Jon 1:28-43

²⁸Te po bulu me nogi Betani te badu pedalai, te ąį nogi Jordan sesege badu. Te bulude Jongo augwali Juda we bidi baptais mawai.

²⁹Te sogo kigamu Jisas asobo Jongo suai. Tama Jongo te we bidibolo te po wai, “Suao, te bidi da, aga Godigo kibu sipsip wai dao. Agai te tigidali tǫde bidibo we bidi augwaligo yali dwai sęgę te sela sąwaibao.

³⁰Polobadu eno te po wai, ‘Nosali bidi me asobo bidi agai eno nogi aiyaba elaluaibao. Magi basowe? Ena ame nesiąbadi, aga polobadu mu bidai. Tama tibaso, agai nogigo eno nogi aiyaba elalubo dao,’ eno te po wai. Tama megi te bidi e dao, eno dagebolo polobadu wali gilama.

³¹Eno digi eno te nosali asobo bidi mena bidi dawe, te eno konebeo. Tiali goli, eno aga te dage Israel we bidi dali ola momainu, eno we bidi baptais magasiyu asai,” Jongo te po wai.

³²Te Jon agai suali sę te po weyu, te po wai, “Eno suali, Godigo Mobo Bidi dagalu tagalama, tǫba dulubuo, te ba hi tiwai asobo eno suai. Tama te ba hi Jisasgo tigi dolo dulubo, te eno suai.

³³Eno digi te nosali asobo bidi eno me konebeo. Tialima, Godigo ena tagala palu, we bidi baptais mao weyu, enabolo te po wai, ‘Te eno Mobo Bidi dulama, bidi mede bidibo nago sueibao. Te bidi da, te nosali asaibao wali bidi dao. Tama te bidi agai te we bidibolo te eno Mobo Bidi mawaibao. Agai te Mobo Bidi augwali we bidi baptais mabo tiwai mawaibao,’ Godigo enabolo te po wai.

³⁴Tama ena digi eno sulama, tama eno dagebolo te po obao, te bidi Jisas aga Godigo Ogwa dao,” Jongo po tama wai.

³⁵Do tama dao wabo side Jon aga wali pabo bidi si Jon aga dali ma dolaluai.

³⁶Tama Jon agai Jisas soabo suali, tama Jongo te po wai, “Suiąo. Te bidi te Godigo kibu sipsip wai tiwai dao,” Jongo aga wali pabo bidi si dali te po wai.

³⁷Te bidi sigo agai wali po odama, tama augwali si Jon tagalama, Jisas wali pai.

³⁸Jisas begelama suali, te bidi sigo aga wali asai. Tama Jisas agai te bidi sibolo te po wai, “Dage sigo magi nai gegebawe?” Tama te bidi sigo te po wai, “Rabai, nage mena bede bidibawe?” Te po Rabai, te page, po ola mabo bidi te page elalubo dao.

³⁹Tama Jisas agai te bidi sibolo te po wai, “Dage si aselama, suagasao.” Tama te bidi si pelama, Jisas bidibo digi sugi pai. Te tama giliga dega sabo sogo 4 klok augwali si Jisas dali pelama, tama te piode augwali si Jisas dali bidai.

⁴⁰Te Jongo wali po odali bidi si augwali si Jisas wali pai. Tama bidi me deli aga nogi Andru, te aga ama nogi Saimon Pita.

⁴¹Tama polo agai aga ama Saimon gegegi pai, tama agabolo te po wali, “Dago te Mesaia bidi suali,” Andrugo aga ama Saimonbolo te po wai. (Dago te nogi Mesaia wali begelama, tama te nogi poai Krais dao, Godigo sa muyu asaiba wali bidi dao.)

⁴²Tama Andru agai aga ama Saimon odasa, Jisas bidibo madigi pai. Jisas agai Saimon sulama, te po wai, “Nage Saimon, Jongo ogwa dao. Nosali nago nogi Sifas waibao,” Jisasgo te po wai. (Dago te nogi Sifas begelama, tama wai, Pita wali nogi, te nogi page masigi dao.)

⁴³Do tama da wabo side Jisas aga homugo Galili buluba paibao wai. Tama Jisas agai Filip suai, tama agabolo te po wai, “Nage ena wali asao,” te po wai.