San Juan 1:28-43

²⁸Wanne sunkana kirɨt Betania pɨpulukin. Sun pɨpulune Jordán pi pãn puzmumakin uz. Suane Juanne awaruza munnanarɨt.

²⁹Tɨlawara Juanne Jesústa izta. Jesús ussa amtuasmin, Juanne awaruza kaiznara: “¡Iztain! Anne Dios ɨnintamika i. Usne ussa ɨninta, kwail kiarɨttuza wat kultananapa.

³⁰Nane us akwa ñamin kaiztau: ‘Mazane ap kwizpa amtu. Usne nakin anza tɨnta ɨnintamika i. Uskas nakin an ñancha uzta.’

³¹Nakas Dios an ɨnintamikasha pianchi arau. Nane arau, kwazikasa munnana, Israel awaruz ussa piankamanapa.”

³²Sunkas Juanne kaiznara: “Nane Diospa Izpulta iztau. Sɨnam Izpulne chiyuras taiz kit ussa nukkulta. Sɨnam Izpulne utkurukana iztɨt.

³³Mama nane Dios ussa ɨninta pianchi arau. Nawa kwazikasa munnana ɨninmikane kaizta: ‘Nune Diospa Izpul maza ampura taiz kit nukkulka iznazi. An ampune awaruza Sɨnam Izpulkasa winninnanazi.’

³⁴Na watcha sun izta akwa, nane uruza ka kaiznamtus: ‘Anne Dios Painkul i.’ ”

³⁵Tɨlawara Juankas paiña paas kanpamtuzkasa suain tuara.

³⁶Jesús pɨntura iztuasmin, Juanne kaizta: —Iztain. Anne Dios ɨnintamika i. Usne ussa ɨninta, awa kwail kiarɨttuza wat kultananapa.

³⁷An paas Juanta kanpamtuzne sun kizka mɨt kit Jesústa kanpailta.

³⁸Jesúsne ussa kwizpa kanpaka iz kit kaizta: —¿Chima saimtuas? Uspane kaizpailta: —Kamtam, ¿Mɨntama uzish? Usne sɨnkara: —¡Izna arain!

³⁹Uskasa ɨil kit us uzkin izpailta. Sun payuin uskasa mailta, ampara urara panapain akwa.

⁴⁰Mazane, Juanta mɨramikane, Jesústa kanpara. Usne Andrés muntɨt. Usne Simón Pedrowa aimpihsh.

⁴¹An mɨmtuchasmin, Andrésne paiña aimpihshta, Simónta, saina ɨt kit kaizta: —Aune Dios watsat mɨltamikasha, wanmaltawas. Anne Dios narɨtmika i. Aune ussa Mesías muntawas.

⁴²Suasne Andrésne Simónta Jesús tura mɨl kit Jesústa karara. Jesús ussa iztawane, kaizta: —Mane nune Simón muntɨt. Up taittane Juan muntɨt. Mane Cefas munnazi. (An munne Pedrokas ukkas kawarain mun).

⁴³Tɨlawarane Jesúsne Galilea sura ɨshira. Felipera wanmal kit kaizta: —Kanpazha, ap kammumika namnapa.