge 153. Na silang i pom rintet, aveto susua i minra avele.

¹²Mako i ria or ve, “O es me mo o an.” Ave oa ko e avele ilemi i mit engeng i pavurvur ako aro i nina i ve, “Ong ini ao?” Eneke olemi mire ako ve, ini a Toko Pomnga.

¹³Mako Jisas i es ma i ela bret ma i sungu i a or nge, na i oma vene mun aken nge silang.

¹⁴Na ake ini ile velpoling pa menga a ile wainlangaere nge ako i rin ma i los werera.

¹⁵Na o an ma i vus, mako Jisas i ria Saimon Pita ve, “Saimon ako ini a Jon itun, lom asaguong nge tho i mukal nge toko areke ole asaguong nge tho?” Mako i olal ile riong ve, “Enala, Toko Pomnga, lomum mire ako ok sagu ong.” Mako Jisas i ria mun i ve, “Aro ong theal lek tokokoere ranga ve ini sipsipre.”

¹⁶Mako Jisas i ria mun paininga a i nge ve, “Saimon ako ini a Jon itun om sagu tho?” Mako i olal werer mun ile riong ve, “Enala, Toko Pomnga, lomum mire ako ok sagu ong.” Mako Jisas i ria mun i ve, “Aro ong theal lek tokokoere ranga ve ini sipsipre.”

¹⁷Na Jisas i ria mun pa menga a i nge ve, “Saimon ako ini a Jon itun om sagu tho?” Ma Pita ilemi kerere, eneke Jisas i nina i pa or me ve, “Om sagu tho?” Mako i ria i ve, “Toko Pomnga, lomum mire nge ur alavusnga, na lomum mire ako ve, ok sagu ong.” Ma Jisas i ria mun i ve, “Aro ong theal lek tokokoere ranga ve ini sipsipre.

¹⁸Na tho ri nunganga a wong nge, ako nge wop lemi ako rongan ong apo, ong pateunu sivengom, na ong es nge wop ako lomum ve aro ong es nge. Aveto aro ong toloku, aro ong paespot menum na toko relnga e aro i pateunu wong naro i ti wong nge wop ako num plong ve aro ong es nge.”

¹⁹Na Jisas i ri riong aken mo aro i ritet nge sovengalo ako aro Pita i rin nge na i papomnga a God nge. Lamako Jisas i ria i ve, “Panes tho.”

²⁰Na Pita i eksinga werer ma i thopol a Jon ako ini a Jisas ile wainlanga ako ia sagu rintet i, ako i panes or. Na ini toko aton ru i men thalu a Jisas nge aning na ipo wathtun i mo i nina i ve, “Anga ako aro i sungu ong a ngarangre omeni?”

²¹Ma Pita i thopol i, mako i nin a Jisas ve, “Toko Pomnga, i vava nge toko ake? Aro i rin vava?”

²²Na Jisas i olal ile riong ve, “Aro ve lemik ve aro i mimi mo la i pavurvur nge lek lo wererong me, aken ini lek omaing. Na i vava ake lomum nge? Panes inga tho.”

²³Mako riong i kima ol a ile wainlangaere nge ve ile wainlanga aton aro i rin avele. Aveto Jisas i ri venen aken avele, i ri inga ve, “Aro ve lemik ve aro i mimi mo la i pavurvur nge lek lo wererong me, aken ini lek omaing. Na i vava ake lomum nge?”

²⁴Na tho ini a Jon ako tho ritet nge ur elonga areken na tho watu ir. Na lomumu mire ako ve, lek riong i nunganga.

²⁵Na ur pulua mun ako Jisas i oma i. Na aro ve o watu ir omole omole a erere nge, lemik ve aro ulue ake i pavurvur nge omei avele. Na i re aken. I vus.